news

రాష్ట్రంలో వైకాపా అధికార పగ్గాలు చేపట్టిన నేపథ్యంలో రాజధాని అమరావతి ప్రాంతంలో భారీ మార్పులు చేర్పులు ఉండవచ్చని భావిస్తున్నారు. ఈ నేపథ్యంలోనే రాష్ట్రంలో తెదేపా ఘోరపరాజయం చెందడంతో అధినేత చంద్రబాబు నివాసంపై కూడా అనుమానాలు రేకెత్తిస్తున్నాయి. ఇప్పటి వరకు చంద్రబాబు నాయుడు గుంటూరు జిల్లా ఉండవల్లి పరిధిలోని కృష్ణా నది తీరాన గల లింగమనేని ఎస్టేట్‌ లో తాత్కాలిక నివాసం ఉంటున్నారు. అక్కడే ప్రజా వేదికను నిర్మించి ప్రజల సమస్యలను తెలుసుకో వడం జరిగింది. పార్టీ కార్యక్రమాలను కూడా ఇక్కడ నుంచే నిర్వహించారు. అయితే ఏపిలో తెదేపా ఊహించని రీతిలో ఓటమి పాలు కావడంతో చంద్ర బాబు ఉండవల్లిలోని తాత్కాలిక నివాసంలో ఉంటా రా లేక నివాసాన్ని మారుస్తారా అనే విషయంపై సర్వత్రా చర్చ కొనసాగుతోంది.

చంద్రబాబు తాత్కాలిక నివాసంతో పాటు మంతెన సత్యనారాయణ రాజు ప్రకృతి వైద్యశాల మరికొన్ని ఆధ్యాత్మిక ఆశ్రమాలు, రాజకీయ పార్టీనేతల అతిథి గృహాలు కూడా ఉన్నాయి. జగన్‌ ముఖ్యమంత్రిగా ఈనెల 30న ప్రమా ణ స్వీకారం చేసిన అనంతరం అక్రమ కట్టడాలపై తీసుకునే చర్యలలో భాగంగా…. ప్రస్తుతం చంద్ర బాబునాయుడు ఉంటున్న నివాసాన్ని కూడా ఖాళీ చేయిస్తారనే వార్తలు వినవస్తున్నాయి. గతంలో అక్రమ కట్టడాలుగా గుర్తించిన నిర్మాణాలను జల వనరుల శాఖ, రెవెన్యూ శాఖలు తాజాగా నోటీసులు జారీ చేయనున్నట్లు సమాచారం. ఈ నేపథ్యంలో చంద్రబాబు ఉంటున్న నివాసం ఖాళీ చేయక తప్పని పరిస్థితులు ఎదురు కానున్నాయి. చంద్రబాబును ఇబ్బంది పెట్టేందుకు వైకాపా ఈ వ్యూహాన్ని అనుసరిస్తుందనే వార్తలు వస్తున్నాయి. అంతే కాకుండా కోట్లాది రూపాయల వ్యయంతో చంద్రబాబు నివాసానికి సమీపంలో నిర్మించిన ప్రజావేదిక కూడా ప్రశ్నార్ధకంగా మారనుంది.

ప్రత్యేక హోదాపై ప్రధాని మోదీని అభ్యర్థించడం మినహా మరేమీ చేయలేమని వైఎస్‌ జగన్‌ పేర్కొన్నారు. ‘‘ప్లీజ్‌ గాడ్‌... ఎన్డీయే బలం 250తో ఆగాలని ఆ దేవుడిని బలంగా కోరుకున్నాను. దురదృష్టవశాత్తూ 350 పైచిలుకు స్థానాలు వచ్చాయి. మన అవసరం వాళ్లకు లేదు. రాష్ట్రంలో దేవుడు మాకు ఘన విజయం ఇచ్చినట్లే, దేశవ్యాప్తంగా వాళ్లకు ఇచ్చాడు. ఇలాంటి పరిస్థితుల్లో... సార్‌ ప్లీజ్‌, సార్‌ ప్లీజ్‌ అని అడగడం తప్ప... డిమాండింగ్‌, కమాండింగ్‌ చేయలేం’’ అని జగన్‌ పేర్కొన్నారు. ఆదివారం ఢిల్లీకి వచ్చిన ఆయన తొలుత ప్రధాన మంత్రి మోదీతో, ఆ తర్వాత బీజేపీ జాతీయ అధ్యక్షుడు అమిత్‌షాతో వేర్వేరుగా భేటీ అయ్యారు. ఎన్నికల్లో ఘన విజయం సాధించిన అనంతరం... తొలిసారిగా ఏపీ భవన్‌లో మీడియాతో అనేక అంశాలపై వివరంగా మాట్లాడారు.

