news

తనను దున్న అన్నవాడు దున్నపోతని మన ముఖ్యమంత్రి చంద్రబాబు.. ప్రతిపక్ష నేత జగన్‌ను ఉద్దేశించి అన్నారు. గురువారం మచిలీపట్నం పోర్టుకు శంకుస్థాపన చేసిన అనంతరం అక్కడ ఏర్పాటు చేసిన సభలో ఆయన మాట్లాడుతూ ప్రతిపక్షం అసెంబ్లీకి రాదని, పార్లమెంట్‌లో ఉండదని విమర్శించారు. ప్రాజెక్ట్‌లను అడ్డుకునేందుకు కోర్టులకు వెళ్తున్నారని, ఇలాంటి ప్రతిపక్షం మనకు అవసరమా? అని చంద్రబాబు ప్రశ్నించారు. పెన్షన్లు ఇస్తుంటే ప్రతిపక్షానికి కడుపు మండుతోందని విమర్శించారు. వచ్చే ఎన్నికల్లో వైసీపీకి డిపాజిట్లు రాకుండా చూసే బాధ్యత చెల్లెమ్మలదేనని చంద్రబాబు అన్నారు. మహిళలకు అన్నగా అండగా ఉంటానని, పసుపు-కుంకుమ కింద డబ్బులు ఇచ్చానని చంద్రబాబు అన్నారు.

అన్నగా అండగా ఉండాలని, మనది రక్త సంబంధం కాకపోయినా పూర్వ జన్మ అనుబంధమని అన్నారు. అందుకే చెల్లెమ్మలకు ఒక్కొక్కరికి రూ. 20వేలు రెండు విడతలుగా పసుపు-కుంకుమ కింద ఇచ్చానని చెప్పారు. రైతులకు రూ.24 వేల కోట్ల రుణ విముక్తి చేశామన్నారు. పట్టిసీమ ద్వారా నీళ్లు తీసుకొచ్చామని చంద్రబాబు అన్నారు. ఈ సందర్భంగా జిల్లా కలెక్టర్‌ లక్ష్మీకాంతం పనితీరును ఆయన ప్రశంసించారు. రాష్ట్రాన్ని కరవు రహిత రాష్ట్రంగా తయారు చేస్తామని చంద్రబాబు హామీ ఇచ్చారు. రెండంకెల అభివృద్ధి సాధించిన ఏకైక రాష్ట్రం మనదేనని అన్నారు. రాష్ట్రాంలోని అన్ని గ్రామాలను ఆదర్శ గ్రామాలుగా తయారు చేశామని, అభివృద్ధిని అడ్డుకునే వైసీపీ దొంగలు ఉన్నారు జాగ్రత్త అని చంద్రబాబు హెచ్చరించారు. ప్రతి శుక్రవారం కోర్టు మెట్లెక్కే దొంగ జగన్‌ అని చంద్రబాబు అన్నారు.

కోడి కత్తితో వైసీపీ రాజకీయ డ్రామాలు చేస్తోందని మండిపడ్డారు. తనది ఉడుం పట్టని, మోదీని గద్దె దించేవరకు వదలనన్నారు. తెలంగాణ సీఎం కేసీఆర్‌ ఆకాశం నుంచి ఊడిపడినట్లు మాట్లాడుతున్నారని, ఆయన ఎక్కడి నుంచి వచ్చారో అందరికీ తెలుసునన్నారు. అవినీతిపరుల గుండెల్లో నిద్రపోతానని చంద్రబాబు అన్నారు. ‘బిడ్డ గర్భంలో పడినప్పటినుంచి పుట్టుక, బాల్యం, చదువు, వైద్యం, ఉపాధి, ఉద్యోగం, నిరుద్యోగ భృతి, పెళ్లి కానుక, పింఛను, చంద్రన్నబీమా వరకు సాయం చేశాం. ఒకవేళ చనిపోతే గౌరవంగా అంతిమయాత్ర చేసేందుకు మహాప్రస్థానం పెట్టాం. సవాల్‌ చేస్తున్నా.. ఇంత సంక్షేమం చేసిన రాష్ట్రం దేశంలోనే లేదు. చివరకు సంపన్న రాష్ట్రాలు కూడా ఇంత సంక్షేమం చేయలేదు. ఎక్కడైనా ఉంటే చెప్పండి. వారు చెప్పేదీ వింటా’ అని తెలిపారు. తమది మానవత్వం ఉన్న ప్రభుత్వమని, కేంద్రానికి మానవత్వం లేదని విమర్శించారు.

