news

పోలవరం ప్రాజెక్టుకు జాతీయ హోదా ప్రకటించిన మోడీ ప్రభుత్వం, అది పూర్తి చెయ్యటానికి మాత్రం అనేక అడ్డంకులు పెడుతుంది. చంద్రబాబు మీద వ్యక్తిగత కక్ష కోసం, రాష్ట్ర ప్రజల జీవనాడికి ఇబ్బందులు కలిగిస్తుంది. పోలవరం ప్రాజెక్టు తుది అంచనాలతో సహా డిజైన్ల ఆమోదం, రీయింబర్స్‌మెంట్‌ విషయంలో కేంద్రం కావాలని ఆలస్యం చేస్తుంది. 2019 నాటికి ప్రాజెక్టు నిర్మాణం పూర్తయితే ఆ ఘనత ముఖ్యమంత్రి చంద్రబాబుకే దక్కుతుంది. జాతీయ హోదా కలిగిన ప్రాజెక్టుగా కేంద్రం నిధులు విడుదల చేసినా.. ప్రధాని మోదీకి గానీ, బీజేపీకిగానీ ఎలాంటి క్రెడిట్‌ దక్కదనే నిశ్చితాభిప్రాయానికి కేంద్రంలోని పెద్దలు వచ్చారనే ప్రచారం జోరుగా సాగుతోంది. ఇందులో భాగంగానే... పోలవరం ప్రాజెక్టు కోసం రాష్ట్ర ప్రభుత్వం వ్యయం చేసిన నిధులను రీయింబర్స్‌మెంట్‌ చేయడంలో సవాలక్ష అడ్డంకులను సృష్టిస్తోందని జల వనరుల శాఖ ఉన్నతాధికారవర్గాలు వివరిస్తున్నాయి.

పోలవరం ప్రాజెక్టు కోసం రాష్ట్ర ప్రభుత్వం ఖర్చు పెట్టిన రూ.1089 కోట్లను రీయింబర్స్‌ చేస్తున్నట్లుగా ఈ ఏడాది మార్చిలో పోలవరం ప్రాజెక్టు అథారిటీ(పీపీఏ)కి కేంద్ర జలవనరుల మంత్రిత్వ శాఖ ద్వారా కేంద్ర ఆర్థికశాఖ లిఖిత పూర్వకంగా వెల్లడించింది. రెండుసార్లు అధికారికంగా సమాచారం పంపినందున ఒకటి రెండురోజుల్లో కేంద్ర ఆర్థికశాఖ నుంచి రూ.1089 కోట్ల నిధులు పీపీఏకు చేరుతాయని రాష్ట్ర జల వనరులశాఖ ఆశించింది. కానీ, అంతలోనే కేంద్ర జల వనరుల మంత్రిత్వ శాఖ, కేంద్ర జల సంఘం, కేంద్ర ఆర్థిక మంత్రిత్వశాఖ, నాబార్డుల మధ్య కుదిరిన మొమోరాండమ్‌ ఆఫ్‌ అగ్రిమెంట్‌(ఏంవోఏ)లో కొద్దిపాటి సవరణలు చేసుకోవాల్సి ఉందంటూ నాబార్డు పేర్కొంది. ఈ ఫైళ్లకు మోక్షం కలిగితే తప్ప.. మార్చి నెలలో విడుదల కావాల్సిన రీయింబర్స్‌మెంట్‌ మొత్తం విడుదల కాదు. ఇప్పటకీ ఆ నిధులు వదల్లేదు...

