news

ఆంధ్రప్రదేశ్ రాష్ట్ర ఎన్నికల కమీషనర్ నిమ్మగడ్డ రమేష్ కుమార్, ఎవరినీ వదలటం లేదు. తెలుగుదేశం పార్టీకి షాక్ ఇస్తూ, రాష్ట్ర ఎన్నికల కమీషనర్ కొద్ది సేపటి క్రిందట, ఆదేశాలు ఇస్తూ, టిడిపికి షాక్ ఇచ్చింది. పంచాయతీ ఎన్నికల మొదటి విడత నామినేషన్ రాగానే, తెలుగుదేశం పార్టీ అధినేత చంద్రబాబు నాయుడు ప్రెస్ మీట్ పెట్టారు. ఈ సందర్భంగా తెలుగుదేశం పార్టీ బలపరిచిన అభ్యర్ధులను గెలిపించాలని కోరారు. దీని కోసం టిడిపి తరుపున పంచసూత్రాల పేరుతో ఒక మ్యానిఫెస్టో విడుదల చేసారు. పంచాయతీ ఎన్నికలు పార్టీ రహిత ఎన్నికలు అయినా, వెనుక ఉండేది పార్టీలే అని, అందుకే తమ పార్టీ బలపరిచిన అభ్యర్ధుల తరుపున ఎన్నికల మ్యానిఫెస్టో విడుదల చేస్తున్నట్టు చెప్పారు. అయితే దీని పై వైఎస్ఆర్ కాంగ్రెస్ పార్టీ అభ్యంతరం తెలిపింది. పార్టీ రహితంగా జరిగే ఎన్నికలకు, పార్టీ తరుపున మ్యానిఫెస్టో ఎలా విడుదల చేస్తారు అంటూ, వైసిపీ నేత లేళ్ల అప్పిరెడ్డి రాష్ట్ర ఎన్నికల కమిషన్ కు ఫిర్యాదు చేసారు. ఫిర్యాదు స్వీకరించిన రాష్ట్ర ఎన్నికల కమిషన్, తెలుగుదేశం పార్టీ ప్రధాన కార్యదర్శి మద్దిపాటి వెంకటరాజుకు నోటీసులు పంపించారు. వైసీపీ ఫిర్యాదు పై వివరణ ఇవ్వాలని కోరారు. ఫిబ్రవరి 2 లోపు వివరణ ఇవ్వాలని కోరారు. రాష్ట్ర ఎన్నికల కమిషన్ ఆదేశాలు ప్రకారం, తెలుగుదేశం పార్టీ వివరణ ఇచ్చింది.

ఆ పార్టీ ప్రధాన కార్యదర్శి మద్దిపాటి వెంకటరాజు, ఎస్ఈసి నోటీస్ కు వివరణ ఇచ్చారు. వివరణలో వివిధ చట్టాలు, పంచాయతీ రాజ్ ఆక్ట్, సుప్రీం కోర్టు ఇచ్చిన కొన్ని తీర్పులు ఇలా అన్నీ ఉదహరించి, మ్యానిఫెస్టో విడుదల తప్పు కాదని, దీని పై వైసీపీ ఇచ్చిన ఫిర్యాదు పట్టించుకోవద్దని కోరారు. అయితే టిడిపి వివరణ మొత్తం చుసిన రాష్ట్ర ఎన్నికల కమీషనర్, సంతృప్తి చెందలేదు. టిడిపి వివరణ సంతృప్తికరంగా లేదని తెలిపారు. అందుకే తెలుగుదేశం పార్టీ రిలీజ్ చేసిన మ్యానిఫెస్టోని వెంటనే ఆపేయాలని కోరారు. ఇప్పటికే జిల్లాలకు పంపిస్తే వాటిని వెనక్కు రప్పించాలని కోరారు. ఇక మీదట మ్యానిఫెస్టో బయటకు వెళ్ళటానికి వీలు లేదని తెలిపారు. పార్టీ రహితంగా జరిగే ఎన్నికలకు, ఒక పార్టీ మ్యానిఫెస్టో విడుదల చేయ కూడదు అని, అందుకే వెంటనే మ్యానిఫెస్టోని వెనక్కు తీసుకోవాలని తెలుగుదేశం పార్టీని ఆదేశించారు. మరి దీని పై తెలుగుదేశం పార్టీ ఎలా స్పందిస్తుందో చూడాలి. అలాగే వైఎస్ఆర్ కాంగ్రెస్ పార్టీ, ఈసీ చర్యలు పై సంతృప్తి చెందుతుందో లేదో చూడాలి.