కేంద్ర రోడ్డు రవాణా శాఖ మంత్రి నితిన్ గడ్కరీ పనితీరుపై యూపీఏ చైర్‌పర్సన్ సోనియా గాంధీ ప్రశంసలు కురిపించారు. దేశంలోని మౌలిక వసతులను అభివృద్ధి చేయడంలో ఆయన ‘‘అద్భుతంగా’’ కృషిచేశారన్న దానిపై ఆమె ఏకీభవించారు. లోక్‌సభలో ఇవాళ ప్రశ్నోత్తరాల సమయంలో... గడ్కరీ మంత్రిత్వ శాఖకు సంబంధించిన రెండు ప్రశ్నలపై చర్చ జరిగింది. దేశంలోని రహదారుల విస్తరణపై అమలు చేసిన పథకాలు, చేపట్టనున్న పనులపై ఆయన పూర్తి వివరణ ఇచ్చారు. ‘‘తమ తమ నియోజకవర్గాల్లో నా మంత్రిత్వ శాఖ చేపడుతున్న పనులపై పార్టీలకతీతంగా ఎంపీలు నన్ను మెచ్చుకుంటున్నారు..’’ అని ఆయన పేర్కొన్నారు. గడ్కరీ మాట్లాడుతున్నంత సేపూ సోనియా గాంధీ నవ్వుతూ, తలూపుతూ కనిపించడం విశేషం.

బీజేపీ సభ్యుల హర్షధ్వానాల మధ్య గడ్కరీ తన ప్రసంగాన్ని ముగించగానే... మధ్యప్రదేశ్ బీజేపీ ఎంపీ గణేశ్ సింగ్ లేచి నిలబడి ఓ ప్రతిపాదన చేశారు. ‘‘కేంద్ర రోడ్డు రవాణా మంత్రి చేపట్టిన అద్భుతమైన పనులను సభలోని సభ్యులంతా మెచ్చుకోవాలి..’’ అంటూ స్పీకర్ సుమిత్రా మహాజన్‌కు విన్నవించారు. వెంటనే లోక్ సభలో ఊహించని పరిణామం చోటు చేసుకుంది. అప్పటిదాకా గడ్కరీ చెబుతున్న విషయాలను ఎంతో ఓపికగా వింటున్న యూపీఏ ఛైర్ పర్సన్ సోనియాగాంధీ... గడ్కరీని అభినందిస్తూ బల్లను చరిచారు. ఆ తర్వాత లోక్ సభలో కాంగ్రెస్ పక్ష నేత మల్లికార్జున ఖర్గే, కాంగ్రెస్ ఎంపీలందరూ బల్లను చరుస్తూ గడ్కరీని అభినందించారు. 

కాగా రాయ్‌బరేలీ నియోజకవర్గ సమస్యలపై ‘‘సానుకూలంగా’’ స్పందించినందుకు గతేడాది ఆగస్టులో సోనియా గాంధీ నితిన్ గడ్కరీకి కృతజ్ఞతలు చెబుతూ లేఖ రాసినట్టు వార్తలు వచ్చాయి. ఉత్తర ప్రదేశ్‌లోని రాయ్‌బరేలీ నియోజకవర్గం నుంచి సోనియా గాంధీ లోక్‌సభకు ప్రాతినిధ్యం వహిస్తున్న సంగతి తెలిసిందే. ఉత్తరప్రదేశ్ లోని తన నియోజకవర్గంలో ఉన్న రహదారుల సమస్యపై సానుకూలంగా స్పందించారంటూ గత ఆగస్టులో ధన్యవాదాలు తెలుపుతూ గడ్కరీకి సోనియా లేఖ రాశారు. 'ఇంటిని సరిగా చూసుకోలేనివారు.. దేశాన్ని ఎలా మేనేజ్ చేస్తారు' అంటూ ఇటీవల గడ్కరీ చేసిన వ్యాఖ్యలను రాహుల్ గాంధీ కూడా ప్రశంసించిన సంగతి తెలిసిందే. బీజేపీలో గట్స్ ఉన్న నేత మీరు మాత్రమేనంటూ గడ్కరీని ఉద్దేశించి రాహుల్ వ్యాఖ్యానించారు.