దీంతో మన అధికారులు తీవ్ర అసహనం వ్యక్తం చేసారు. ప్రాజెక్టులపై సమీక్ష పేరిట కేంద్ర జలవనరుల శాఖ ఈనెల 11న ఏర్పాటు చేసిన భేటీకి హాజరు కాకూడదని రాష్ట్ర జలవనరుల శాఖ నిర్ణయించుకుంది. ఈ విషయాన్ని కేంద్ర అధికారి ముఖాన సూటిగా చెప్పేసింది. కేంద్ర జల వనరుల శాఖ మంత్రి నితిన్‌ గడ్కరీ ఆధ్వర్యంలో జరిగే సమీక్షకు హాజరు కావాలని కోరుతూ ఆ శాఖ ఉన్నతాధికారి ఒకరు రాష్ట్ర జల వనరుల శాఖ ఉన్నతాధికారికి ఫోన్‌ చేశారు. దీనిపై రాష్ట్ర అధికారి తీవ్రంగా స్పందించారు. ‘‘పోలవరం ప్రాజెక్టును సకాలంలో పూర్తి చేస్తామని కేంద్రం మాటలు చెబుతోంది. ఏపీ నుంచి పంపిన ప్రతి ఫైలునూ వెనువెంటనే క్లియర్‌ చేసేస్తున్నామని పేర్కొంటోంది. కానీ, ఆచరణలో అది కనిపించడం లేదు. గత 6 నెలలుగా పోలవరం ప్రాజెక్టు కోసం ఒక్క పైసా విడుదల కాలేదు. "

"2017-18 సంవత్సరానికి రావాల్సిన రూ.1089కోట్ల రీయింబర్స్‌ చేయలేదు. ఆ తర్వాత విడుదలైన రూ.1400కోట్లు, రీయింబర్స్‌మెంట్‌ కింద రావాల్సిన మరో రూ.350 కోట్లు కూడా రాలేదు. వీటిని విడుదల చేసినట్లు కాగితాలు మాత్రమే వచ్చాయి. ఇప్పుడు కొత్త ఒప్పందాలంటూ నాటకాలు ఆడుతున్నారు. పోలవరం తుది అంచనాలు ఇంత ఎక్కువైతే ఎలా అని సీడబ్ల్యూసీ ప్రశ్నిస్తోంది. సాంకేతిక అంశాలను పరిశీలించాల్సిన సీడబ్ల్యూసీకి.. భూ సేకరణ చట్టం, సహాయ పునరావాస కార్యక్రమాల గురించి ఏం పని?’’ అని రాష్ట్ర జలవనరుల శాఖ అధికారి ఒకరు కేంద్ర అధికారిని సూటిగా ప్రశ్నించారు. ఈ నెల 11న ఢిల్లీలో ఏర్పాటు చేసిన సమావేశానికి హాజరుకాబోమని తేల్చిచెప్పారు. ‘ఈ సమావేశానికి మేమెందుకు రావాలి? మీరు చెప్పే హరికథలను వినడానికి రావాలా? మీ మాటలు విని సంబరపడాలా’ అని ప్రశ్నించారు.

నవనిర్మాణ దీక్షలను సవాల్‌గా తీసుకోవాలని... అభివృద్ధి, సంక్షేమాన్ని ప్రజల్లోకి తీసుకెళ్లాలని ముఖ్యమంత్రి చంద్రబాబునాయుడు పేర్కొన్నారు. ‘మీ అందరి సహకారంతో నాలుగేళ్లలో అద్భుత విజయాలు సాధించాం.. ఇందులో భాగంగా మిమ్మల్ని ఇబ్బంది పెట్టి ఉండొచ్చు.. అది రాష్ట్రం బాగు కోసమే తప్ప మరోటి కాదు...’ అని జిల్లాల కలెక్టర్లు, వివిధశాఖల అధికారులకు స్పష్టం చేశారు. వారితో పాటు స్థానిక సంస్థల ప్రతినిధులతో శుక్రవారం ఆయన టెలికాన్ఫరెన్స్‌ నిర్వహించారు. నేటి నుంచి ప్రారంభం కానున్న నవనిర్మాణ దీక్షలు, నిర్వహించాల్సిన కార్యక్రమాలపై దిశానిర్దేశం చేశారు. విభజన కారణంగా రాష్ట్రం 20 ఏళ్లు వెనక్కుపోయిందని, అందుకే వేడుకలు చేసుకునే విభజన కాదు మనదని పేర్కొన్నారు. ఈ ఏడు రోజుల దీక్షలను విజయవంతం చేయాలని సూచించారు.

