news

వైఎస్ జగన్మోహన్‌రెడ్డి మంత్రి వర్గ ఏర్పాటుపై కీలక నిర్ణయం తీసుకున్నారు. ఐదుగురుకి డిప్యూటీ సీఎంలుగా అవకాశం కల్పించనున్నట్లు ప్రకటించారు. కాపు, బీసీ, ఎస్సీ, ఎస్టీ, మైనార్టీ వర్గాలకు చెందిన ఐదుగురు డిప్యూటీ సీఎంలుగా జగన్ ప్రభుత్వంలో బాధ్యతలు స్వీకరించనున్నారు. ఇక మరో 20 మందికి మంత్రులతో సీఎం జగన్ కేబినెట్‌ను ఏర్పాటు చేయనున్నారు. ఐదుగురు డిప్యూటీ సీఎంలతో కలిపి మొత్తం 25మంది మంత్రులతో జగన్ ప్రభుత్వం పరిపాలన సాగించనుంది. అయితే.. తాడేపల్లిలో శుక్రవారం వైసీపీ ఎమ్మెల్యేలు, ఎమ్మెల్సీలతో జగన్ సమావేశం నిర్వహించారు. పాలనపై దిశానిర్దేశం చేశారు. మంత్రి వర్గ ఏర్పాటుకు సంబంధించి అన్ని విషయాలు చెప్పిన జగన్.. ఎవరు మంత్రులనే విషయంలో మాత్రం స్పష్టత ఇవ్వలేదు.

మంత్రులుగా ఖరారైన వారికి సాయంత్రం ఫోన్ కాల్ వస్తుందని, అప్పటి వరకూ వేచి ఉండాలని జగన్ చెప్పారు. దీంతో ఆశావహులంతా ఫోన్ కాల్ కోసం ఎదురుచూస్తున్న పరిస్థితి నెలకొంది. విజయసాయిరెడ్డి ఫోన్ చేసి ప్రమాణ స్వీకారానికి సిద్ధం కావాలని చెప్పనున్నట్లు తెలిసింది. అయితే.. మంత్రుల జాబితాను ప్రకటించడంలో సీఎం జగన్ ఇంత గోప్యత పాటించడం ప్రస్తుతం హాట్ టాపిక్‌గా మారింది. అసంతృప్తుల విషయంలో ఆందోళన చెందే ఈ నిర్ణయం తీసుకున్నారా అన్న చర్చ సాగుతోంది. పైగా.. రెండున్నరేళ్ల తర్వాత కొత్త వారికి అవకాశం కల్పిస్తామని చెప్పిన జగన్ ఇంత రహస్యంగా మంత్రివర్గాన్ని ప్రకటించాల్సిన అవసరం ఏంటో అంతుచిక్కని పరిస్థితి నెలకొంది.

ఇదిలా ఉంటే.. కేబినెట్‌లో సగం మంది ఎస్సీ, ఎస్టీ, బీసీ, మైనార్టీలే ఉంటారని జగన్ ప్రకటించడంతో ఎవరెవరికి అవకాశం వస్తుంది..? ఇవాళ సాయంత్రం ఫోన్లు ఎవరెవరికి వస్తాయా..? అనేదానిపై సర్వ్రతా ఉత్కంఠ నెలకొంది. మరోవైపు.. రెండున్నరేళ్ల తర్వాత మళ్లీ మార్పులు చేర్పులు జరుగుతాయని చెప్పడంతో కచ్చితంగా ముఖ్యనేతలందరికీ అవకాశం వస్తుందని భావిస్తున్నారు. జగన్మోహన్ రెడ్డి శనివారం ఉదయం 8.39నిమిషాలకు ఆంధ్రప్రదేశ్ సచివాలయంలో తొలిసారిగా అడుగుపెట్టబోతున్నారు. సెక్రటేరియట్‌ మొదటి బ్లాక్‌లో సీఎం జగన్‌ కార్యాలయం ఉంది. శనివారం ఉదయమే కొత్త మంత్రులు ప్రమాణం స్వీకారం చేయనున్నారు.

