news

మాజీ ప్రధాని దేవెగౌడ, కర్ణాటక సీఎం కుమారస్వామితో ఏపీ సీఎం చంద్రబాబు భేటీ అయ్యారు. భాజపా యేతర పార్టీలన్నింటినీ ఏకతాటిపైకి తీసుకొచ్చేందుకు చేస్తున్న ప్రయత్నంలో భాగంగా ఈ మధ్యాహ్నం చంద్రబాబు బెంగళూరు బయల్దేరి వెళ్లారు. తొలుత జేడీఎస్‌ అగ్రనేత దేవెగౌడ నివాసానికి చేరుకున్నారు. ఈ సందర్భంగా చంద్రబాబు బృందానికి దేవెగౌడ, కుమారస్వామి ఘన స్వాగతం పలికారు. జాతీయ స్థాయిలో భాజపాకు వ్యతిరేకంగా రాజకీయ పార్టీలను ఏకం చేయడమే లక్ష్యంగా ఇప్పటికే సీఎం రెండుసార్లు దిల్లీ వెళ్లిన నేపథ్యంలో నేటి తెదేపా, జేడీఎస్ నేతల భేటి ప్రాధాన్యత సంతరించుకుంది.

దేవెగౌడ మాట్లాడుతూ నాలుగేళ్ళ ఎన్డీయే పాలన పెద్ద నోట్ల రద్దు వంటి చాలా సమస్యలను సృష్టించిందన్నారు. మోదీ ప్రభుత్వం వ్యవస్థలపై గురిపెట్టిందన్నారు. తెలుగుదేశం పార్టీ అధ్యక్షుడు, ఆంధ్రప్రదేశ్ ముఖ్యమంత్రి చంద్రబాబు నాయుడు కాంగ్రెస్ సహా లౌకికవాద పార్టీల నేతలను కలిశారన్నారు. ఈ నేపథ్యంలో తమపై ఓ బాధ్యత ఉందన్నారు. లౌకికవాద పార్టీలన్నీ ఏకతాటిపైకి రావలసిన అవసరం ఉందని తెలిపారు. చంద్రబాబు నాయుడు మాట్లాడుతూ దేవె గౌడ ఆశీర్వాదాలు, మద్దతు కోసం తాను ఇక్కడికి వచ్చానన్నారు. ప్రజాస్వామ్యాన్ని, వ్యవస్థలను, దేశాన్ని కాపాడాలన్న లక్ష్యంతో బెంగళూరు వచ్చానన్నారు. మోదీ ప్రభుత్వం ఆంధ్రప్రదేశ్ రాష్ట్రానికి కూడా నమ్మక ద్రోహం చేసిందన్నారు.

కుమార స్వామి మాట్లాడుతూ లౌకికవాద శక్తులను ఏకం చేయడం కోసం తాము చర్చలు జరిపినట్లు తెలిపారు. చంద్రబాబు, దేవె గౌడ రాజకీయ లెక్కలు చాలా బాగున్నాయన్నారు. చంద్రబాబు ఎంట్రీతో సీన్ మారిపోయిందని, 2019 లోక్‌సభ ఎన్నికల్లో కూడా 1996నాటి పరిస్థితులు వస్తాయని ఆశిస్తున్నట్లు తెలిపారు. ఇటీవల చంద్రబాబు కాంగ్రెస్ అధ్యక్షుడు రాహుల్‌గాంధీ, మాయావతి, శ‌ర‌ద్‌ప‌వార్‌, శ‌ర‌ద్ యాద‌వ్‌, ములాయం సింగ్‌యాదవ్‌, అఖిలేశ్‌ యాదవ్‌, ఫ‌రూఖ్ అబ్దుల్లా, సీతారాం ఏచూరితో వరుస భేటీలు నిర్వహించి వారందరినీ ఏకతాటిపైకి తీసుకొచ్చే ప్రయత్నానికి శ్రీకారం చుట్టిన విషయం తెలిసిందే.

