news

ఇనుప ఖనిజం అక్రమ రవాణా, మనీ లాండరింగ్‌ కేసులు, రాష్ట్రాల సరిహద్దుల చెరిపేశాడనే ఆరోపణలు తదితర కేసుల్లో కూరుకుపోయిన పీకల్లోతు కష్టాల్లో ఉండే గాలి జనార్దన్‌రెడ్డి తాజాగా మరో కేసు మెడకు తగిలించుకున్నారు. ఒక ప్రైవేటు కంపెనీ మనీ లాండరింగ్‌లో దాదాపు వేల కోట్ల మేరకు ప్రజలను మోసం చేస్తే దాన్ని సీసీబీ గుర్తించి ఆ కంపెనీ యాజమాన్యంపై కేసులు పెట్టి అరెస్టు చేసేందుకు పూనుకున్న సమయంలో గాలి జనార్దర్‌రెడ్డి తన జాదూతనం ప్రదర్శించారు. తాజాగా ఈ కేసులో ఇరుక్కున్న గాలి జనార్దన్‌రెడ్డి ప్రస్తుతం అజ్ఞాతంలోకి వెళ్లిపోయాడని సీసీబీ పోలీసులు తెలిపారు.

గాలి జనార్దనరెడ్డి ఆచూకీ కోసం సీసీబీ పోలీస్ అధికారి మంజునాథ్ నేతృత్వంలో 8 మంది పోలీసు అధికారులు, సిబ్బంది గురువారం ఉదయం బళ్లారికి చేరుకున్నారు. మొదట ఇన్నా రెడ్డి కాలనీలో ఉన్న గాలి ఇంటికి వెళ్లి చూశారు. అక్కడి నుంచి బెళగల్లు గ్రాస్ లోని ఓ అపార్టుమెంట్లో అలీ ఖాన్ ఇంటినీ పరిశీలించారు. ఉదయం 8 గంటలకు హవంబావిలో ఉన్న గాలి ప్రధాన నివాసానికి వచ్చారు. వాచ్మన్ సాయంతో తాళం తీయించి లోనికి ప్రవేశించారు. విషయం తెలుసుకున్న గాలి జనార్ధన రెడ్డి మామ పరమేశ్వర రెడ్డి, అత్త నాగ లక్ష్మమ్మ అక్కడికి చేరుకున్నారు.

మరో 10 నిమి షాల్లో గాలి మిత్రుడు- మొళకాల్మూరు శాసనస భ్యుడు బి. శ్రీరాములు (భాజపా), రాయదుర్గం మాజీ శాసనసభ్యుడు కాపు రామచంద్రా రెడ్డి (వైకాపా) అక్కడికి వచ్చారు. మరో వాహనంలో కొందరు మహిళలు ప్రవేశించారు. 6 గంటలపాటు పోలీసులు ఏకబికిన ఇల్లంతా గాలించారు. ఇంటి పైభాగంలో ఉన్న ట్యాంక్, పడక గదులు, స్నానపు గదులు, స్టోర్లను పరిశీలించారు. అక్కడి నుంచి ఓబుళాపురం గనుల సంస్థ (మైనింగ్ కంపెనీ) కార్యాలయం, దాని ఎదురుగా ఉన్న ఏఎంసీ గనుల కార్యాలయాలనూ అధికారులు తనిఖీ చేశారు. ఏయే దస్త్రాలు స్వాధీనం చేసుకున్నదీ వెల్లడి కాలేదు. ఇది ఇలాఉండగా, కమలదళం మాత్రం గాలి జనార్దన్‌రెడ్డి విషయంలో ఎవరూ జోక్యం చేసుకోవద్దని, బీజేపీ నాయకులుకూడా ఆయన దూరంగా ఉండాలని స్వయానా పార్టీ ఆధినాయకుడు అమిత్‌షా పేర్కొన్నారు.

