news

బీజేపీ నాయకులు బెదిరించినట్టుగానే, తెలుగుదేశం పార్టీ నేతల పై ఐటి దాడులు మొదలయ్యాయి. మొన్న మొన్న విజయవాడ వచ్చి, నాయకుల పై దాడులు చేద్దాం అని ప్లాన్ చేసినా, అది లీక్ కావటంతో, తెలుగుదేశం సానుకూల వ్యాపారస్తుల పై దాడులు చేసారు. అయితే ఇప్పుడు డైరెక్ట్ గా తెలుగుదేశం ఎంపీ సియుం రమేష్ పై పడ్డారు. మొన్న కడప ఉక్కు ఫ్యాక్టరీ కోసం ఆమరణ దీక్ష చేస్తున్న సందర్భంలోనే, నీ అంతు చుస్తామంటూ బీజేపీ నాయకులు బెదిరించిన సంగతి తెలిసిందే. ఈ నేపధ్యంలోనే సియం రమేష్ పై దాడులు ప్రారంభించి, భయబ్రాంతులకు గురి చేసే ప్రయత్నం చేస్తున్నారు. ఏకకాలంలో హైదరాబాద్, కడప జిల్లాలో ప్రారంభమైన ఈ దాడుల్లో 60 మంది ఐటీ అధికారులు పాల్గొన్నారు.

సీఎం రమేష్‌ నివాసాలు, వ్యాపార సంస్థల్లో ఐటీ సోదాలు కొనసాగుతున్నాయి. హైదరాబాద్‌లోని సీఎం రమేష్‌ నివాసం, ఆఫీసుల్లో తనిఖీలు జరుగుతున్నాయి. కడప జిల్లా పోట్లదుర్తిలోని సీఎం రమేష్‌ నివాసంలోనూ సోదాలు చేస్తున్నారు. ఎంపీ సోదరుడి నివాసంలోనూ సోదాలు సాగుతున్నాయి. సీఎం రమేష్ ప్రస్తుతం ఢిల్లీలో ఉన్నారు. కేంద్ర పీఏసీ సభ్యుడిగా ఉన్న సీఎం రమేష్‌ ఢిల్లీలో జరిగిన పీఏసీ సమావేశంలో... దేశంలో ఐటీ దాడులు ఎక్కడ, ఎందుకు చేస్తున్నారు, ఏపీలో దాడుల వివరాలు ఇవ్వాలంటూ ఐటీకి ఆయన నోటీసులు జారీ చేశారు.

నోటీసులు జారీ చేసిన మూడు రోజుల్లోనే రమేష్‌ ఆస్తులపై దాడులు జరుగుతున్నాయి. మరోవైపు కడప ఉక్కు పరిశ్రమ కోసం ఆమరణ నిరాహార దీక్ష చేసి నేటికి వందో రోజు పూర్తైన సందర్భంగా టీడీపీ ఎంపీలు కేంద్ర ఉక్కు శాఖ మంత్రితో భేటీ అవ్వాలని నిర్ణయించారు. కడప ఉక్కు పరిశ్రమ ఏర్పాటుపై స్పష్టత ఇవ్వాలని కేంద్రమంత్రిని ఎంపీలు కోరనున్నారు. ఇందుకోసం ఎంపీల బృందం ఢిల్లీకి చేరుకుంది. కడప ఉక్కు పరిశ్రమపై ప్రశ్నిస్తున్నందుకే సీఎం రమేష్ ఇంట్లో ఐటీ సోదాలు చేపట్టిందని టీడీపీ నేతలు ఆగ్రహం వ్యక్తం చేశారు.

