news

జస్టిస్ కనకరాజ్ గుర్తున్నారా ? ఏడాది క్రితం, రాజ్యాంగానికి విరుద్ధంగా, ఎలక్షన్ కమీషనర్ ని మార్చేసి, రాత్రికి రాత్రి అంబులెన్స్ లో చెన్నై నుంచి, అమరావతి తీసుకువచ్చి, ఆయనకు బాధ్యతలు అప్పగించిన విషయం అందరికీ తెలిసిందే. క-రో-నా ఉన్నా, ఇతర రాష్ట్రాల నుంచి ప్రజల రాకపోకలు లేకపోయినా, ఆయన్ను అంబులెన్స్ లో తీసుకుని వచ్చారు. అయితే తరువాత ఎన్నికల కమీషనర్ గా నియమించినా, హైకోర్టు, సుప్రీం కోర్టు ఆదేశాలతో, ఆయన పదవి పోయింది. మళ్ళీ నిమ్మగడ్డ రమేష్ కుమార్ ఎన్నికల కమీషనర్ గా ఎన్నికయ్యారు. ఇక పోతే, ఆయనకు సంబంధించిన కొన్ని బిల్స్ విషయంలో కూడా కోర్టులలో కేసులు నడిచాయి. దాదాపుగా 80 ఏళ్ళు ఉన్న జస్టిస్ కనకరాజ్ ను జగన్ ప్రభుత్వం ఎన్నికల కమీషనర్ గా నియమించాలని చేసిన ప్రయత్నం ఫ్లాప్ అవ్వటంతో, గత ఏడాదిగా ఆయనకు పదవి లేకుండా పోయింది. అయితే ఈ జస్టిస్ కనకరాజ్ పై ప్రభుత్వ పెద్దలకు ఉన్న ఇష్టం ఏమిటో కానీ, ఇప్పుడు తాజాగా ఆయనకు బంపర్ ఆఫర్ ఇచ్చారు. మళ్ళీ ఇంకో కొత్త పదవి ఇచ్చి మరీ, ఆయనకు లబ్ది చేకూర్చారు. కొత్త పదవి సృష్టించి మరీ, కొత్త పదవి ఇవ్వటం, మరో హైలైట్. జస్టిస్ కనకరాజ్ పై, రాష్ట్ర ప్రభుత్వ పెద్దలకు ఉన్న మక్కువ ఏమిటో కానీ, ఇప్పుడు ఆయనకు కొత్త పదవి ఒకటి ఇస్తూ ఉత్తర్వులు జారీ చేసారు.

రాష్ట్ర పోలీస్ కంప్లెంట్స్ అథారిటీ ఛైర్మన్‍గా, జస్టిస్ కనగరాజ్ ని నియమిస్తూ, రాష్ట్ర ప్రభుత్వం ఉత్తర్వులు జారీ చేసింది. ఈ పదవిలో జస్టిస్ కనకరాజ్ మూడేళ్ళు ఉండనున్నారు. మూడేళ్ళ పాటు ఈ పదవి ఉంటుంది అంటూ ఉత్తర్వుల్లో తెలిపారు. ఈ రాష్ట్ర పోలీస్ కంప్లెంట్స్ అథారిటీలో మరో ముగ్గురు సభ్యులు కూడా ఉంటారు. ఇంకా ముగ్గురు సభ్యులు ఎవరో తెలియలేదు. అయితే గతంలో సుప్రీం కోర్టు ఇచ్చిన ఆదేశాలు ప్రకారం, రాష్ట్ర ప్రభుత్వం రాష్ట్ర పోలీస్ కంప్లెంట్స్ అథారిటీని నెలకొల్పింది. ఇప్పటికే అనేక రాష్ట్రాలు దీన్ని అమలు చేస్తూ ఉండగా, తాజాగా ఆంధ్రప్రదేశ్ ప్రభుత్వం కూడా, రాష్ట్ర పోలీస్ కంప్లెంట్స్ అథారిటీని ఏర్పాటు చేసింది. పోలీసులు పై ఎలాంటి ఫిర్యాదులు ఉన్నా, వారు కేసు తీసుకోక పోయినా, మరే ఇతర ఫిర్యాదులు ఉన్నా, ప్రజలు ఈ రాష్ట్ర పోలీస్ కంప్లెంట్స్ అథారిటీకి ఫిర్యాదు చేయవచ్చు. అలాగే రాష్ట్ర పోలీస్ కంప్లెంట్స్ అథారిటీ, రాష్ట్ర ప్రభుత్వానికి కూడా సూచనలు సలహాలు ఇస్తుంది. మొత్తానికి, ఈ పదవిలో జస్టిస్ కనకరాజ్ ను ప్రభుత్వం కూర్చోబెట్టింది.