కర్ణాటక ఎన్నికల ఫలితాలు దేశంలో విపక్షాల ఐక్యతకు మరింత ఊతం ఇవ్వనున్నాయి. మూడు లోక్‌సభ, రెండు శాసనసభ స్థానాలకు జరిగిన ఎన్నికల్లో- బళ్లారిని భాజపా నుంచి కాంగ్రెస్‌ కైవసం చేసుకొంది. మిగిలిన అన్ని స్థానాలను ఎవరివి వారు నిలబెట్టుకున్నారు. అయితే గత ఎన్నికలతో పోలిస్తే మెజార్టీల్లో భారీ తేడా రావడం విపక్షాల బలాన్ని చాటుతోంది. ఉత్తర్‌ప్రదేశ్‌లోని మూడు లోక్‌సభ స్థానాల్లోనూ ఇలాగే మిత్రపక్షాలన్నీ కలిసికట్టుగా జయకేతనం ఎగరవేసి భాజపాను పెద్ద దెబ్బకొట్టాయి. బద్ధ శత్రువులైన బీఎస్పీ, ఎస్పీ, ఆర్‌ఎల్‌డీ ఆ ఎన్నికల్లో కలిసి పోటీచేసి భాజపాను ఓడించడం దేశ రాజకీయాల్లో కొత్త శకానికి నాంది పలికింది. ఆగర్భ వైరాన్ని పక్కనపెట్టి కలవడం ద్వారా ఎంత పెద్ద శత్రువునైనా ఎదుర్కోవచ్చన్న ధైర్యాన్ని విపక్షాల్లో ఉప ఎన్నికలు నింపాయి.

కర్ణాటకలో కాంగ్రెస్‌, జేడీ(ఎస్‌)లు ఏకమై రాష్ట్రంలో భాజపాను అధికారానికి దూరం చేయగలిగిన తర్వాత విపక్షాల ఏకీకరణ పై దేశవ్యాప్తంగా చర్చ విస్తృతమైంది. 2017 ఉత్తర్‌ప్రదేశ్‌ శాసనసభ ఎన్నికల్లో బీజేపీ సొంతంగా 312 సీట్లు గెలుపొంది అధికార పగ్గాలు చేపట్టడంతో దేశంలోని విపక్షాలన్నీ తమ పని అయిపోయిందని జావగారాయి. ఇక ప్రతిపక్షాలకు భవిష్యత్తు ఉండదేమోనన్న వాతావరణం అలుముకొంది. కానీ ఈ ఏడాది మార్చి 11న జరిగిన గోరఖ్‌పూర్‌, పూల్‌పుర్‌ లోక్‌సభ ఉప ఎన్నికలను సమాజ్‌వాదీ పార్టీ, బహుజన్‌ సమాజ్‌ పార్టీలు కలిసికట్టుగా ఎదుర్కొని ఆ రాష్ట్ర ముఖ్యమంత్రి, ఉప ముఖ్యమంత్రులు ప్రాతినిథ్యం వహించిన స్థానాలను కైవశం చేసుకోవడం సంచలనం రేపింది. ఆ రెండు ఎన్నికలు దేశంలో రాజకీయ పునరేకీకరణకు దారి చూపాయి. కైరానా ఉప ఎన్నిక మరింత బలాన్ని చేకూర్చగా, కర్ణాటక అసెంబ్లీ ఎన్నికలు దాన్ని మరో ఎత్తుకు తీసుకెళ్లాయి. తాజాగా కర్ణాటక ఉప ఎన్నికల ఫలితాలు ఆ పంథా సరైనదేనని ధ్రువీకరించినట్లయింది.

