news

ఉదయం టీవీల్లో స్క్రోలింగ్ చూసాం.. 10 వేల మంది కంటే ఎక్కువ వస్తే బ్యారేజికి ఇబ్బంది, వేరే చోటు చూసుకోండి అని పోలీసులు నోటీసు ఇస్తే, పవన్ సొంత ఛానల్, పవన్ ఫాన్స్ చేసిన హంగామా అంతా ఇంతా కాదు. కబద్దార్ పోలీస్ అంటూ, ఒక్కొక్క పిల్లోడి తోక ఊపుడులు చూసాం.. కట్ చేస్తే, పవన్ కవాతు అని చెప్పి, కారులో వెళ్ళిపోయాడు. ఇదేంటి అండి కవాతు అని చెప్పి, పాపం అంత మంది ఫాన్స్ ని నడిపిస్తున్నాడు, మరి పవన్ ఎందుకు నడవకుండా కారులో వెళ్ళిపోతున్నాడు. రిసార్ట్ దీక్ష లాగా, ఇప్పుడు కారులో కవాతు చేస్తున్నారా అని విమర్శలు రాగానే, ఇక్కడ మాత్రం పోలీసులు చెప్పారని, పవన్ బుద్ధిగా పాటించారని సమర్ధించుకున్నారు. సరే, ఇది వదిలేద్దాం. ఇక గాల్లో పిడి గుద్దులు గుద్డుతూ పవన్ సాధించింది ఏంటి ?

కవాతు అంటూ హడావిడి చెసి, దానికి త్రివిక్రమ్ చేత డైలాగులు రాపించారు, రామ జోగయ్య శాస్త్రి చేత పాటలు రాపించారు, తమన్ మ్యూజిక్ ఇచ్చాడు, టీజర్ అన్నాడు, ట్రైలర్ అన్నాడు, ఇవన్నీ ట్విట్టర్ లో పవనే పోస్ట్ చేసాడు, చివరకు సినిమా వచ్చే సరికి, మరో అజ్ఞాతవాసి చేసి చూపించాడు. చెప్పింది ఒకటి చేసింది ఒకటి. పవన్ కి ప్రస్తుతం ముగ్గురు టార్గెట్. మూడు బాగా అచ్చు వచ్చే నెంబర్ అనుకుంటా, అందుకే చంద్రబాబు, లోకేష్, చింతమనేని అనే పేర్లు తప్ప, వేరే పేరులే ఆ నోట్లో నుంచి రావటం లేదు. ఇప్పటి వరకు తిట్టినట్టే వీళ్ళను తిట్టాడు. ఇక ఎన్నో జ్ఞాన గుళికలు కూడా వదిలాడు. పంచాయతీ రాజ్ మంత్రి కావాలి అంటే, పంచాయతీలో గెలవకుండా ఎలా అన్నాడు ? మరి నువ్వు ఇప్పటి వరకు ఏం గెలిచావ్ అంటే సమాధానం ఉందా పవన్ ?