ఆంధ్రప్రదేశ్ రాష్ట్రానికి ప్రత్యేక హోదా విషయం పై, గతంలో ప్రతిపక్ష నేతగా ఉండగా జగన్ మోహన్ రెడ్డి మాట్లాడిన మాటలు అందరికీ గుర్తున్నాయి. ప్రత్యేక హోదాని కేంద్రం మెడలు వంచి సాధిస్తామని, జగన్ మోహన్ రెడ్డి ఊరు ఊరు తిరిగి చెప్పిన విషయం తెలిసిందే. ప్రత్యెక హోదా వస్తే ఉద్యోగాల విప్లవం వస్తుందని, ఇన్కం టాక్స్ కట్టే అవసరం లేదని, అలాగే ప్రతి జిల్లాని ఒక హైదరాబాద్ లాగా తయారు చేస్తామని, యువతకు వద్దంటే ఉద్యోగాలు వస్తాయి అంటూ, హోరెత్తించారు. ఇవన్నీ నమ్మిన ప్రజలు, జగన్ మోహన్ రెడ్డిని పెద్ద ఎత్తున ఓట్లు వేసి గెలిపించారు. ఇక కేంద్రం మెడలు వంచి ప్రత్యేక హోదా తెచ్చేస్తారని అందరూ భావించారు. మొదట్లో కదా అనుకున్నారు, ఏడాది అయ్యింది, రెండేళ్ళు అయ్యిందా, హోదా అనే మాటే నోట్లో నుంచి రావాటం లేదు. అయితే ఎట్టకేలక మొదటి సారి ప్రత్యేక హోదా పై వివరణ ఇచ్చే ప్రయత్నం చేసారు. ప్రత్యేక హోదా ఇప్పట్లో వచ్చే పరిస్థితి లేదని, కేంద్రాన్ని అడుగుతూ ఉండటం తప్ప మనం చేసేది ఏమి లేదని అన్నారు. కేంద్రంలో సంకీర్ణ ప్రభుత్వం లేదని, అందుకే కేంద్రాన్ని అడగటం మినహా ఏమి చేయలేని పరిస్థితి ఉందని అన్నారు. గతంలో చంద్రబాబు చేసిన పని వల్లే ఇలా జరిగిందని, తాను అందకే గట్టిగా ఆడగలేక పోతున్నానని అన్నారు.

