news

రాష్ట్ర రవాణా వ్యవస్థలో ఏపీ ప్రభుత్వం కీలక మార్పు తీసుకువచ్చింది. ఏపీ రవాణా వ్యవస్థలో ఇక నుంచి ఒకే రాష్ట్రం....ఒకే కోడ్ విధానం అమలులోకి రానుంది. దీనికి సంబంధించి నోటిఫికేషన్ ఇచ్చామని మంత్రి అచ్చెన్నాయుడు ప్రకటించారు. ఇక నుంచి రాష్ట్రంలో వాహనాలకు ఒకే కోడ్ ఉంటుందని, జిల్లాలకు ప్రత్యేక కోడ్ ఉండదని స్పష్టం చేశారు. ఈ విధానంతో పాత వాహనాలకు ఎలాంటి ఇబ్బంది ఉండదని ఆయన పేర్కొన్నారు. ఇక నుంచి రిజిస్ట్రేషన్‌ చేసుకునే వాహనాలకు రాష్ట్ర వ్యాప్తంగా ఒకే కోడ్ ఉంటుందన్నారు. ఏపీ 39 నంబర్‌తో ఏపీలో కొత్త వాహనాల రిజిస్ట్రేషన్ ఉంటుందని అచ్చెన్నాయుడు పేర్కొన్నారు. రాష్ట్రం మొత్తం ఒకే కోడ్‌తో వాహనాల రిజిస్ట్రేషన్‌ జరుగుతుందని చెప్పారు.

కొత్త విధానంతో రెండున్నర రోజుల్లోనే అంకెల సిరీస్‌ మారిపోతుందని రవాణా శాఖ కమిషనర్‌ బాలసుబ్రమణ్యం చెప్పారు. దీనివల్ల నెలలోనే 15సార్లు కొత్త సిరీస్‌ అంకెలు వస్తాయన్నారు. ఏపీ 39తో కొత్త సిరీస్‌ ప్రారంభిస్తామని, 15 రోజుల్లో ఈ విధానం అమల్లోకి వస్తుందని ఆయన తెలిపారు. మరో పక్క, ఈ రోజు అమరావతిలో ఆదరణ-2 పథకం అమలును మంత్రి సమీక్షించారు. అనంతరం మీడియాతో మాట్లాడుతూ.. చేతివృత్తుల వారికి కోరుకున్న విధంగా అత్యాధునిక పనిముట్లు అందజేస్తున్నట్లు అచ్చెన్నాయుడు తెలిపారు. లబ్ధిదారులకు ప్రస్తుతం పనిముట్లపై 20 శాతం రుణమాఫీ అందజేస్తున్నామని వెల్లడించారు.

చేతివృత్తులు చేపట్టే వ్యక్తులు 10 శాతం కంట్రిబ్యూషన్ చెల్లిస్తే, మిగిలిన 90 శాతం భారాన్ని రాష్ట్ర ప్రభుత్వం సబ్సిడీ కింద భరిస్తుందని పేర్కొన్నారు. ఆదరణ-2 పథకంలో భాగంగా తొలివిడతలో 2 లక్షల మందికి పనిముట్లను అందజేస్తామని మంత్రి తెలిపారు. ఈ పథకం కింద 5 లక్షల మంది దరఖాస్తు చేసుకోగా, నాలుగు లక్షల మంది ముందుకొచ్చారని వెల్లడించారు. వచ్చే నెల 12న ముఖ్యమంత్రి చంద్రబాబు చేతుల మీదుగా ఈ కార్యక్రమాన్ని ప్రారంభిస్తామని వెల్లడించారు. ఆదరణ-2 పథకం రెండో దశను కూడా నవంబర్ లోనే ప్రారంభిస్తామని అచ్చెన్నాయుడు పేర్కొన్నారు.