ఆంధ్రప్రదేశ్ రాష్ట్రంలో స్థానిక సంస్థల ఎన్నికలు అడ్డుకోవటానికి జగన్ ప్రభుత్వం చేసిన పనులు అన్నీ ఇన్నీ కావు. సహజంగా అధికారంలో ఉన్న పార్టీ, స్థానిక ఎన్నికలు అంటే ఉరకలు వేస్తుంది, ప్రతిపక్ష పార్టీలు తటపటాయిస్తాయి. మన రాష్ట్రంలో మాత్రం, అధికార పక్షం స్థానిక సంస్థల ఎన్నికలు అంటేనే భయపడి పోతుంది. ఇవి జరగకుండా ఉండటానికి మొదట, చరిత్రలో ఎక్కడా లేనిది ఏకంగా ఎన్నికల కమీషనర్ ని కూడా తప్పించారు. తరువాత ఉద్యోగులకు క-రో-నా వస్తుందని, ఎన్నికలకు మేము దూరం అన్నారు. తరువాత ప్రజలకు క-రో-నా వస్తుందని అన్నారు. ఆ తరువాత క-రో-నా తగ్గిపోయింది కదా అంటే, క-రో-నా వ్యాక్సిన్ అని సాకులు చెప్పారు. చివరకు ఏ వాదనా కోర్టుల్లో నిలవలేదు. హైకోర్టు, సుప్రీం కోర్టు కూడా ఎన్నికలు జరపాల్సిందే అని తేల్చాయి. అయితే ఎన్నికల నోటిఫికేషన్, నామినేషన్లు మొదలు అయిన తరువాత కూడా, మరో ప్రయత్నం ఎన్నికలు ఆపటానికి హైకోర్టుకు వెళ్లారు. 2019 ఎన్నికల జాబితా ప్రకారం, రాష్ట్రంలో పంచాయతీ ఎన్నికలు నిర్వహించటం సమంజసం కాదని, దీని వల్ల 2019 ఎన్నికల ఓటర్ల జాబితా తరువాత, కొత్తగా ఎన్రోల్ అయిన కొత్త ఓటర్లు ఓటు హక్కు కోల్పోతున్నారని, 2021 ఓటర్ జాబితా పరిగణలోకి తీసుకోవాలి అంటూ, దాఖలైన ఒక హౌస్ మోషన్ పిటీషన్, ప్రజా ప్రయోజన వ్యాజ్యం పై, హైకోర్టు తీర్పు చెప్పింది.

ఈ రెండు పిటీషన్ ల పై కూడా తీర్పు చెప్పింది. 2021 ఓటర్ల జాబితాను తమకు అందించాలని పలు మార్లు రాష్ట్ర ఎన్నికల కమిషన్, రాష్ట్ర ప్రభుత్వాన్ని విజ్ఞప్తి చేసినప్పిటికీ, ప్రభుత్వం వైపు నుంచి స్పందన కనిపించలేదని, అందువల్ల అందుబాటులో ఉన్న 2019 ఎన్నికల జాబితాను తాము పరిగణలోకి తీసుకున్నామని, ఎన్నికల కమిషన్ వాదించింది. పైగా ఒకసారి ఎన్నికల ప్రక్రియ మొదలు అయిన తరువాత, ఆ ఎన్నికల్లో ప్రభుత్వాలు జోక్యం చేసుకోరాదని, సుప్రీం కోర్టు పలు మార్లు ఇచ్చిన తీర్పును కూడా హైకోర్టు ముందు ప్రస్తావించారు. ఇక 2021 ఎన్నికల జాబితా కావాలని తాము రాసిన లేఖలు, ప్రభుత్వం వైపు నుంచి వచ్చిన స్పందన, అదే విధంగా రాష్ట్ర ప్రభుత్వం ఇచ్చిన అఫిడవిట్ కూడా హైకోర్టు కి ఇచ్చారు. అయితే పిటీషనర్ అసలు ఓటు హక్కు కూడా అప్లై చేయలేదని, కోర్టు దృష్టికి తెచ్చారు. అయితే ప్రభుత్వ వాదనను, పిటీషనర్ వాదనను కోర్టు పరిగణలోకి తీసుకోకుండా, ఈ రెండు పిటీషన్ లు డిస్మిస్ చేసారు. అయితే ఈ తీర్పు పై స్పందించిన ఎలక్షన్ కమీషనర్ నిమ్మగడ్డ రమేష్ కుమార్, ఇక ఎన్నికలు ఎవరూ ఆపలేరని, చివరి ప్రయత్నం కూడా అయిపోయిందని అన్నారు.