‘‘ఎన్డీయే 250 స్థానాలకే పరిమితమైతే... వైసీపీకి అద్భుతంగా ఉండేది. ఏపీకి ప్రత్యేక హోదా ఇచ్చిన తర్వాతే ప్రమాణ స్వీకారం చేస్తానని చెప్పే పరిస్థితి ఉండేది. కానీ, దురదృష్టవశాత్తు అలా జరగలేదు. మనం ఒకరిపై ఆధారపడాల్సిన పరిస్థితి. మన అవసరం వాళ్లకు లేదు. వాళ్లే బలంగా ఉన్నారు. ఇప్పుడు ప్రధానమంత్రిని మొట్టమొదటిసారి కలిశాను. దేవుడి దయ ఉంటే ఇంకా 30సార్లో, నలబైసార్లో కలుస్తాను. కలిసిన ప్రతిసారీ... ప్రత్యేకహోదా గురించి అడుగుతూనే ఉంటాను. ఇది పార్లమెంటు వేదికగా ఇచ్చిన హామీ అని గుర్తు చేస్తాను. దీనిని వదిలిపెట్టే ప్రసక్తే లేదు. ఒత్తిడి చేస్తూనే ఉంటాం’’ అని తెలిపారు. ఇలా అడుగుతూ పోతే ఏదో ఒక సందర్భంలోనైనా ప్రధాని మనసు మారుతుందనే నమ్మకం ఉందని జగన్‌ చెప్పారు.

ఇప్పుడున్న పరిస్థితుల్లో రాష్ట్రాన్ని బాగా నడపాలంటే కేంద్ర సహాయం అవసరమని జగన్‌ అన్నారు. ‘రాష్ట్ర ఆర్థిక పరిస్థితుల గురించి గత మూడు నాలుగు రోజుల్లో తెలుసుకున్నాను. కేంద్రం నుంచి నుంచి సహాయం అవసరమని గ్రహించాను. ప్రధాని మోదీని సహాయం కోసం అభ్యర్థించాను. మొత్తం వివరాలను మోదీ దృష్టికి తీసుకెళ్లి... అన్నిరకాల సహాయ సహకారాలు అవసరమని చెప్పాను. రాష్ట్రాన్ని బాగా నడపాలనే తపన, తాపత్రయం ఉంది. డబ్బులు బాగుంటే... రాష్ట్రాన్ని బాగా నడపొచ్చు. అందుకే, ప్రధానిని సహాయం కోరాను’ అని జగన్‌ వివరించారు. ప్రత్యేక హోదా ఒక్కటేకాదని, రాష్ట్రానికి విపరీతమైన సమస్యలున్నాయని జగన్‌ చెప్పారు. మోదీ తనకు గంటపాటు సమయం ఇచ్చారని, చెప్పిందంతా విన్నారని, రాష్ట్రానికి సహాయం చేయాలనే తపన ఆయనలో కనిపించిందని, ఇది శుభ సంకేతమని తెలిపారు.

ఏపీ ఎన్నిక‌ల‌లో విజ‌యం తర్వుట వైఎస్ జగన్ ఢిల్లీ తన పై నమోదైన కేసులన్నీ కుట్రపూరితంగా పెట్టిన‌వేన‌ని.. ఆధారం లేనివే అని అన్నారు. ఢిల్లీలో మీడియాతో మాట్లాడుతూ.. శుక్రవారం కోర్టుకు హాజరవుతారా అని ఓ విలేక‌రి అడిగిన ప్రశ్నకు ఆయన ఆసక్తికరమైన సమాధానం ఇచ్చారు. తనపై పెట్టిన కేసులేవీ నిలబడేవి కాదన్నారు. ఈ కేసులన్నీ వీగిపోతాయని అన్నారాయన. నాన్న రాజ‌శేఖ‌ర‌రెడ్డి కాంగ్రెస్ లో ఉన్నంత కాలం తనపై కేసులేమీ లేవన్నారు. ఆయన చనిపోయిన తర్వాత… తాను పార్టీ పెట్టినప్పటినుంచే.. అటు కాంగ్రెస్ నాయకులు.. అటు టీడీపీ నాయకులు.. తనపై కక్ష కట్టి పిటిషన్లు వేశారన్నారు. పిటిషనర్లంతా కాంగ్రెస్, టీడీపీ నాయకులే అని అన్నారు.

అలాంటి వారు పెట్టిన కేసులు నిలబడవు అన్నారు. నేను అవినీతి చెయ్యలేదని, చెయ్యను అని తెలుసు కాబట్టే తనకు ఇంతటి భారీ విజయం కట్టబెట్టారని.. ప్రజాకోర్టులో నిర్దోషిలా నిరూపించుకున్నానని జగన్ అన్నారు. ఇక ముందు కూడా కోర్టులకు సహకరిస్తానని చెప్పారు. మరో పక్క అమిత్ షా తో భేటీ పై మాట్లాడుతూ, దేశంలో మోదీ అత్యంత శక్తిమంతుడైన వ్యక్తి అని, ఆ తర్వాతి స్థానం బీజేపీ అధ్యక్షుడైన అమిత్‌షాయే అని జగన్‌ పేర్కొన్నారు. అందుకే ఆయనను కూడా మర్యాదపూర్వకంగా, రాష్ట్ర ప్రయోజనాల కోసం కలిశానన్నారు. ఒక రాజకీయ పార్టీ అధ్యక్షుడు, మరో పార్టీ అధ్యక్షుడిని కలవడంలో ఆంతర్యం ఏమిటి అని ప్రశ్నించినప్పుడు ఇలా స్పందించారు. ‘మీరు చెప్పండి... దేశంలో నంబర్‌ 2 పవర్‌ఫుల్‌ వ్యక్తి ఎవరు!’’ అని మీడియాను ప్రశ్నించారు. జగన్ మోహన్ రెడ్డి, బీజేపీ నాయకుడు రాం మాధవ్ ను కూడా కలిసిన సంగతి తెలిసిందే.