ఆంధ్రపదేశ్ ముఖ్యమంత్రి చంద్రబాబుకు ప్రధాని నరేంద్ర మోదీ ఫోన్ చేశారు. తితలీ తుపాన్‌‌ ప్రభావంపై ఆరా తీశారు. తాజా పరిస్థితిని అడిగి తెలుసుకున్నారు మోదీ. కాగా సీఎం చంద్రబాబుఅమరావతి నుంచి శ్రీకాకుళం వెళ్లారు. తొలుత విశాఖకు చేరుకున్న ఆయన అక్కడి నుంచి రోడ్డుమార్గాన శ్రీకాకుళానికి చేరుకున్నారు. శుక్రవారం శ్రీకాకుళం జిల్లా వాసులను పరామర్శించనున్నారు. సహాయ, పునరావాస చర్యలను పర్యవేక్షించనున్నారు. సీఎంతో పాటు మంత్రులు నారాయణ, పితాని సత్యనారాయణ శ్రీకాకుళం చేరుకున్నారు. శ్రీకాకుళం, విజయనగరం జిల్లాల్లో తితలీ తుపాను బీభత్సం సృష్టించింది.

బుధవారం రాత్రి నుంచి గురువారం సాయంత్రం దాకా శ్రీకాకుళం జిల్లావాసులు ఊపిరి బిగబట్టుకొని గడిపారు. తుఫాను మిగిల్చిన బీభత్స ఛాయలు ఉద్దానంలో అడుగడుగునా కనిపించాయి. ఉద్దానంలో లక్షల ఎకరాల్లో కొబ్బరి చెట్లు సాగుచేశారు. పెను గాలులు, భారీ వర్షాలకు ఒక్కో ఎకరానికి 30శాతం చెట్లు నేలకూలి ఉంటాయని అంచనా. ఊపేసిన గాలులకు ఈ జిల్లాలో లక్షలాది చెట్లు, వేలాది విద్యుత్‌ స్తంభాలు నేలకొరిగాయి. మొత్తం 12 మండలాల్లో తుఫాను గాలుల తీవ్రతకు పెను విధ్వంసం చోటుచేసుకుంది. కొబ్బరితోటలు లక్షలాది ఎకరాల్లో ధ్వంసం అయ్యాయి. 15వేలు దాకా విద్యుత్‌ స్తంభాలు పడిపోయాయి.

పలాస, సోంపేట తదితర మండలాల్లో ట్రాన్స్‌ఫార్మర్లు ఎగిరిపడ్డాయి. వాగులు, వంకలు పొంగిపొర్లి పంట పొలాలు ముంపునకు గురయ్యాయి. అధికారులు, సహాయక బృందాలు సైతం తుఫాను తీవ్రత, గాలులకు భయపడి సాయంత్రం దాకా అడుగు బయటకు వేయలేకపోయారు. శ్రీకాకుళం జిల్లాలో జాతీయరహదారి రూపురేఖలు కోల్పోయింది. నరసన్నపేట దాటాక ఇచ్ఛాపురం వరకు హైవేపై వేలాది చెట్లు పూర్తిగా నేలకొరిగాయి. పలాసకు దగ్గరలోని కృష్ణాపురం టోల్‌గేట్‌ నేలమట్టమైంది. హైవే వెంబడి పదుల సంఖ్యలో ఉన్న పెట్రోల్‌ బంకుల పై కప్పులు ఎగిరిపోయాయి. హైవే పక్కన ఉన్న దాబాలు, హోటళ్లు దెబ్బతిన్నాయి. చెన్నై-కోల్‌కతా హైవేను ఆనుకుని ఉన్న పలుగెడ్డలు రోడ్డుపైకి పొంగిపొర్లడంతో ఆ దారిలో కొన్నిగంటలపాటు రాకపోకలు నిలిచిపోయాయి. బొప్పాయిపురం వద్ద హైవేపై 15 కిలోమీటర్ల మేర వాహనాలు బారులు తీరాయి.