విశాఖపట్నం స్టీల్ ప్లాంట్ (VSP)-రాష్ట్రీయ ఇస్పాట్ నిగం లిమిటెడ్ (RINL) ప్రైవేటీకరణ పై కేంద్ర కాబినెట్ తీసుకున్న నిర్ణయంపై తమ వ్యతిరేకతను తెలియజేస్తూ కేంద్ర ఆర్థిక శాఖ మంత్రి నిర్మలా సీతారామన్ గారికి శ్రీకాకుళం MP రామ్ మోహన్ నాయుడు గారు లేఖ ద్వారా అభ్యర్ధించారు. విశాఖ స్టీల్ ప్లాంట్ యావత్‌ దేశంలో ప్రసిద్ధమైనది, భారతీయులంతా గర్వించే భారీ పరిశ్రమ, దీనిని ప్రైవేటు సంస్థలకు అమ్మడం సరికాదని తెలుపుతూ, ఈ నిర్ణయాన్ని వెనక్కి తీసుకోవాలని డిమాండ్ చేశారు. 1966 తరవాత దశాబ్దకాలం పాటు "విశాఖ ఉక్కు–ఆంధ్రుల హక్కు" నినాదంతో తెలుగు ప్రజలు సుదీర్ఘ పోరాటం చేసారు. వేలాది విద్యార్థులు తమ విలువైన విద్యా సంవత్సరాన్ని కోల్పోయి, 32 మంది తమ ప్రాణాలను అర్పించి సాధించుకున్న హక్కు ఇది. VSPను నిర్మించడానికి 64 గ్రామాల ప్రజలు వారి ఇళ్లను ఖాళీ చేసి, 22,000 ఎకరాల భూమిని తాగ్యం చేశారని పేర్కొన్నారు. కేవలం కొంత కాలంగా నష్టాలను చవిచూసిందన్న సాకుతో కేంద్రం ఈ నిర్ణయం తీసుకోవడం ఉచితం కాదని లేఖలో రాశారు. సొంత గనులు లేకపోవడం వల్ల, సుదూర ప్రాంతాల నుంచి ముడి సరుకులు తెచ్చుకోవడం వల్ల ఉత్పత్తి వ్యయం పెరిగిందని, కర్మాగార విస్తరణ పనులకు ఇటీవల చేసిన అప్పుల కారణంగా వడ్డీ భారం పెరగడం వంటి కారణాలు కూడా నష్టాలకు కారణమేనన్నారు. దేశవ్యాప్తంగా డిమాండ్‌ లేకపోవడం వలన ఆశించిన అమ్మకాలు జరగడం లేదని, దేశంలోని మిగితా స్టీల్ ప్లాంట్లది కూడా ఇదే పరిస్థితన్నారు. అన్ని SAIL యూనిట్లలో ప్రభుత్వ పెట్టుబడి ఈక్విటీ రూపంలో వుంటే VSPలో మాత్రం పెద్ద మొత్తాన్ని లోన్ మరియు ప్రిఫరెన్షియల్ షేర్లుగా ఇచ్చారు, దీని కారణంగా RINL / VSP ఉత్పత్తి ప్రారంభించే సమయానికే నష్టాల్లో వుంది.