దేశంలోని మోదీ వ్యతిరేక శక్తులన్నింటినీ కూడగట్టడానికి ఏపీ ముఖ్యమంత్రి చంద్రబాబునాయుడు ఇటీవల కాంగ్రెస్‌ అధ్యక్షుడు రాహుల్‌గాంధీని కలిసిన విషయం తెలిసిందే. తాజా ఫలితాలు ఆ ప్రయత్నాలకు మరింత ఊతాన్ని ఇవ్వడం ఖాయమని రాజకీయ విశ్లేషకులు అభిప్రాయపడుతున్నారు. భావసారూప్య పార్టీలను కూడగట్టే పనిని చంద్రబాబునాయుడు మరింత మనోధైర్యంతో చేయడానికి వీలు కలిగిందని ఆ పార్టీ ఎంపీలు పేర్కొన్నారు. ఒకనాటి మిత్రపక్షమైన శివసేనతో ప్రస్తుతం భాజపాకు పొసగడం లేదు. బిహార్‌లో జేడీ(యూ)తో సీట్ల సర్దుబాటు చేసుకున్నప్పటికీ రాష్ట్రీయ లోక్‌ సమత, లోక్‌ జన్‌శక్తి పార్టీలతో ఇంకా లుకలుకలు నడుస్తున్నాయి. తగిన సీట్లు లభించకపోతే ఆ రెండు పార్టీలు బిహార్‌లో ప్రధాన పార్టీ అయిన ఆర్‌జేడీతో జట్టు కట్టడానికి వెనుకాడబోవన్న వాదన ఉంది. తాజా ఫలితాలతో 2019 సార్వత్రిక ఎన్నికల్లోనూ కర్ణాటకలో కాంగ్రెస్‌-జేడీ(ఎస్‌) కలిసి పోటీ చేసే అవకాశాలు ఎక్కువగా ఉన్నాయి. మహారాష్ట్రలో ఎన్సీపీతో కలిసి కాంగ్రెస్‌ బరిలో దిగడం దాదాపు ఖాయమే. పశ్చిమ బెంగాల్‌లో తృణమూల్‌తో, ఒడిశాలో బీజేడీతో కాంగ్రెస్‌కు అవగాహనపై ఇంతవరకు ఎలాంటి సంకేతాలు లేకపోయినా కర్ణాటక అనుభవంతో ఆ దిశగా కాంగ్రెస్‌ ప్రయత్నాలు చేయబోతుందనేది స్పష్టం. అయిదు రాష్ట్రాల శాసనసభలకు జరగనున్న ఎన్నికల ఫలితాలు వెలువడ్డాక పొత్తుల ఎత్తుల్లో మరింత స్పష్టత రానుంది. యూపీలో బీఎస్పీ, ఎస్పీ, ఆర్‌ఎల్‌డీ, కాంగ్రెస్‌ మధ్య పొత్తు విషయం డిసెంబరు 11 ఫలితాల తర్వాత ఖరారు కానుంది. ఈ మూడు రాష్ట్రాల్లో కలిపి 156 లోక్‌సభ స్థానాలున్నాయి.

మోడీ-షా పరిపాలనలో దేశంలోని అన్ని వ్యవస్థలు నాశనం అయిపోతున్నాయి. ఇప్పుడు ఆర్బీఐ వంతు వచ్చింది. ఈ రోజు నోట్లు రద్దు అయ్యి, రెండు ఏళ్ళు అయిన సందర్భంలో, ఇది మోడీ ఖాతాలో మరో విజయం అనుకోవాలేమో. ఆర్బీఐ, ఆర్థిక శాఖకు మధ్య విభేదాలు నెలకొన్న నేపథ్యంలో ఈనెల 19న జరుగనున్న ఆర్బీఐ కేంద్ర బోర్డు సమావేశమే సెంట్రల్ బ్యాంకు గవర్నర్ ఉర్జిత్ పటేల్‌కు చివరి సమవేశం కానుందా? ఆ రోజే ఆయన తన పదవికి రాజీనామా చేయనున్నారా? ప్రస్తుతం తెలెత్తిన విభేదాలు మరింత ముదిరిన పక్షంలో నవంబర్ 19నే ఉర్జిత్ రాజీనామా చేయవచ్చని ఆ సంస్థ వర్గాలను ఉటింకిస్తూ ఆన్‌లైన్ ఫైనాన్స్ పబ్లికేషన్ 'మనీలైఫ్' బుధవారం ఓ కథనం ప్రచురించింది. ప్రభుత్వంతో వాదన చేసిచేసి.. చాలా అలసిపోయానని, అది తన ఆరోగ్యంపై చాలా తీవ్ర ప్రభావం చూపుతోందని ఉర్జిత్ తన సన్నిహితులతో పేర్కొన్నారని ఆ కథనం తెలిపింది.

