news

ఏపీలో మరో మూడు రోజుల్లో కొత్త ప్రభుత్వం కొలువుదీరబోతోంది. ముఖ్యమంత్రిగా వైఎస్ జగన్ ఈ నెల 30న విజయవాడలో ప్రమాణ స్వీకారం చేయబోతున్నారు. కొత్త ప్రభుత్వం ఏర్పాటు కావడంతో పోలీస్ శాఖలో మార్పులు-చేర్పులు మొదలయ్యాయి. ఏపీ డీజీపీగా ఠాకూర్‌ స్థానంలో సీనియర్ ఐపీఎస్ గౌతమ్ సవాంగ్‌ను నియమిస్తారని జోరుగా ప్రచారం జరుగుతోంది. ఇక రాష్ట్రంలో భద్రతలో కీలకమైన ఇంటిలిజెన్స్ చీఫ్ బాధ్యతలు ఎవరికి దక్కబోతున్నాయన్న చర్చ మొదలయ్యింది. ఏపీ కేడర్‌కు చెందిన పలువురు ఐపీఎస్‌ల పేర్లు తెరపైకి వస్తున్నా.. తెలంగాణలో హైదరాబాద్ రేంజ్ ఐజీగా పనిచేస్తున్న స్టీఫెన్ రవీంద్ర పేరు కొత్తగా తెరపైకి వచ్చింది.

స్టీఫెన్ రవీంద్రను తెలంగాణ నుంచి రిలీవ్ చేసి.. డిప్యుటేషన్ పై ఏపీకి తీసుకురాబోతున్నట్లు తెలుస్తోంది. ఏపీలో ఆయనకు ఇంటిలిజెన్స్ చీఫ్‌గా బాధ్యతలు అప్పగిస్తారని సమాచారం. జగన్ విజ్ఞ‌ప్తి మేరకు స్టీఫెన్ రవీంద్రను తెలంగాణ సర్కార్ రిలీవ్ చేసినట్లు ప్రచారం జరుగుతోంది. దీనిపై కేంద్రానికి లేఖ రాసినట్లు తెలుస్తోంది. అయితే ఈ ప్రచారంపై తెలుగు రాష్ట్రాల పోలీస్‌శాఖ నుంచి అధికారిక సమాచారం మాత్రం లేదు. స్టీఫెన్ రవీంద్ర గతంలో వైఎస్ రాజశేఖర్ రెడ్డికి చీఫ్ సెక్యూరిటీ ఆఫీసర్‌‌గా పని చేశారు. అయితే తెలంగాణాలో ఉన్న కీలక అధికారిని, ఆంధ్రప్రదేశ్ లో కీలకమైన ఇంటలిజెన్స్ పదవి ఇవ్వటం పై, ఆశ్చర్యం వ్యక్తం చేస్తున్నారు.

ఇప్పటికే ప్రస్తుత డీజీపీ ఆర్‌.పి.ఠాకూర్‌ను తప్పించి ఆయన స్థానంలో గౌతమ్‌ సవాంగ్‌ను నియమించనున్నారు. దీనికి సంబంధించి త్వరలో అధికారిక ఉత్తర్వులు రానున్నాయి. ఈ నెల 30న ప్రమాణస్వీకారం చేయనున్న నేపథ్యంలో దీనికి సంబంధించి పోలీసుశాఖపరంగా ఏర్పాట్లను పర్యవేక్షిస్తున్నారు. విజయవాడ ఇందిరాగాంధీ పురపాలక మైదానాన్ని శనివారం సాయంత్రం ఆయన సందర్శించి అధికారులతో సమీక్షించారు. గతేడాది జులై 1న ఆర్‌.పి.ఠాకూర్‌ డీజీపీగా బాధ్యతలు చేపట్టారు. 11 నెలలుగా పదవిలో కొనసాగుతున్నారు. ఆయన స్థానంలో సవాంగ్‌ డీజీపీగా బాధ్యతలు చేపట్టనున్నారు.

ఎన్నికల ఫలితాలు విడుదల అయ్యి, కొత్తగా ప్రభుత్వం ఏర్పాటు కానున్న తరుణంలో గవర్నర్‌ ఇఎస్‌ఎల్‌ నరసింహన్‌ వైపు అందరి దృష్టి మళ్లింది. సుమారు తొమ్మిదన్నరేళ్లుగా రాజ్‌పాల్‌గా వ్యవహరిస్తున్న నరసింహన్‌ తన పదవీ కాలంలో ఇప్పటి వరకు నలుగురు సిఎంలతో ప్రమాణం చేయించారు. రాష్ట్ర విభజన, రాష్ట్రపతి పాలన, ఏకకాలంలో సుదీర్ఘ కాలం రెండు తెలుగు రాష్ట్రాలకు ఉమ్మడి గవర్నర్‌గా పని చేయడం వంటి పలు కీలక పరిణామాలు, మూలమలుపులు, సంక్షోభ సమయాల్లో నరసింహన్‌ పాత్ర కనిపిస్తుంది. ఇలాంటి అరుదైన అవకాశం ఆయనకే వచ్చింది. ఇదొక రికార్డన్న చర్చ అటు ప్రభుత్వ వర్గాల్లో ఇటు రాజకీయ వర్గాల్లో సాగుతోంది.