ముఖ్యమంత్రి యువనేస్తం పథకం కింద అందిస్తున్న నిరుద్యోగ భృతి నిరుద్యోగులకు ఇంకా అందలేదు. ప్రతి నెలా 1,2 తేదీల్లోపు నిరుద్యోగుల ఖాతాలో జమ అయ్యేవి. ఈ నెల 6వ తేది వచ్చిన ఇంతవరకు ఒక్కరి ఖాతాలో కూడా పడలేదు. టిడిపి ప్రభుత్వం గత ఎన్నికల్లో ఇచ్చిన హామీ మేరకు గత ఏడాది అక్టోబరు 2వతేదీన గాంధీ జయంతి రోజున టీడీపీ ప్రభుత్వం యువనేస్తం పథకాన్ని ప్రారంభించింది. డిగ్రీ పూర్తి చేసి ఖాళీగా ఉన్న 22 నుంచి 35 సంవత్సరాల యువతీ, యువకులను ఈ పథకానికి ఎంపిక చేశారు. అర్హులైన వారికి నెలకు రూ.1000 చొప్పున వారి బ్యాంకు ఖాతాలకు జమ చేస్తుండేది. ఇప్పటివరకు ఏడు నెలలకు సంబంధించి ప్రతి లబ్ధిదారుడూ వెయ్యి రూపాయల చొప్పున అందుకున్నారు.

సార్వత్రిక ఎన్నికల ముందు నిరుద్యోగ భృతిని రూ.1000 నుంచి రూ.2000 పెంచుతున్నట్లు అప్పటి ముఖ్యమంత్రి నారా చంద్రబాబు నాయడు ప్రకటించారు. అప్పటికి రాష్ట్రంలోని ఏడు జిల్లాల్లో ఎంఎల్‌సీ ఎన్నికలు కోడ్‌ రావడంతో ఈ పెంచిన నిధులు నిలిచిపోయాయి. దీంతో కేవలం వెయ్యి రూపాయలు మాత్రమే జమ అవుతూ వస్తోంది. సుమారు 5 లక్షల మంది నిరుద్యోగ యువతకు యువనేస్తం పథకం కింద నిరుద్యోగ భృతి మంజూరయ్యేది. ఈ పథకానికి చాలా మంది దరఖాస్తు చేసుకున్నప్పటికీ వివిధ కారణాల ఆ దరఖాస్తులు ఆన్‌లైన్‌లో ఆమోదం పొందలేదు. అభ్యర్థి ప్రైవేటు ఉద్యోగి అయి ఉన్నా.. ఆస్తులు ఉన్నా.. వయసు ఎక్కువున్నా భృతి మంజూరుకాలేదు. అనేకసార్లు గ్రీవెన్స్‌లో మొర పెట్టుకున్నా వారి సమస్య పరిష్కారం కాలేదు. చివరికి 1100కు ఫోన్‌ చేసి ఫిర్యాదు చేసినా అందలేదు.

ప్రతి నెలా రెండో తేదీ వస్తే చాలు ఠంచన్‌గా బ్యాంకు అకౌంట్‌లో రూ.1000 జమయ్యే యువనేస్తం సాయం ఆరురోజులైనా అందకపోవడంతో నిరుద్యోగులు నిరాశ పడుతున్నారు. అసలు ఇస్తారో..లేదోనని సందేహాలు వ్యక్తంచేస్తున్నారు. వెరసి నిరుద్యోగ భృతి పథకంపై నీలినీడలు కమ్ముకుంటున్నాయి. పథకం కొనసాగిస్తారా? నిలిపివేస్తారా? అనేదానిపై యువత అయోమయంలో ఉన్నారు. వారంతా కొత్త ప్రభుత్వంపై ఆశ పెట్టుకున్నారు. ఇదే సమయంలో ఈ ప్రభుత్వం నిరుద్యోగ భృతిని కొనసాగిస్తుందా? లేదా? అనేది తెలియడం లేదు. నిరుదోగ్య భృతిపై ఇంకా ఎటువంటి సృష్టత లేకపోవడంతో ఆయా లబ్ధిదారులు ఆశగా ఎదురుచూస్తున్నారు. దీనిపై ఏ నిర్ణయం తీసుకుంటారో చూడాలి.