పెద్దనోట్ల రద్దుతో తగిలిన గాయాలు కాలంతో పాటు పెరిగి వికృతంగా కనిపిస్తున్నాయని మాజీ ప్రధానమంత్రి మన్మోహన్‌సింగ్‌ అన్నారు. పెద్దనోట్ల రద్దు నిర్ణయానికి గురువారంతో రెండేళ్లు పూర్తయిన సందర్భంగా ఆయన ప్రత్యేక ప్రకటన విడుదల చేశారు. ‘ప్రధానమంత్రి నరేంద్ర మోదీ 2016 నవంబర్‌ 8న తీసుకున్న దురాలోచన, దురదృష్టకరమైన నిర్ణయం.. భారతీయ ఆర్థిక వ్యవస్థపై, సమాజంపై చూపిన వ్యతిరేక ప్రభావం ఈరోజుకీ కనిపిస్తోంది. దేశంలోని ప్రతి ఒక్కరిపైనా పెద్దనోట్ల రద్దు ప్రభావం కనిపించింది. అన్నింటినీ కాలమే మాన్పుతుందని చెబుతుంటారు. పెద్దనోట్ల రద్దు వల్ల ఏర్పడిన మచ్చలు, గాయాలు మాత్రం దురదృష్టవశాత్తూ... కాలంతో పాటు మరింతగా పెరుగుతూ వికృతంగా కనిపిస్తున్నాయి.

జీడీపీ దారుణంగా పడిపోయింది. ఆర్థిక వ్యవస్థకు వెన్నెముకలాంటి చిన్న, మధ్య తరహా పరిశ్రమలు పెద్దనోట్ల రద్దు షాక్‌ నుంచి ఇప్పటికీ తేరుకోలేకపోయాయి. ఉపాధిపై దీని ప్రభావం ప్రత్యక్షంగా పడింది. ఆర్థిక మార్కెట్లు దుర్బలంగా మారాయి. మౌలిక వసతుల ప్రాజెక్టుల రుణ దాతల్ని, నాన్‌ బ్యాంకింగ్‌ ఆర్థిక వ్యవస్థల వనరులను ఆవిరి చేసింది. దీని ప్రభావాన్ని మనం ఇంకా పూర్తిస్థాయిలో అర్థం చేసుకోవాల్సి ఉంది. రూపాయి మారక విలువ తగ్గిపోయింది. ప్రపంచ చమురు ధరలు పెరుగుతున్నాయి. స్థూల ఆర్థిక వ్యవస్థ కూడా పూర్తిగా కుప్పకూలే పరిస్థితి వచ్చింది.

సంప్రదాయ విరుద్ధమైన, స్వల్పకాలిక చర్యలపై ఆధారపడకపోవడం చాలా మంచిది. అలాంటి వాటివల్ల భారత ఆర్థిక వ్యవస్థ, మార్కెట్లలో మరింత అనిశ్చితి ఏర్పడుతుంది. ఇప్పటికైనా ప్రభుత్వం ఆర్థిక విధానాల్లో నిర్దిష్టత, స్పష్టతను పునరుద్ధరించాలి. ఆర్థిక దుస్సాహస చర్యలను, అనాలోచిత ఆర్థిక విధానాలను అమలుచేస్తే వాటి ప్రభావం దీర్ఘకాలంలో దేశంపై ఎలా ఉంటుందోనన్న సత్యాన్ని ఈ రోజు గుర్తుచేస్తుంది’ అని మన్మోహన్‌ పేర్కొన్నారు. ‘ఎలాంటి గాయాన్నైనా మాన్పించే శక్తి కాలానికి ఉందంటారు. కానీ, నోట్ల రద్దు అలా కాదు. కాలం గడిచేకొద్దీ ఆ గాయం మరింత స్పష్టంగా కనపడుతుంది.’ అని మన్మోహన్ సింగ్ అభిప్రాయపడ్డారు.