అయితే ఈ మాటలు విన్న ప్రజలు, యువత షాక్ కు గురయ్యారు. మెడలు వంచి సాధిస్తాను అని చెప్పిన జగన్ మోహన్ రెడ్దేనా ఇలా మాట్లాడుతుందని ఆశ్చర్య పోయారు. సంకీర్ణ ప్రభుత్వం లేకపోయినా, కేంద్రానికి రాజ్యసభలో బలం లేదు కదా, అక్కడ కేంద్రాన్ని గట్టిగా నిలదీసి, మీ బిల్లులు పాస్ అవ్వాలి అంటే, మేము చెప్పినట్టే ప్రత్యెక హోదా ఇవ్వండి, అని కేంద్రం పై ఎందుకు ఒత్తిడి తేవటం లేదని ప్రశ్నిస్తున్నారు. అంబానీ సన్నిహితులకు రాజ్యసభ ఇచ్చినప్పుడు, ఆ షరతు ఎందుకు పెట్టలేదని ప్రశ్నిస్తున్నారు. కనీసం కేంద్రాన్ని ప్రశ్నించకుండా, ఇప్పుడు దేవుడి మీద భారం వేయటం, నేను ఏమి చేయలేను, సంకీర్ణ ప్రభుత్వం లేదు, చంద్రబాబు వల్లే ఇదంతా అని చెప్పటం ఎంత వరకు సమంజసం అని ప్రశ్నిస్తున్నారు. ఇప్పటికే ఉద్యోగాలు లేక, జాబ్ క్యాలెండర్ చూసి నిరుత్సాహంలో ఉన్న యువత, జగన్ వ్యాఖ్యలు చూసి షాక్ అయ్యారు. పుదుచ్చేరిలో బీజేపీ హోదా ఇస్తాను అంటే, అక్కడకు తమ పార్టీ నేతలను జగన్ పంపించి ప్రచారం చేసిన విశయాన్ని గుర్తు చేసుకుంటున్నారు.

మెగా సోలార్ ప్రాజెక్ట్ టెండర్లను రద్దు చేస్తూ హైకోర్టు నిర్ణయం ప్రకటించిన సంగతి తెలిసిందే. అయితే ఈ తీర్పు తరువాత, తెలుగుదేశం పార్టీ, ప్రభుత్వం పై సంచలన ఆరోపణలు చేసింది. సోలార్ విద్యుత్ టెండర్లలో రూ.లక్షా.20 వేల కోట్ల కుంభకోణానికి పన్నాగం పన్నారు అంటూ, టీడీపీ పొలిట్ బ్యూరో సభ్యులు, కిమిడి కళా వెంకట్రావు ఆరోపించారు. ఆయన మాట్లాడుతూ, "రాష్ట్ర అభివృద్ధికి ఆయువుపట్టులాంటి విద్యుత్ రంగాన్ని జే. ట్యాక్స్ కోసం జగన్ రెడ్డి ప్రభుత్వం నిర్వీర్యం చేస్తున్నారు. రాష్ట్ర ప్రభుత్వం అనుసరిస్తున్న విధానాలతో విద్యుత్ రంగం నిర్వీర్యమవుతోంది. సోలార్ టెండర్లు రద్దుపై ముఖ్యమంత్రి ఎందుకు నోరు మెదపడం లేదు.? టెండర్లు రద్దుతో ప్రపంచ స్థాయిలో రాష్ట్రం, దేశ పరువు తీశారు. ఎవరి ప్రయోజనాల కోసం టెండర్లు నిబంధనలు మార్చారో సమాధానం చెప్పాలి. సోలార్ టెండర్లలో భారీగా అవకతవకలు జరగడం వల్లే టెండర్లను హైకోర్టు రద్దు చేసింది. వేలకోట్ల అక్రమాలకు పాల్పడి, ప్రజల సొమ్ము దోచుకుతినేందుకు సోలార్ విద్యుత్ ను అడ్డుపెట్టుకోవాలని చూశారు. రూ.