వైఎస్ జగన్ మోహన్‌రెడ్డి అధ్యక్షతన శాసనసభాపక్ష భేటీ ప్రారంభమైంది. ఈ సమావేశానికి వైసీపీ ఎమ్మెల్యేలు, ఎమ్మెల్సీలు హాజరయ్యారు. సరిగ్గా పది గంటలకు వైసీపీఎల్పీ సమావేశం మొదలైంది. ఈ సమావేశంలో కేబినెట్‌ కూర్పు, ప్రజాకర్షక పథకాలు, పరిపాలనపై చర్చ జరుగుతోంది. ఈ సమావేశంలో, ఆంధ్రప్రదేశ్ మంత్రివర్గ ఏర్పాటులో ముఖ్యమంత్రి వైఎస్ జగన్ మోహన్‌రెడ్డి ఊహించని ట్విస్ట్ ఇచ్చారు. ఎవరూ ఊహించని విధంగా ఒకరిద్దరు కాదు ఏకంగా ఐదుగుర్ని డిప్యూటీ సీఎంలుగా నియమించేందుకు జగన్ సిద్ధమయ్యారు. శుక్రవారం ఉదయం కేబినెట్ భేటీలో జగన్ ఈ కీలక నిర్ణయం తీసుకున్నారు. ఎస్సీ, ఎస్టీ, బీసీ, మైనార్టీ, కాపులకు డిప్యూటీ సీఎంలుగా అవకాశం కల్పించాలని సీఎం నిర్ణయించారు. ఈ ఐదుగురిలో వైసీపీ సీనియర్ నేత, పార్టీ గెలుపులో కీలక పాత్ర పోషించిన ఉమ్మారెడ్డి వెంకటేశ్వర్లు పేరు దాదాపు ఖరారు కాగా.. మిగిలిన నలుగురు ఎవరనేది తెలియాల్సి ఉంది. 

కాగా.. ఇంతవరకూ దేశవ్యాప్తంగా ఏ రాష్ట్ర ప్రభుత్వం ఇలాంటి నిర్ణయం తీసుకోలేదు. మరీ ముఖ్యంగా తెలుగు రాష్ట్రాల్లో ఇద్దరికి మించి ఇంతవరకూ డిప్యూటీ సీఎంలుగా నియమించిన దాఖలాల్లేవ్. ఇదిలా ఉంటే.. మొత్తం 25 మంది మంత్రులతో జగన్ పూర్తిస్థాయి కేబినెట్‌ ఉండనుంది. రెండున్నరేళ్ల తరువాత కేబినెట్‌లో కొత్తవారికి అవకాశం ఇస్తామని జగన్ తెలిపారు. మంత్రి వర్గంలో సగం మంది ఎస్సీ, ఎస్టీ, బీసీ, మైనార్టీలే ఉన్నారని అన్నారు. తాడేపల్లి క్యాంపు కార్యాలయంలో జరిగిన వైసీపీ శాసన సభా పక్ష సమావేశంలో మంత్రివర్గ కూర్పుపై ఎమ్మెల్యేలకు స్పష్టత ఇచ్చారు జగన్‌. అవినీతికి ఏమాత్రం తావివ్వకుండా పాలన జరగాలన్న సీఎం జగన్‌.. ఆరోపణలు వచ్చిన పనుల విషయంలో రివర్స్‌ టెండరింగ్‌ ప్రక్రియ చేపడతామన్నారు.

జగన్‌మోహన్‌రెడ్డి మంత్రివర్గంలో ఎవరికి చోటు దక్కుతుందన్న ఉత్కంఠ కొనసాగుతోంది. ప్రాంతాలు, సామాజిక వర్గాలు, సీనియారిటీ తదితర అంశాలను పరిగణనలోకి తీసుకుని ఇప్పటికే మంత్రుల జాబితా రూపొందించినట్లు ప్రచారం సాగుతోంది. ప్రాంతాలు, సమతుల్యత, సామాజిక వర్గాలు జగన్‌తో కలిసి పనిచేసినవారు, సీనియర్లు, పార్టీకి భవిష్యత్తులో పనికివచ్చే వ్యక్తులు వంటి వాటిని పరిగణనలోకి తీసుకుని మంత్రివర్గ జాబితాను రూపొందించినట్లు ఇప్పటికే ప్రచారం హోరెత్తుతోంది. మంత్రుల ప్రమాణ స్వీకార కార్యక్రమం శనివారం ఉదయం 11.49 గంటలకు ఉండనుంది. సచివాలయం దగ్గర్లోనే ప్రమాణస్వీకారానికి ఏర్పాట్లు పూర్తి చేశారు. 2 వేల మంది పోలీసులతో పటిష్ఠ భద్రతా ఏర్పాటు చేసినట్లు అధికారులు తెలిపారు. ఇవాళ తెలుగు రాష్ట్రాల ఉమ్మడి గవర్నర్ నరసింహన్‌ విజయవాడకు వెళ్తున్నారు. శనివారం ఆయన కొత్త మంత్రులతో ప్రమాణ స్వీకారం చేయించబోతున్నారు.