ఒక కానిస్టేబుల్‌ కొడుకు సీఎం కాలేడా? అని పవన్ అడుగుతున్నాడు. టీ అమ్మే వాడు ప్రధాని అయ్యారు పవన్ గారు, దానికి చిత్తశుద్ధి ఉండాలి, ప్రజల పట్ల బాధ్యత ఉండాలి, శ్రీకాకుళం ఆపదలో ఉంటే, సంబరాలు చేసుకుంటున్న మిమ్మల్ని, సియం ఎలా చేస్తారు ? మీ అన్న కూడా ఇవే డైలాగ్ లు చెప్పి, అమ్మేశాడు. ఇప్పుడు మీరు. ఇవన్నీ సరే, నక్సల్స్ ని సమర్ధిస్తూ, ఒక ఎమ్మల్యే, ఒక మాజీ ఎమ్మల్యే హత్యలను సమర్ధిస్తున్న నువ్వు, ఏం సందేశం ఇస్తున్నావ్ ? మొన్నటి దాక నా మీద ఐటి రైడ్లు జరిగాయి అని గోల చేసిన నువ్వు, ఇప్పుడు మోడీని ఎదురుస్తున్న చంద్రబాబు పై ఐటి దాడులు చేస్తుంటే, వాటిని సమర్ధిస్తూ, మోడీ భక్తుడుని అని నిరూపించుకున్నావ్. శ్రీకాకుళం తుఫాను మీద ఒక్క మాట లేదు ? ఒక జిల్లా నాశనం అయితే, వారికి కనీస సానుభూతి ప్రకటిద్దాం అనే స్పృహ లేదు. ఇక మోడీ అనే మాట నోట్లో నుంచి వస్తే ఒట్టు. కేంద్రం చేస్తున్న అన్యాయం, విభజన హామీల పై ఒక్క మాట లేదు. జాయింట్ ఫాక్ట్ ఫైండింగ్ కమిటీలో తేల్చిన 73 వేల కోట్ల గురించి ఎక్కడా లేదు. ఇవన్నీ మాట్లాడకుండా, కారులో కవాతు చేసి, లోకేష్, చంద్రబాబు మీద రాజకీయ ఆరోపణలు చేసి, సాధించింది ఏమిటి ?

కొన్ని రోజుల క్రిందట, రాజకీయ కక్షతో కొంత మంది, లోకేష్ పై సిబిఐ విచారణ కోరుతూ, హైకోర్ట్ కు వెళ్తే, అక్కడ కోర్ట్ కొట్టేసిన విషయం చూసాం. కనీస ఆధారాల్లేకుండా విచారణ ఎలా అని ప్రశ్నించింది. ప్రస్తుతానికి అక్కడ కథ ముగిసింది. అయితే కోర్ట్ కొట్టేసినా, సిబిఐ మాత్రం ఉత్సాహంగా ఉంది. కారణం మీకు తెలిసిందే. కేంద్ర ప్రభుత్వానికి ఉన్న ఐటీ, ఈడీ, సీబీఐ అనే మూడు నేత్రాల్లో... ఇప్పటికే ఐటీ, ఈడీ రాష్ట్రంపై దృష్టి సారించాయి. తాజాగా... పారిశ్రామిక రాయితీలు, ప్రోత్సాహకాలపై సీబీఐ కూడా కన్ను తెరిచినట్లు విశ్వసనీయంగా తెలిసింది. పారిశ్రామిక రాయితీలపై బీజేపీ నేతలు ముఖ్యమంత్రి చంద్రబాబు, ఆయన కుమారుడైన ఐటీశాఖ మంత్రి లోకేశ్‌పై నేరుగా విమర్శలు గుప్పిస్తున్న సంగతి తెలిసిందే.

ఈ విషయంలో కోర్టు జోక్యం చేసుకోవడానికి అంగీకరించనప్పటికీ... కేం ద్రం మాత్రం ‘గో ఎహెడ్‌’ అంటూ సీబీఐని ఆదేశించినట్లు సమాచారం. ఇప్పటికే అంతర్గతంగా ఆరా తీయడం మొదలైందని... త్వరలో సీబీఐ బృందాలు నేరుగా రంగంలోకి దిగుతాయని పరిశ్రమ వర్గాల్లో ప్రచారం జరుగుతోంది. రాష్ట్రంలో పెట్టుబడి వర్గాలను భయభ్రాంతులకు గురి చేయడంలో భాగంగానే ఈడీ, ఐటీ సోదాలు జరుగుతున్నాయని టీడీపీ నేతలు ఇప్పటికే ఆరోపిస్తున్నారు. సీబీఐ కూడా రంగప్రవేశం చేస్తే టీడీపీ, బీజేపీ మధ్య యుద్ధం తీవ్రంకానుంది.

