తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నివాసం వద్ద అనుమానాస్పదంగా సంచరిస్తున్న వ్యక్తిని పోలీసులు అదుపులోకి తీసుకున్నారు. హైదరాబాద్ లోని చంద్రబాబు నివాసం వద్ద ఒక వ్యక్తి అక్కడక్కడే తచ్చాడుతూ ఉండటంతో, జుబ్లీ హిల్స్ పోలీసులు అదుపులోకి తీసుకున్నారు. అదుపులోకి తీసుకున్న వ్యక్తిని ప్రశ్నించగా, అతను కడప జిల్లా, రాజంపేటకు చెందిన వ్యక్తిగా తేలింది. తన పేరు సుబ్బారెడ్డి అని, తాను చక్రంపేట ఊరుకి సంబంధించిన వ్యక్తిని అని, తన కుటుంబలో ఆస్తి తగాదాలు ఉన్నాయని, తన తండ్రితో పాటుగా, సవతి తల్లి వారి కుమారుల నుంచి తనకు ప్రాణ హాని కూడా ఉందని, ఈ విషయాలు అన్నీ చంద్రబాబు దృష్టికి తీసుకుని వచ్చి, తగిన న్యాయం చేస్తారని ఇక్కడకు వచ్చానని, రెండు రోజులుగా ఇక్కడే తిరుగుతున్నానని, సుబ్బారెడ్డి పోలీసుల విచారణలో వెల్లడించారు. అయితే, ఇవన్నీ నోట్ చేసుకున్న పోలీసులు, ఈ విషయం తాము చంద్రబాబు దృష్టికి తీసుకుని వెళ్తామని, ఆయన వివరాలు నమోదు చేసుకుని తన సొంత ఊరికి పంపించారు. అయితే, ఆస్తి తగాదా విషయం, చంద్రబాబుకి చెప్పటం ఏమిటో, ఈ లాజిక్ ఏమిటో ఎవరికీ అర్ధం కావటం లేదు. ఆ వ్యక్తని మరింత లోతుగా విచారణ చేసి ఉండాల్సిందని, టిడిపి శ్రేణులు అంటున్నారు.