జగన్ మోహన్ రెడ్డి పై కోడి కత్తితో గుచ్చిన సంగతి తెలిసిందే. 0.5 cm లోతులో గుచ్చితే, జగన్ 20 రోజులుగా రెస్ట్ లో ఉన్నారు. ఇది ఇలా ఉంచితే, ఈ కేసు పై పోలీసులు విచారణ చేస్తున్నారు. మరో పక్క, జగన్ కూడా కోర్ట్ లో కేసు వేసారు. నాకు సిబిఐ దర్యాప్తు కావాలని కేసు వేసారు. రాష్ట్ర ప్రభుత్వ అధీనంలో లేని స్వతంత్ర దర్యాప్తు సంస్థతో ఈ దాడిపై విచారణ జరిపించాలని జగన్‌, ఆయన చిన్నాన్న వైవీ సుబ్బారెడ్డి వేర్వేరు పిటిషన్లు వేసిన సంగతి తెలిసిందే. అలాగే విమానాశ్రయాల్లో భద్రతపై సీబీఐ దర్యాప్తు చేయించాలని అనిల్‌కుమార్‌ మరో ప్రజాహిత వ్యాజ్యం దాఖలు చేశారు. ఇవి గురువారం చీఫ్‌ జస్టిస్‌ టీబీఎన్‌ రాధాకృష్ణన్‌, జస్టిస్‌ ఎస్వీ భట్‌లతో కూడిన ధర్మాసనం ముందు విచారణకు వచ్చాయి.

దీని పై నిన్న విచారణ సందర్భంలో, విమానాశ్రయంలో దాడికి సంబంధించిన దర్యాప్తునకు వైసీపీ అధ్యక్షుడు వైఎస్‌ జగన్‌ సహకరించడం లేదని ఆంధ్రప్రదేశ్‌ అడ్వొకేట్‌ జనరల్‌ (ఏజీ) దమ్మాలపాటి శ్రీనివాస్‌ హైకోర్టు దృష్టికి తీసుకొచ్చారు. రక్తం మరకలున్న చొక్కా ఇంత వరకూ దర్యాప్తు అధికారులకు అందజేయలేదని.. సీఆర్‌పీసీ 160 సెక్షన్‌ కింద వాంగ్మూలం ఇవ్వడానికీ నిరాకరించారని తెలిపారు. పోలీసుల దర్యాప్తు ఎంతవరకు వచ్చిందో తెలుసుకుని వచ్చే మంగళవారం విచారణ చేపడతామని కోర్టు తెలిపింది. ఇప్పటికే ఆలస్యం జరిగినందున వెంటనే విచారణ జరిపించాలని హైకోర్టును జగన్‌ తరఫు న్యాయవాది కోరారు.

జగన్‌పై దాడిని చిన్నదిగా డీజీపీ మీడియాకు చెప్పారని, వైసీపీ కార్యకర్తే సానుభూతి కోసం దాడి చేశారని సీఎం ప్రకటించారని, ఎటువంటి విచారణ జరగక మునుపే ఇలాంటి ప్రకటనల వల్ల తమకు రాష్ట్ర ప్రభుత్వ దర్యాప్తు సంస్థలపై నమ్మకం పోయిందని పిటిషనర్ల తరఫున న్యాయవాదులు సీవీ మోహన్‌రెడ్డి, దేశాయ్‌ ప్రకాశ్‌రెడ్డి తెలిపారు. అయితే బాధితుడే కోర్టును ఆశ్రయించాక ఇక ప్రజాహిత వ్యాజ్యం ఎందుకని సీజే ప్రశ్నించారు. దర్యాప్తు తీరుపై శుక్రవారం నివేదిక అందజేయాలని ఏజీని ఆదేశించారు. అయితే దర్యాప్తు నివేదికను విశాఖ నుంచి తేవలసి ఉందని.. సోమవారం లేదా మంగళవారం కోర్టుకు అందజేయగలమని ఆయన బదులిచ్చారు. వాదనలు విన్న ధర్మాసనం.. తదుపరి విచారణను శుక్రవారానికి వాయిదావేసింది.