"నాలుగేళ్ల అభివృద్ధికి సూచికగా ప్రతి జిల్లాలో పైలాన్లు ఆవిష్కరించాలి. గ్రామం, వార్డుల వారీగా ఎంత అభివృద్ధి జరిగింది? సంక్షేమ కార్యక్రమాలు ఎంత మందికి అందాయో తెలియజేస్తూ నోటీసు బోర్డులు పెట్టాలి. దీక్ష పూర్తికాగానే నోడల్‌ బృందం ప్రతి గ్రామంలో పర్యటించాలి. అక్కడి సమస్యలు అధ్యయనం చేయాలి. అభివృద్ధిని సమీక్షించాలి. ప్రజల ఆకాంక్షలు తెలుసుకోవాలి. గ్రామం, వార్డుల అభివృద్ధికి ప్రణాళికలు తయారు చేయాలి. ప్రతి ఇంటి నుంచి ఒక కంప్యూటర్‌ నిపుణుడు, ఒక పారిశ్రామికవేత్త తయారు కావాలి. ఆక్వాలో సమస్యలు అధిగమించాం. శనగలు, కందులు, మిర్చి కొనుగోలు చేశాం. రైతులను ఆదుకున్నాం. రూ.50వేల కోట్లతో 19లక్షల ఇళ్లు నిర్మిస్తున్నాం. త్వరలో 4లక్షల ఇళ్లకు సామూహిక గృహప్రవేశాలు నిర్వహిస్తాం. ఉపాధిహామీ కింద ఈ నెలలో రూ.1,415కోట్ల నిధులు సద్వినియోగం చేసుకున్నాం. కేంద్ర తోడ్పాటు లేకున్నా ఎంతో చేశాం. 100శాతం విద్యుత్తు, గ్యాస్‌ ఇచ్చాం. అక్టోబరు 2 నాటికి అన్ని పంచాయతీల్లో ఎల్‌ఈడీ వీధి దీపాలు ఏర్పాటు చేస్తున్నాం" అని అన్నారు.

ఈ-ప్రగతి అమలులో తనను మెప్పించాలని చూస్తే ప్రయోజనం ఉండదని, దీని అమలు వల్ల ఎంత ప్రభావం కనిపించిందో చెప్పగలగాలని ముఖ్యమంత్రి చంద్రబాబునాయుడు అన్నారు. శుక్రవారం వివిధ ప్రభుత్వ శాఖల్లో ఈ-ప్రగతి అమలు పురోగతిని సమీక్షించారు. రియల్‌ టైం గవర్నెన్స్‌(ఆర్‌టీజీ), ఈ-ప్రగతి ద్వారా ప్రజలకు మరింత మెరుగైన సేవలు అందించాలని, ప్రజా సంతృప్తికి అందరూ పని చేయాలని సూచించారు. ఈ-ప్రగతి ఇంటిగ్రేషన్‌ ప్రక్రియ వేగవంతం చేసి, అన్ని శాఖల్లో అమలు చేసేలా చూడాలని ఆదేశించారు. విద్యాశాఖలో ఆన్‌లైన్‌ ప్రవేశాలు, దరఖాస్తులకు సంబంధించిన మాడ్యుల్స్‌ పూర్తి చేశామని, సెప్టెంబరు 30నాటికి అమలులోకి తీసుకురానున్నామని అధికారులు వివరించారు.