సమైక్య రాష్ట్రంలో కె రోశయ్య తర్వాత 2010 డిసెంబర్‌ 25న కిరణ్‌కుమార్‌రెడ్డితో, రాష్ట్ర విభజన అనంతరం 2014 జూన్‌ 2న తెలంగాణ సిఎంగా కెసిఆర్‌, అదే సంవత్సరం జూన్‌ 8న ఎపి సిఎంగా చంద్రబాబుతో, తిరిగి నిరుడు డిసెంబర్‌లో రెండో సారి కెసిఆర్‌తో ముఖ్యమంత్రులుగా ప్రమాణం చేయించిన నరసింహన్‌ ఈ నెల 30న మరో కొత్త సియంతో ప్రమాణం చేయించనున్నారు. 1968 ఐపిఎస్‌ బ్యాచ్‌ నుంచి ఆంధ్రప్రదేశ్‌ కేడర్‌కు ఎంపికైన నరసింహన్‌ అనంతరం చాలా ఏళ్లపాటు కేంద్ర నిఘా సంస్థ (ఐబి)లో పని చేశారు. ఐబి చీఫ్‌గా 2006 డిసెంబర్‌ వరకు పని చేసిన ఆయన ఆ ఏడాది చివరిలో రిటైరయ్యారు. కాగా అప్పటి యుపిఎ-1 సర్కారు నరసింహన్‌ను మావోయిస్టు ప్రభావం అధికంగా ఉన్న ఛత్తీస్‌గఢ్‌ గవర్నర్‌గా 2007 జనవరిలో నియమించింది.

ఎపి గవర్నర్‌గా ఎన్‌డి తివారీ రాజీనామా చేశాక, ఆ సమయంలో కెసిఆర్‌ నిరాహారదీక్ష, అనంతరం విభజన ఆందోళనలు ఉధృతంగా నడుస్తున్న వేళ నరసింహన్‌ను ఎపికి ఇన్‌ఛార్జి గవర్నర్‌గా యుపిఎ-2 సర్కారు 2009 డిసెంబర్‌ 27న నియమించింది. 2010 జనవరి 23న ఎపికి పూర్తి స్థాయి గవర్నర్‌గా వేసింది. రాష్ట్ర విభజన సమయంలో ఇఎస్‌ఎల్‌ అప్పటి కాంగ్రెస్‌ కేంద్ర పెద్దలతో మంత్రాంగం నడుపుతున్నారంటూ అప్పట్లో కెసిఆర్‌, టిడిపి ఆరోపణలు చేశాయి. పార్లమెంట్‌లో బిల్లు నేపథ్యంలో విభజనను నిరసిస్తూ అప్పటి ఉమ్మడి రాష్ట్ర సిఎం కిరణ్‌కుమార్‌రెడ్డి 2014 ఫిబ్రవరి 19న రాజీనామా చేసిన దరిమిలా మార్చి 1 నుంచి రాష్ట్రపతి పాలన అమల్లోకొచ్చింది. అప్పటి నుంచి ఎన్నికలు ముగిసి ఎపి, తెలంగాణాల్లో కొత్త ప్రభుత్వాలు కొలువుదీరే వరకు సుమారు మూడు నెలలకుపైగా రాష్ట్రపతికి ప్రతినిధిగా పాలన సాగించారు.

పెట్రోల్ వడ్డన ఆగట్లేదు. దేశీ ఇంధన ధరలు ఐదు రోజులుగా పెరుగుతూనే వస్తున్నాయి. సోమవారం (మే 27) పెట్రోల్ ధర 11 పైసలు పైకి కదిలింది. డీజిల్ ధర మాత్రం నిలకడగా కొనసాగింది. దీంతో హైదరాబాద్‌‌లో పెట్రోల్ ధర రూ.76.12కు చేరింది. డీజిల్ ధర రూ.72.47 వద్ద స్థిరంగా ఉంది. దేశంలోని ఇతర నగరాల్లోనూ దాదాపు ఇదే పరిస్థితి. ఇకపోతే అంతర్జాతీయ మార్కెట్‌లో ముడిచమురు ధరలు మిశ్రమంగా స్పందించాయి. దేశ రాజధాని ఢిల్లీలో లీటర్ పెట్రోల్ ధర కేవలం ఒకే ఒక పైసా పెరుగుదలతో రూ.71.77కు చేరింది. డీజిల్ ధరలో మాత్రం ఎలాంటి మార్పు లేదు. రూ.66.64 వద్ద కొనసాగుతోంది. వాణిజ్య రాజధాని ముంబయిలో కూడా ధరలు పెరిగాయి. పెట్రోల్ ధర 10 పైసలు ఎగసింది. డీజిల్ ధర నిలకడగా ఉంది.

దీంతో పెట్రోల్ రూ.77.38కు చేరితే.. డీజిల్ ధర రూ.69.83 వద్ద స్థిరంగా కొనసాగుతోంది. అమరావతిలో కూడా పెట్రోల్, డీజిల్ ధరల పరిస్థితి ఇలానే ఉంది. పెట్రోల్‌ ధర 10 పైసలు పెరుగుదలతో రూ.75.86కు చేరింది. డీజిల్‌ ధర రూ.71.82 వద్దే కొనసాగుతోంది. ఇక విజయవాడలో పెట్రోల్ ధర రూ.75.51కు పెరిగింది. డీజిల్ ధర రూ.71.50 వద్ద స్థిరంగా కొనసాగుతోంది. అంతర్జాతీయ మార్కెట్‌లో ముడి చమురు ధరలు మిశ్రమంగా కదిలాయి. బ్రెంట్ క్రూడ్ ఆయిల్ ధర బ్యారెల్‌‌కు 0.19 శాతం పెరుగుదలతో 67.60 డాలర్లకు చేరింది. ఇక డబ్ల్యూటీఐ క్రూడాయిల్ ధర బ్యారెల్‌కు 0.36 శాతం తగ్గుదలతో 58.60 డాలర్లకు క్షీణించింది.