తెలుగుదేశం ప్రభుత్వం అధికారంలోకి వచ్చిన నాటి నుంచి నేటి వరకు అమలుచేసిన సంక్షేమపథకాల ద్వారా లబ్ధిపొందిన వారి జాబితాలతో త్వరలో ఇంటింటికీ సంక్షేమ లబ్ధి పేరిట వినూత్న ప్రచార కార్యక్రమానికి ప్రభుత్వం శ్రీకారం చుట్టనుంది. ముఖ్యమంత్రి చంద్రబాబు అధికారంలోకి వచ్చిన తర్వాత 57 నెలల కాలవ్యవధిలో అమలుచేసిన అన్ని సంక్షేమ పథకాల ద్వారా లబ్ధిపొందిన వారి పేరిట కరపత్రాలను ఈ కార్యక్రమం ద్వారా వారి ముందు ఉంచనున్నారు. రియల్‌ టైమ్‌ గవర్నె్‌స(ఆర్‌టీజీఎస్‌) ద్వారా లబ్ధిదారుల వివరాలను సేకరించి ఆయా మండల పరిషత్‌ల నుంచి గ్రామాల్లోని లబ్ధిదారుల ఇంటికి ఆ వివరాలు చేర్చడం ద్వారా ప్రభుత్వం మీ కుటుంబానికి ఇప్పటివరకు ఏం చేసిందనే సంక్షేమ లబ్ధిని స్పష్టం చేయడం ద్వారా వారిని ఆకర్షించనున్నారు.

రానున్న సార్వత్రిక ఎన్నికల నేపథ్యంలో ప్రభుత్వం వినూత్న ప్రచార కార్యక్రమాలకు శ్రీకారం చుట్టనుంది. 2014లో జరిగిన ఎన్నికల్లో అధికారంలోకి వచ్చిన ముఖ్యమంత్రి చంద్రబాబు ప్రభుత్వం 57 నెలల కాలవ్యవధిలో ఆయా లబ్ధిదారులకు ఏయే సంక్షేమ కార్యక్రమాలను వర్తింపజేశారో స్పష్టం చేస్తూ ఆర్‌టీజీఎస్‌ ద్వారా సేకరించిన వివరాలను కరపత్రాల రూపంలో ఆ కుటుంబానికి అందించడమే ఈ ప్రచార లక్ష్యం. ఇప్పటికే మండలంలో 40నుంచి 50 వేల మంది లబ్ధిదారులు ఆయా వర్గాల వారిని బట్టి ప్రభుత్వం అమలుచేసిన సంక్షేమపథకాల ద్వారా ఏదో రూపంలో లబ్ధిపొందినట్టు నివేదికలు స్పష్టం చేస్తున్నాయి. దీనిలో భాగంగా ప్రభుత్వం అమలుచేసిన రైతు రుణమాఫీ, డ్వాక్రా సంఘాలకు రుణాలు, పసుపు-కుంకుమ, గృహనిర్మాణం, అన్ని కేటగిరిల కింద పంపిణీచేసిన పెన్షన్లు, ఆదరణ-2 లబ్ధిదారుల వివరాలు, వివిధ కార్పొరేషన్ల ద్వారా లబ్ధిపొందినవారి వివరాలు, అభయహస్తం, యువనేస్తం, చంద్రన్నబీమా, చంద్రన్న పెళ్లికానుక, ఎస్సీఎస్టీ లబ్ధిదారులకు ఉచిత కరెంట్‌, విదేశీ విద్య, సీఎం సహాయనిధి, ఎన్టీఆర్‌ అర్బన్‌ హౌసింగ్‌తోపాటు అనేక పథకాల ద్వారా లబ్ధిపొందినవారి జాబితాలు సిద్ధమవుతున్నాయి.

ఒక్కో కుటుంబయజమాని ఇంట్లో ఎవరూ ఏయే పథకాల ద్వారా లబ్ధిపొందారనే సమాచారం క్రోడీకరించి ఆ కుటుంబానికి అందజేస్తారు. గత 57 నెలలకాలంలో ప్రభుత్వపరంగా ఎప్పుడూ ఏఏ విధంగా సహాయసంక్షేమలబ్ధి పొందిందీ ఆ జాబితాలో పొందుపరుస్తారు. ఇప్పటికే వీటన్నింటినీ ఆర్‌టీజీఎస్‌ సహాయంతో మండల పరిషత్‌ కార్యాలయాల ద్వారా జాబితాలను సిద్ధంచేసి పంచాయతీల ద్వారా ఇంటింటికీ వెళ్లి లబ్ధిదారులకు అందించనున్నారు. అతి త్వరలో ఈ కార్యక్రమానికి ప్రభుత్వం శ్రీకారం చుట్టనుంది. దీనిలో భాగంగా బినామీల పేరిట లబ్ధిపొందేవారి అసలు బండారం కూడా బహిర్గతం కానుంది. ముఖ్యంగా గృహనిర్మాణాలు, ఎస్సీఎస్టీల పేరిట రుణాల వంటి వాటిలో బినామీల బాగోతం బట్టబయలయ్యే అవకాశం కూడా ఉంది.