SAIL మరియు TISCO ఆధ్వర్యంలో వున్న ఇతర ఉక్కు కర్మాగారాలకు క్యాప్టివ్ ఇనుప ఖనిజ గనులు కేటాయించబడ్డాయి కానీ VSP/RINLకు మాత్రం ఇప్పటివరకు క్యాప్టివ్ ఇనుప ఖనిజ గనులు లేవు. కేవలం ఇనుప ఖనిజం సేకరణపైనే సంవత్సరానికి దాదాపు రూ. 800-1000 కోట్లు ఖర్చవడం వలన VSP లాభాలు తగ్గాయని, మన రాష్ట్రంలో వున్న పరిశ్రమలకు ఎందుకు ఈ సవతి తల్లి ప్రేమను చూపించారని విమర్శించారు. తాను రాసిన అభ్యర్థన గురించి విలేఖరులతో మాట్లాడుతూ, విశాఖ ఉక్కులో 17 వేల మంది పర్మనెంట్‌ ఉద్యోగులతో పాటు మరో 15 వేల మంది కాంట్రాక్టు కార్మికులు పనిచేస్తున్నారని, ప్రైవేటీకరణ వల్ల వీరి ఉద్యోగాలకు, వీరి కుటుంబాల భవిష్యత్తుకు తీరని నష్టం కలుగుతుందని తెలిపారు. 2000ల సంవత్సరంలో వారి తండ్రి, అప్పటి శ్రీకాకుళం MP శ్రీ ఎర్రన్నాయుడు గారు కూడా VSP ప్రైవేటీకరణను పార్లమెంటులో గట్టిగా అడ్డుకున్నారని చెప్పారు. అదే స్ఫూర్తితో ఇప్పుడు తాను కూడా ఉత్తరాంధ్ర ప్రజల హక్కైన స్టీల్ ప్లాంట్ కోసం వెనక్కి తగ్గకుండా పోరాడతానన్నారు. 1990 మధ్యలో VSP నష్టాల్లో పేరుకుపోయి, ఇక పారిశ్రామిక ఆర్ధిక పునర్నిర్మాణ బోర్డు (BIFR) జోక్యం చేసుకోబోయే సమయంలో అప్పటి ప్రధాన మంత్రి శ్రీ ఎ. బి. వాజ్‌పేయి VSP ఆర్థిక స్థితిని పునరుద్ధరించడానికి వ్యక్తిగత ఆసక్తిని తీసుకున్నారు.

VSP రుణాలను ఈక్విటీ మరియు ప్రిఫరెన్షియల్ షేర్లుగా మార్చారు. అప్ప్పటి కేంద్ర ప్రభుత్వం ఇచ్చిన మద్దతుతో, VSP కార్మికుల కృషితో, RINL / VSP తిరిగి లాభాలను ఆర్జించడం ప్రారంభించిందని తెలిపారు. వాజ్‌పేయి గారి ప్రభుత్వాన్ని ఆదర్శనంగా తీసుకొని, VSPను మళ్ళీ లాభాల బాటలో నడిపించాలని కోరారు. ఇంత జరుగుతాన్నా రాష్ట్ర ప్రభుత్వం నోరు మెదపకుండా ఉండటం వారి చేతకానితనానికి నిదర్శనమని విమర్శించారు. ఆంధ్ర ప్రజలకు భారీ నష్టం జరుగుతూన్నా, 28 MPలు వున్న ఈ ప్రభుత్వం ఎందుకు అడ్డుకోవడంలేదని ఘాటుగా ప్రశ్నంచారు. విశాఖ స్టీల్ ప్లాంట్ ఆంధ్రుల ఆత్మగౌరవానికి ప్రతీక. దశాబ్దాల వైభవానికి గుర్తుగా, నవరత్న హోదాతో వున్న గొప్ప పరిశ్రమ నష్టాల్లోకి రావడానికి గల కారణాలను ఆన్వేషించాలి, లాభాల్లోకి తేవడానికి మార్గాలను సూచించాలి కానీ విక్రయించకూడదని . విశాఖ ఉక్కును ఆంధ్రుల ఎంతకైనా తెగించి కాపాడుకుంటారని అన్నారు. స్టీల్ ప్లాంట్ ఎట్టి పరిస్థితిల్లోనూ ప్రభుత్వ రంగ పరిశ్రమ గానే కొనసాగాలని, లేని పక్షంలో తాము ఎటువంటి పోరాటానికైనా సిధ్ధమని హెచ్చరించారు.