news

ప్రముఖ వ్యాపారవేత్త జీపీ రెడ్డి నివాసంలో గురువారం అర్ధరాత్రి దాటిన తర్వాత పోలీసులు సోదాలు నిర్వహించడం కలకలం రేగింది. హైదరాబాద్, బంజారాహిల్స్ రోడ్డు నంబర్ 65లో ఉన్న ఆయన నివాసంలో సోదాలకు వచ్చిన పోలీసులను మాజీ ఎంపీ లగడపాటి రాజగోపాల్ అడ్డుకున్నారు. దీంతో కాసేపు ఉద్రిక్త పరిస్థితి నెలకొంది. ఎటువంటి అనుమతులు లేకుండా అర్ధరాత్రి సోదాలు ఏంటంటూ పోలీసులపై లగడపాటి మండిపడ్డారు. ఐజీ నాగిరెడ్డి బెదిరింపులకు దిగుతున్నారని ఆరోపించారు. భూమి విషయంలో తన మిత్రుడైన జీపీ రెడ్డిని బెదిరింపులకు గురిచేస్తున్నారని, అర్ధరాత్రి ఈ సోదాలేంటని ప్రశ్నించారు.

సెర్చ్ వారెంట్ లేకుండా అర్ధరాత్రి వచ్చి పోలీసులు హడావడి చేస్తున్నారని, ఐపీఎస్ అధికారి నాగి రెడ్డికి అనుకూలంగా పోలీసులు వ్యవహరిస్తున్నారని లగడపాటి అన్నారు. పోలీసుల తీరు పై గవర్నర్, ఎన్నికల కమిషన్ కు ఫిర్యాదు చేస్తామని అన్నారు. పాత కేసు పట్టుకుని అర్ధరాత్రి సమయంలో ఇంత హడావిడి ఎందుకు చేస్తున్నారని ప్రశ్నించారు. వారెంట్ లేకుండా, అర్ధరాత్రి ఇళ్ళలో చొరబడి సోదాలు చేయమని చట్టం చెబుతోందా అంటూ పోలీసులని ప్రశ్నించారు. సివిల్ కేసుకు సబందించి విచారణకు వచ్చామంటూ పోలీసులు చెప్పటాన్ని, లగడపాటి తీవ్రంగా విభేదించారు.

ఎలాంటి వారెంట్ చూపించకుండా ఇంట్లోకి వచ్చిన పోలీసులతో లగడపాటి వాదనకు దిగారు. సెర్చ్ వారెంట్ ఉంటే చేసుకోండి, కానీ అర్ధరాత్రి పూట ఇళ్ళల్లో చొరబడి, ఫ్యామిలీలు ఉన్న చోట, పిల్లలు ఉన్న చోట, ఈ రాద్ధాంతం ఏంటి అని, ఎవరి ఆదేశాల ప్రకారం ఇలా చేస్తున్నారని లగడపాటి ప్రశ్నించారు. వెస్ట్ జోన్ డీసిపీ శ్రీనివాస్ ఆధ్వర్యంలో పోలీసులు హడావిడి చేసారు. తెలంగాణాలో ఎన్నికల హడావిడి మొదలైన దగ్గర నుంచి, ఇలాంటి దాడులు ఎక్కువ అయిపోయాయి. ప్రత్యర్ధుల పై, కావాలని విరుచుకుపడుతూ, పాత కేసులు తిరగతోడి, అందరినీ ఇబ్బంది పెడుతున్నారు. పైన బీజేపీ, ఇక్కడ కేసీఆర్, ఇద్దరూ కలిసి, తెలుగుదేశం, కాంగ్రెస్ నేతలు, సానుభూతి పరుల పై, ప్రతి రోజు ఎదో ఒక హడావిడి చేసి, హంగామా చేస్తున్నారు.

తెలంగాణ రాష్ట్ర సమితి అధినేత కల్వకుంట్ల చంద్రశేఖరరావు అన్న కుమార్తె కల్వకుంట్ల రమ్యారావు ఆంధ్రప్రదేశ్ ముఖ్యమంత్రి చంద్రబాబునాయుడుని కలుసుకున్నారు. ప్రత్యేకంగా చంద్రబాబుని కలవడానికి మంగళవారం అమరావతి వెళ్లిన రమ్యారావు ఉండవల్లిలోని ఏపీ సచివాలయంలో ఆయన్ను మర్యాదపూర్వకంగా కలుసుకున్నారు. తెలంగాణలో కాంగ్రెస్ నేతృత్వంలో మహాకూటమి ఏర్పాటు కానుండటం, ఆ కూటమిలో టీడీపీ క్రియాశీలకంగా వ్యవహరిస్తున్న నేపథ్యంలో రమ్యారావు చంద్రబాబును కలవడం ప్రాధాన్యత సంతరించుకుంది. రమ్యారావు డిసెంబర్ లో జరగనున్న తెలంగాణ అసెంబ్లీ ఎన్నికల్లో కరీనంగర్ జిల్లా నుంచి పోటీ చేయడానికి ఆసక్తి చూపిస్తున్నారు.

అయితే ఇటీవల కొందరు కాంగ్రెస్ పార్టీ నాయకుల వైఖరితో ఆమో మనస్తాపం చెంది.. కరీంగనర్ లో జరిగిన ఓ సమావేశం నుంచి అర్ధంరంగా నిష్ర్కమించారు. ఈ పరిస్ధితుల్లో ఆమె అమరావతి వెళ్లి చంద్రబాబును కలవడం... తనకు టిక్కెట్ వచ్చేలా సహకరించమని కోరండం తెలంగాణ రాజకీయ వర్గాల్లో చర్చనీయాంశం అయ్యింది. చంద్రబాబుతో టీటీడీపీ నేతల భేటీలో రమ్య విషయం ప్రస్తావించారు. ఈ సమయంలో రమ్యను పార్టీలోకి తీసుకుంటే .. రెచ్చగొట్టినట్టు ఉంటుందని అభిప్రాయాన్ని చంద్రబాబు వ్యక్తం చేశారు. చంద్రబాబు వ్యాఖ్యలతో తెలంగాణ టీడీపీ నేతలు ఏకీభవించారు.