తితలీ తుఫాను పై బుధవారం రాత్రి 10 గంటలకు మొదలైన చంద్రబాబు సమీక్షలు, ఇప్పటికీ కొనసాగుతూనే ఉన్నాయి. నిన్న రాత్రి శ్రీకాకుళం చేరుకున్న చంద్రబాబు, ఈ రోజు ఫీల్డ్ లో దిగనున్నారు. తితలీ తుఫానుతో దెబ్బతిన్న ఉత్తరాంధ్ర సాధారణ స్థితికి వచ్చేదాకా ప్రభుత్వ యంత్రాంగం మొత్తం అక్కడే ఉంటుందని ముఖ్యమంత్రి చంద్రబాబు స్పష్టం చేశారు. అన్ని శాఖల కార్యదర్శులు శ్రీకాకుళం రావాలని ఆదేశించారు. తీవ్రంగా దెబ్బతిన్న ప్రాంతాలు కోలుకునేదాకా ఉన్నతాధికారులంతా అక్కడే ఉండాలన్నారు. పంటలకు జరిగిన నష్టం, వాటి పరిస్థితిని సమీక్షించేందుకు వ్యవసాయ శాస్త్రవేత్తలను పిలిపించాలన్నారు. బుధవారం రాత్రి నుంచి యంత్రాంగాన్ని అప్రమత్తం చేసిన సీఎం.. గురువారం రాత్రి విశాఖ నుంచి రోడ్డుమార్గం గుండా శ్రీకాకుళం చేరుకున్నారు.

జిల్లా మంత్రులు, ఎమ్మెల్యేలు, ఉన్నతాధికారులు, జిల్లా అధికారులతో కలెక్టరేట్‌ సమావేశ మందిరంలో సమీక్ష నిర్వహించారు. మత్స్యకారులకు 50కేజీల చొప్పున, ముంపు గ్రామాల్లో 25 కేజీల చొప్పున బాధితులకు తక్షణం బియ్యం అందిస్తామని తెలిపారు. పార్టీ యంత్రాంగం, ప్రజలు కూడా సహాయ చర్యల్లో పాల్గొనాలని ముఖ్యమంత్రి పిలుపునిచ్చారు. ఆర్‌ అండ్‌ బీకి చెందిన 22 రహదారులను శుక్రవారంనాటికే బాగుచేయాలన్నారు. విద్యుత్తు సరఫరాను త్వరితగతిన పునరుద్ధరించాలని ఆదేశించారు. వంశధార ఫేజ్‌-2 రిజర్వాయర్‌లోకి వరద నీటిని మళ్లించాలన్నారు. ముందస్తు చర్యల ద్వారా ప్రాణనష్టం తగ్గించగలిగామంటూ... జిల్లా యంత్రాంగాన్ని అభినందించారు. తుపాను నష్టానికి సంబంధించి చిత్రాలను సీఎం చూశారు. మరణించిన వారికి నష్టపరిహారం తక్షణమే అందించాలని అధికారుకు ఆదేశించారు.

బుధవారం రాత్రి నుంచి గురువారం ఉదయం వరకు సమీక్షించారు. ఆర్టీజీఎస్‌ నుంచి వచ్చే సమాచారం ఆధారంగా ఉన్నతాధికారులతో మాట్లాడారు. ఎట్టి పరిస్థితుల్లోనూ ఆస్తి, ప్రాణ నష్టం జరగకుండా చూడాలని ఆదేశించారు. ముఖ్యమంత్రి స్థాయిలోని వ్యక్తే నిద్ర మానుకుని అరగంటకోసారి పర్యవేక్షిస్తుండటంతో కిందిస్థాయి సిబ్బంది చురుగ్గా వ్యవహరించారు. అనంతపురం జిల్లా పర్యటనకు వెళ్లిన చంద్రబాబు బుధవారం సాయంత్రానికి తిరిగి వచ్చారు. 6 గంటలకు కలెక్టర్లు, ఉన్నతాధికారులతో మాట్లాడారు. విపత్తు నిర్వహణ, వాతావరణ, జలవనరులశాఖ అధికారులకు పలు సూచనలు చేశారు. బాధితులను పునరావాస కేంద్రాలకు తరలించి ఆహారం, తాగునీరు అందించాలని స్పష్టం చేశారు. అమలు తీరుపై మరోమారు ఆరా తీశారు. తీరం దాటిన సమయంలో తెల్లవారుజామున 4 గంటలకు సీఎం ఇంకోసారి అధికారులతో మాట్లాడారు. గురువారం ఉదయం 10.25 గంటలకు కలెక్టర్లు, ప్రజాప్రతినిధులతో ముఖ్యమంత్రి మాట్లాడారు. ఇక నుంచి ప్రతి గంటా మనకు ముఖ్యమేనని స్పష్టం చేశారు. సహాయ పునరావాస చర్యలే కీలకమని చెప్పారు.