రుణ నిబంధనలను సడలించడం ద్వారా ఆర్బీఐ మిగులు నిధులను వాడుకోవాలనుకుంటున్న కేంద్రం ఆలోచను ఆర్బీఐ గవర్నర్‌గా ఉర్జిత్ విభేదిస్తున్నారు. దీంతో విభేదాలు రచ్చకెక్కుతున్నాయి. గత నెలలో ఆర్బీఐ డిప్యూటీ గవర్నర్ ఆచార్య వ్యాఖ్యలతో ఈ వివాదం మరింత ముదిరింది. సెంట్రల్ బ్యాంక్‌ స్వతంత్ర ప్రతిపత్తిని నీరుగారిస్తే మహావిపత్తు తప్పకపోవచ్చని ఆయన వ్యాఖ్యానించారు. ఆర్థిక శాఖ మంత్రి జైట్లీ వెంటనే రంగంలోకి దిగి, ప్రజా ప్రయోజనాల దృష్ట్యా ఆర్బీబీకి తగిన సూచనలు చేసే అధికారం ప్రభుత్వానికి ఉందని, తమ సమావేశాల్లో చర్చలను ఏనాడూ బహిర్గతం చేయమని, తుది నిర్ణయం తర్వాతే ఏ విషయమైనా ప్రకటిస్తామని చెప్పారు. ఇకముందు కూడా ఇలాగే కొనసాగుతుందన్నారు.

కాగా, పదేపదే ఆర్బీఐపై ఒత్తిడి తీసుకురావడం వల్ల ఉర్జిత్ రాజీనామా చేసే రిస్క్ ఉన్నప్పటికీ ఏమాత్రం వెనక్కి తగ్గకూడదని కేంద్రం పట్టుదలగా ఉన్నట్టు పేరువెల్లడించడానికి ఇష్టపడని కొందరు ప్రభుత్వ అధికారులు చెబుతున్నారు. ప్రభుత్వ డిమాండ్లకు, నిర్మాణాత్మక చర్చలకు పదేపదే ఆర్బీఐ తిరస్కరించడం వల్ల ప్రభుత్వానికి అసహనం పెరుగుతోందని అధికారులను ఉటంకిస్తూ 'రాయిటర్స్' ఓ వార్తా కథనం ప్రచురించింది. ద్రవ్యలోటును పూడ్చుకునేందుకు ఆర్బీఐ రిజర్వ్ నుంచి నిధులిచ్చి సహకరించాలని ప్రభుత్వం చేసిన విజ్ఞప్తులను పదేపదే ఆర్బీఐ తోసిపుచ్చుతోందని ఆ కథనం తెలిపింది. కాగా, 'ఇది సడలించండి...అది సడలించండి' అంటూ తన హయాంలోనూ ప్రభుత్వం నుంచి తనకు లెక్కలేనన్ని ఉత్తరాలు వచ్చేవంటూ ఆర్బీఐ మాజీ గవర్నర్ రఘురామ్ రాజన్ సైతం మంగళవారంనాడు ఓ ఇంటర్వ్యూలో పేర్కొన్నారు.