జాతీయ స్థాయిలో భావసారూప్యం కలిగిన భాజపాయేతర పార్టీలను ఏకం చేసే దిశగా ముఖ్యమంత్రి చంద్రబాబు వేగంగా అడుగులు వేస్తున్నారు. కేంద్రంలోని ఎన్డీయే ప్రభుత్వానికి వ్యతిరేకంగా జాతీయ రాజకీయాల్లో క్రియాశీలక పాత్ర పోషించబోతున్నారు. ఇకపై ఆయన వారంలో రెండు మూడు రోజులు జాతీయ రాజకీయాలకు కేటాయించనున్నారు. భాజపాయేతర పక్షాలను సంఘటితం చేసేందుకు ఇటీవలే దేశ రాజధానిలో పర్యటించిన చంద్రబాబు... గురువారం మరోసారి దిల్లీ వెళుతున్నారు. ఈ నేపధ్యంలో, మహాకూటమి ఏర్పాటు కోసం ఏపీ ముఖ్యమంత్రి చంద్రబాబు కృషి చేస్తున్నారని మాజీ ప్రధాని దేవేగౌడ ప్రశంసించారు. కేంద్రంలో బీజేపీ అధికారంలోకి వచ్చాక దేశ భవిష్యత్తు ప్రశ్నార్థకంగా మారిందని మాజీ ప్రధాని దేవేగౌడ అన్నారు.

బీజేపీని సాగనంపేందుకు విపక్షాలు మహాకూటమిగా ఏర్పడాల్సిన అవసరం ఉందని, మహాకూటమి ఏర్పాటు కోసం ఆంధ్రప్రదేశ్ ముఖ్యమంత్రి చంద్రబాబు కృషి చేస్తున్నారని ప్రశంసించారు. మహా కూటమితో భవిష్యత్‌లో ప్రధాని రాహుల్‌ గాంధీ అయ్యే అవకాశాలు చాలా ఉన్నాయని, రాహుల్‌ ప్రధాని అయ్యేందుకు తాను పూర్తిగా మద్దతు ఇస్తానని మాజీ ప్రధాని, జెడీఎస్‌ పార్టీ వ్యవస్థాపకులు దేవేగౌడ అన్నారు. 130 ఏళ్ల చరిత్ర కల్గిన కాంగ్రెస్‌కు నేడు ఏఐసీసీ అధ్యక్షుడుగా రాహుల్‌ వ్యవహరించడం గర్వకారణమని, అలాగే ఈ మధ్యకాలంలో ఆయన రాజకీయ అనుభవం పొందడం విశేషమన్నారు.

మరో పక్క చంద్రబాబు రేపు ఢిల్లీ పర్యటన నేపధ్యంలో, నిన్న సమాజ్‌వాదీ పార్టీ అధ్యక్షుడు, ఉత్తర్‌ప్రదేశ్‌ మాజీ ముఖ్యమంత్రి అఖిలేష్‌ యాదవ్‌ ఫోన్ చేసారు. చంద్రబాబు కడపలో ఉన్న సమయంలో, ఆయన ఫోన్ చేసారు. ‘‘నిరంకుశ పోకడల నుంచి దేశాన్ని కాపాడాలి. సమాఖ్య స్ఫూర్తికి భాజపా గండి కొడుతోంది. ప్రజాస్వామ్య విలువల్ని మంటగలుపుతోంది. లౌకికవాదం ప్రమాదంలో పడింది. మీ కృషిని ఇదే స్ఫూర్తితో కొనసాగించాలి. జాతీయ స్థాయిలో మీకున్న పరపతితో భాజపాయేతర పార్టీలను ఏకం చేయాలి. మీకు సమాజ్‌వాదీ తరపున పూర్తి సహాయ సహకారాలు అందిస్తాం...’’ అని అఖిలేష్‌ పేర్కొన్నారు.