మరో పక్క, ఆంధ్రప్రదేశ్ ముఖ్యమంత్రి చంద్రబాబుతో ఈ రోజు టీటీడీపీ నేతల సమావేశం ముగిసింది. టీటీడీపీ చీఫ్ ఎల్.రమణ నేతృత్వంలో ఈ రోజు బాబును కలుసుకున్న నేతలు తెలంగాణలో పోటీ చేయనున్న సీట్లు, అనుసరించాల్సిన వ్యూహాలపై చర్చించారు. అమరావతిలో ఈ రోజు బాబుతో సమావేశమైన అనంతరం రమణ మీడియాతో మాట్లాడుతూ.. బీజేపీకి వ్యతిరేకంగా దేశమంతా ప్రతిపక్షాలను ఏకం చేస్తామని తెలిపారు. రాబోయే ఎన్నికల్లో టీడీపీ రెండు అంకెల సీట్లను గెలుచుకుంటుందని రమణ ధీమా వ్యక్తం చేశారు. స్థానిక పరిస్థితులకు అనుగుణంగా పోటీ చేయాలని నిర్ణయించినట్లు వెల్లడించారు. ఈ ఎన్నికల్లో ప్రజాకూటమి అభ్యర్థుల విజయమే ముఖ్యమనీ, సీట్ల సంఖ్యను పట్టించుకోవద్దని చంద్రబాబు స్పష్టం చేసినట్లు సమాచారం.

వైఎస్ జగన్ బాల్య స్నేహితుడు, వైఎస్ ఫ్యామిలీ ఇంట్లో మనిషి అయిన, కడప జిల్లా పులివెందులకు చెందిన మంగలి కృష్ణ కిడ్నాప్ అయ్యాడని, ఈ రోజు సాయంత్రం వార్తా వచ్చిన సంగతి తెలిసిందే. అయితే, ఇదంతా మీడియాని డైవర్ట్ చెయ్యటానికి, మంగలి కృష్ణ అనుచరులు ఆడిన డ్రామా అని పోలీసులు తేల్చారు. ఇది అసలు జరిగిన విషయం.. కొద్ది రోజులుగా మంగళి కృష్ణ అనుచరులు హైదరాబాద్‌లోని ఒక వ్యాపారిని బెదిరిస్తున్నారు. కొద్ది రోజుల క్రితం వీరంగం సృష్టించారు. వ్యాపారంలో భాగస్వామ్యం ఇవ్వాలంటూ ఆ రియల్ ఎస్టేట్ వ్యాపారిపై మంగళి కృష్ణ అనుచరులు ఒత్తిడి తెచ్చారు. ఆ వ్యాపారి ఇంట్లోకి చొరబడి కారు, వస్తువులు ధ్వంసం చేశారు.

దీంతో మంగళికృష్ణపై జూబ్లీహిల్స్ పోలీసులు కేసు నమోదు చేశారు. కృష్ణపై దౌర్జన్యం, దాడి, భూకబ్జా ఆరోపణలపై పలు కేసులు ఉన్నాయి. దేశ, విదేశాల్లో నిర్మాణ వ్యాపారాలు నిర్వహించే దుర్గారావు, ఆయన కుమారుడు సుభాష్ హైదరాబాద్ జూబ్లీహిల్స్‌లో నివసిస్తున్నారు. ఇటీవల వారి ఇంట్లో కొందరు చొరబడి కారు, అద్దాలు, లైట్లు ధ్వంసం చేశారు. పోలీసులు సీసీ ఫుటేజ్ పరిశీలించగా.. కడప జిల్లా పులివెందులకు చెందిన సమీర్‌ను గుర్తించారు. సమీర్‌ను పోలీసులు అదుపులోకి తీసుకుని ప్రశ్నించగా... విష్ణువర్ధన్ రెడ్డి, మోహన్, వీరబాబు, ప్రతాప్‌లతో కలిసి ఈ దాడికి పాల్పడినట్లు సమీర్ అంగీకరించాడు. పులివెందులకు చెందిన మంగళికృష్ణ ఆదేశాల మేరకు దాడి చేసినట్లు చెప్పాడు.

వ్యాపారంలో తనకు భాగస్వామ్యం ఇవ్వాలని మంగళికృష్ణ కొంతకాలంగా బెదిరిస్తున్నాడని సుభాష్ పోలీసులకు ఫిర్యాదు చేశారు. సుభాష్ ఫిర్యాదు మేరకు మంగళికృష్ణ, అతని అనుచరులపై జూబ్లీహిల్స్ పోలీసులు ఐపీసీ 448, 427 సెక్షన్ల కింద కేసు నమోదు చేశారు. సమీర్, విష్ణువర్ధన్ రెడ్డిలను ఈనెల 5న అరెస్టు చేశారు. ఈ కేసులో మంగళికృష్ణ ఇవాళ నాంపల్లి కోర్టులో లొంగిపోయాడు. అనంతరం మంగళికృష్ణకు న్యాయస్థానం బెయిల్ మంజూరు చేసింది. ఆ తర్వాత కృష్ణను టాస్క్ ఫోర్స్ పోలీసులు అదుపులోకి తీసుకుని ప్రశ్నించారు. కృష్ణను కిడ్నాప్ చేశారంటూ అతని అనుచరులు కొంతసేపు హంగామా సృష్టించారు.