నవ్యాంధ్ర జీవినాడి పోలవరం పై కేంద్రంలోని బీజేపీ పెద్దలు మొదటి నుంచి గేమ్ ఆడుతూనే ఉన్నారు... గత సెప్టెంబర్ లో, చంద్రబాబు అసెంబ్లీ వేదికగా, కేంద్రం పోలవరం పై చేస్తున్న నాటకాలు బయట పెట్టే దాక, వీరి నిజ స్వరూపం తెలియలేదు... పోలవరం అనేది ఎంత కష్టమైన ప్రాజెక్ట్ అనేది అందరికీ తెలుసు.. అందుకే కేంద్రం తప్పించుకుని, సెప్టెంబర్ 8, 2016న రాష్ట్ర ప్రభుత్వానికి అప్ప చెప్పి, చేతులు దులుపుకున్నారు... వారు ఊహించింది, ఈ ప్రాజెక్ట్ ముందుకు వెళ్ళదు, నెపం చంద్రబాబు మీద నెట్టవచ్చు అని.. కాని చంద్రబాబు, ఈ అవకాశాన్ని వాడుకుని, ఆయన అడ్మినిస్ట్రేటివ్ స్కిల్స్ అన్నీ బయటకు తీసారు.. ప్రతి సోమవారం, పోలవరం పై రివ్యూ పెట్టుకున్నారు... పెద్ద పెద్ద మిషన్లు ఇంపోర్ట్ చేపించారు... కొన్ని క్లిష్టమైన పనులు విదేశీ కాంట్రాక్టుర్లకు అప్పచెప్పారు... దీంతో అనూహ్యంగా, పోలవరం ప్రాజెక్ట్ పరుగులు పెట్టింది...

దీంతో కొంత మంది పెద్దలకు కన్ను కుడుతుంది.. అందుకే రాష్ట్రానికి జీవనాడి అయిన పోలవరం ఎలాగైనా ఆపి, చంద్రబాబుని రాజకీయంగా దెబ్బ తియ్యాలి అనే ప్లాన్ వేస్తున్నారు... దీంట్లో భాగంగా, ఇప్పుడు ఒరిస్సా కూడా ఎంటర్ అయ్యింది. ఒరిస్సాలో ఎన్నికలు వస్తున్న వేళ, అక్కడ ప్రజలని రెచ్చగొట్టటానికి, అన్ని పార్టీలు సమాయత్తం అవుతున్నాయి. పోలవరం పనుల్ని తక్షణమే నిలిపివేయాలని ఒడిశా సీఎం నవీన్‌ పట్నాయక్‌ కేంద్రాన్ని కోరారు. ఈ ప్రాజెక్టు నిర్మాణం వల్ల ఒడిశా ఎదుర్కొంటున్న సమస్యలు పరిష్కారమయ్యే వరకు పనులు ఆపాలని కేంద్ర పర్యావరణ శాఖమంత్రి హర్షవర్దన్‌కు లేఖ రాశారు. సమస్యలు పరిష్కారం కాకుండా ప్రాజెక్టు నిర్మాణం పూర్తయితే ఒడిశా ప్రజలు పూర్తిగా నష్టపోవాల్సి వస్తుందని ఆయన లేఖలో పేర్కొన్నారు.

ఇదే అంశంపై గతంలో ప్రధాని నరేంద్ర మోదీకి రెండుసార్లు లేఖలు రాశామని, ఒడిశాకు తెలియకుండా ఎలాంటి పనులూ చేపట్టకుండా నిలుపుదల చేయాలని అప్పడు కోరినట్టు చెప్పారు. శబరి, సీలేరు నదీ జలాల విషయం పూర్తిగా తేలకుండానే ప్రాజెక్టు నిర్మాణం చేపట్టడం గోదావరి నదీ జలాల ట్రైబ్యునల్‌ నిబంధనల్ని అతిక్రమించడమేనని లేఖలో అభిప్రాయపడ్డారు. ముంపు , పునరావాసం అంశాలు కూడా ఇంకా తేలలేదని, అవి పరిష్కారమయ్యే వరకు పనులు ఆపాలని ఆయన కేంద్ర పర్యావరణ శాఖను కోరారు. ఇంకా ఎన్ని మలుపులు తిరిగుతాయో, ఇంకా ఎన్ని కుట్రలు జరుగుతాయో చూడాలి...