రఫేల్‌ ఒప్పందం పై రాజకీయ దుమారం రేగిన వేళ ఈ వ్యవహారానికి సంబంధించిన పిటిషన్లపై సుప్రీంకోర్టు నేడు విచారణ చేపట్టింది. రఫేల్‌ ఒప్పందానికి అయిన ఖర్చు, యుద్ధ విమానాల ధర తదితర పూర్తి వివరాలను 10 రోజుల్లోగా సీల్డ్ కవర్‌లో సమర్పించాలని కోర్ట్ చెప్పింది. ఈ ఒప్పందంలో ఆఫ్‌సెట్ భాగస్వాముల వివరాలు కూడా చెప్పాలని సుప్రీం ధర్మాసనం పేర్కొంది. అయితే ఈ వివరాలను బహిర్గతం చేయలేమని కేంద్రం వెల్లడించిన నేపధ్యంలో, సుప్రీం ఆదేశాలతో కేంద్రానికి షాక్ తగిలింది. ‘ఒప్పందం విలువ, యుద్ధ విమానాల ధరకు సంబంధించిన వివరాలను సీల్డ్‌ కవర్‌లో సుప్రీంకోర్టుకు సమర్పించాలి. రానున్న 10 రోజుల్లో ఇది జరగాలి’ అని జస్టిస్‌ రంజన్‌ గొగొయ్‌ నేతృత్వంలోని ధర్మాసనం కేంద్రానికి సూచించింది.

కాగా యుద్ధ విమానాల ధరలను రహస్యంగా ఉంచాల్సినందున వీటిని వెల్లడించడం సాధ్యం కాదంటూ అటార్నీ జనరల్ కేకే వేణుగోపాలన్ కోర్టుకు నివేదించారు. దీంతో రాఫెల్ ధరల వివరాలు రహస్యమనీ, వాటిని వెల్లడించడం కుదరదంటూ అఫిడవిట్ దాఖలు చేయాలని కేంద్రానికి కోర్టు సూచించింది. తాము సాంకేతిక వివరాలు వెల్లడించాలని కోరడం లేదనీ.. బహిర్గతం చేయకూడని కీలక సమాచారం ఏదైనా ఉంటే కేంద్రం గోప్యంగా ఉంచవచ్చునని వివరణ ఇచ్చింది. న్యాయవాదులు మనోహర్ లాల్ శర్మ, వినీత్ ధండా దాఖలు చేసిన రెండు ప్రజా ప్రయోజన వ్యాజ్యాల (పిల్)‌పై భారత ప్రధాన న్యాయమూర్తి రంజన్ గొగోయ్ నేతృత్వంలోని ధర్మాసనం విచారణ జరుపుతోంది.

రఫేల్ ఒప్పందంలో భారీ కుంభకోణం దాగిఉందని గత కొన్ని రోజులుగా ప్రతిపక్ష కాంగ్రెస్‌ ఆరోపణలు చేస్తున్న విషయం తెలిసిందే. ఈ నేపథ్యంలో రఫేల్‌ ఒప్పందం కోసం అనిల్‌ అంబానీకి చెందిన రిలయన్స్‌ డిఫెన్స్‌ను భారత ప్రభుత్వమే ప్రతిపాదించిందని ఫ్రాన్స్‌ మాజీ అధ్యక్షుడు హోలన్‌ చేసిన వ్యాఖ్యలు రాజకీయ దుమారానికి దారితీశాయి. రఫేల్ ఒప్పందం వివాదం తీవ్ర రూపం దాల్చడంతో దీనిపై దర్యాప్తు చేపట్టాలని కోరుతూ సుప్రీంకోర్టులో పలు పిటిషన్లు దాఖలయ్యాయి. వీటిపై నేడు విచారణ చేపట్టిన న్యాయస్థానం పైవిధంగా ఆదేశాలు జారీ చేసింది. మరోవైపు రాఫెల్ ఒప్పందంపై సీబీఐ విచారణ జరిపించాలంటూ పిటిషనర్ ధర్మాసనాన్ని కోరారు. అయితే ప్రస్తుతం సీబీఐలోనే పరిస్థితులు గందరగోళంగా ఉన్నాయనీ, అవన్నీ చక్కబడిన తర్వాత దీనిని పరిశీలించవచ్చునని కోర్టు పేర్కొంది.