లక్షా.20వేల కోట్ల ప్రజా ధనాన్ని దోచుకునేందుకు ఎసరు పెట్టారు. టెండర్లను అధికభాగం అదానీ, కడప ఎంపీ అవినాశ్ రెడ్డి బినామీ అయిన నర్రెడ్డి విశ్వేశ్వరరెడ్డికి చెందిన షిరిడీ సాయి ఎలక్ట్రికల్స్ సంస్థలకు కట్టబెట్టాలని చూశారు. అందుకే వైసీపీ నేతలు దీనిపై మాట్లాడకుండా తప్పించుకు తిరుగుతున్నారు. టీడీపీ హయాంలో పవర్ పర్చేజ్ అగ్రిమెంట్ల కాలపరిమితి 25 ఏళ్లు ఉంటే వైసీపీ నేతలు గగ్గోలు పెట్టారు. మరి ఇప్పుడు అదే కాలపరిమితిని 30 ఏళ్లకు ఎలా పెంచారు.? గతంలో సోలార్ పవర్ అవసరంలేదని ఇప్పుడు 10వేల మెగావాట్లకు ఏ విధంగా టెండర్లు పిలిచారు? 30ఏళ్లకు రూ.లక్షా20వేల కోట్లకు ప్రణాళిక రూపొందించుకున్నారు. నిబంధనలు గాలికొదిలేసి టెంటర్లు పిలిచారు. కేంద్ర ప్రభుత్వం 2017లో విడుదల చేసిన కాంపిటీటివ్ బిడ్డింగ్ గైడ్ లైన్స్ నిబంధనలను జగన్ రెడ్డి పూర్తిగా తుంగలోతొక్కి పీపీఏలు విడుదల చేశారు. గైడ్ లైన్స్ లోని క్లాజ్ 5.7ప్రకారం ఏపీ ఎలక్ట్రిసిటీ రెగ్యులేటరీ కమిషన్ అనుమతి లేకుండా ఒప్పందాలకు సంబంధించి ఏవిధమైనమార్పులు చేయకూడదనే నిబంధనను లెక్కచేయలేదు. "

"దేశమంతా కనిష్టంగా రూ.1.90పైసలకే యూనిట్ సోలార్ విద్యుత్ లభిస్తుంటే, 60పైసలు అదనంగా పెంచి కట్టబెట్టి కమీషన్లకు కక్కుర్తిపడాలని చూశారు. పీపీఏలు రద్దు చేసి రాష్ట్ర పరువును తీశారు. ఇప్పుడు 6,400మెగావాట్ల సోలార్ విద్యుత్ఉత్పత్తికి ఎలా టెండర్లు పిలిచారో చెప్పాలి.? ఒప్పందం చేసుకున్నన్ని రోజులు ఒకటే టారిఫ్ ను ఎందుకు అమలుచేయాలనుకోలేదు.? దిక్కూమొక్కులేని కంపెనీలకు దోచిపెట్టాలనుకోవడంతోనే హైకోర్టు టెండర్లను రద్దు చేసింది. కోర్టు తీర్పుతో వైసీపీ అవినీతికి భంగం వాటిల్లింది. విద్యుత్ రంగాన్ని జగన్ రెడ్డి నాశనం చేశారు. నీటి లభ్యత సరిగాలేని సమయంలోనూ టీడీపీ 24 గంటల విద్యుత్ అందించింది. వర్షాలు సమృద్ధిగా కురిసి పుష్కలంగా నీలి లభ్యత వున్నా ప్రభుత్వం వద్ద ప్రణాలిక లేక విద్యత్ కోతలు విధిస్తున్నారు. తీవ్ర నష్టాలతో రైతులు అతలాకుతలమవుతుంటే బోర్లకు మీటర్లు బిగించి అప్పుల కోసం రైతుల ఉసురుతీసుకునేందుకు సిద్ధమవుతున్నారు. ఇప్పటికే విద్యుత్ ఛార్జీలు పెంచి సామాన్య ప్రజల డొక్కచించుతున్నారు. జగన్ రెడ్డి వచ్చాక రాష్ట్ర ఆదాయం చూస్తే జానెడు.. అప్పులు చూస్తే మూరెడు ఉంది. వ్యాక్సిన్ గ్లోబల్ టెండర్లు, రోడ్డు కాంట్రాక్టులకు, చిన్నచిన్న కాంట్రాక్టు పనులకు కూడా స్పందన రావడం లేదంటే కమీషన్లు ఏ స్థాయిలో అడుగుతున్నారో అర్థమవుతోంది. రాష్ట్రంలో ఎవరు అడుగుపెట్టాలన్నా వైసీపీ వాళ్లు అడిగే వాటాల దెబ్బతో హడలెత్తిపోతున్నారు. టెండర్ల పేరుతో ప్రజల సొమ్ము అప్పనంగా దోచుకుతింటామనంటే చూస్తూ ఊరుకోం." అని అన్నారు.