ఐటీ కంపెనీలకు కేంద్రం కూడా రాయితీలు అందిస్తోంది. ఐటీ శాఖను స్వయానా లోకేశ్‌ నిర్వహిస్తున్నారు. ఈ నేపథ్యంలోనే విపక్షాలు ఈ అంశంపై ప్రత్యేక దృష్టి సారించాయి. ఎలక్ర్టానిక్స్‌, ఐటీ రంగాల్లో పెట్టుబడులు పెద్దగా రావడంలేదని.. బినామీ కంపెనీలకు వందల కోట్ల రూపాయలు రాయితీల పేరిట చెల్లించారని బీజేపీ రాజ్యసభ సభ్యుడు జీవీఎల్‌ ఆరోపించారు. రాష్ట్రంలో పారిశ్రామిక ప్రోత్సాహకాలపై ఇచ్చి న జీవోలనూ.. సమాచారాన్ని ఇవ్వాలని జీవీఎల్‌ డిమాండ్‌ చేశారు. అయితే... పరిశ్రమ, ఐటీ శాఖ అధికారులు ఇప్పటిదాకా ఈ ఆరోపణలను పెద్దగా పట్టించుకోలేదు. ఇదంతా రాజకీయంలో భాగమని భావిస్తూ వచ్చారు. ‘‘ఇప్పుడు నేరు గా సీబీఐ రంగంలోకి దిగుతున్నట్లు తెలియడం ఆశ్చర్యం కలిగిస్తోంది. అంతా పారదర్శకంగానే జరుగుతోంది. సీబీఐ దర్యాప్తునకు భయపడాల్సిన అవసరమే లేదు’’ అని పరిశ్రమల శాఖ వర్గాలు తెలిపాయి.

ఆంధ్రా-ఒడిశా సరిహద్దు ఆండ్రగూడ వద్ద నాలుగు రోజుల కిందట పోలీసుల కాల్పుల్లో తెలంగాణ జనగామ జిల్లాకు చెందిన మహిళా మావోయిస్టు మీనా అలియాస్ ప్రమీల మృతిచెందిన విషయం తెలిసిందే. ఆండ్రగూడ ఎన్‌కౌంటర్‌పై స్పందించిన మావోయిస్టులు ఈ మేరకు వారి ప్రతినిధి కైలాసం ఆడియో టేపును విడుదల చేశారు. ఓ ద్రోహి ఇచ్చిన సమాచారంతోనే పోలీసులు మావోయిస్టులను చుట్టుముట్టి మీనాను అతి సమీపం నుంచి కాల్చి చంపారని ఆరోపించారు. కాల్పుల్లో గాయపడిన మీనాను అదుపులోకి తీసుకునే అవకాశం ఉన్నప్పటికీ అలా చేయకుండా హతమార్చారని పేర్కొన్నారు.

మీనా మృతి మావోయిస్టులకు తీరని లోటని అన్నారు. ఏవోబీలోని ఆండ్రపల్లి, జోడాంబో, పనసపుట్టు తదితర ప్రాంతాల్లోని గిరిజనులను భద్రతా దళాలు చిత్రహింసలకు గురిచేస్తున్నాయని, వారిని మావోయిస్టులుగా ముద్ర వేస్తున్నారని కైలాసం ధ్వజమెత్తారు. కటాఫ్‌ ఏరియాలోని వివిధ మండలాల్లో ఈ దురాగతాలు కొనసాగుతున్నాయని తెలిపారు. చుట్టరికం కోసం వచ్చిన వారిని పోలీసులు అదుపులోకి తీసుకుని మావోయిస్టులుగా చిత్రీకరించారని ఆయన మండిపడ్డారు. ఆంధ్రా–ఒడిశా సరిహద్దులో జరిగిన ఎదురుకాల్పుల్లో మీనా మృతి చెందలేదని, ఇరు రాష్ట్రాల పోలీసులు కాల్చి చంపారని బంధుమిత్రుల సంఘం ఆరోపించింది.

ఎమ్మెల్యే కిడారి సర్వేశ్వర్రావు, మాజీ ఎమ్మెల్యే సివేరి సోమ హత్యల తర్వాత ఆంధ్రా ఒడిశా బోర్డర్‌లో ముమ్మరంగా కూంబింగ్ చేపట్టారు పోలీసులు. బెజ్జింకి ప్రాంతంలోని అడవుల్లో తమకు తారసపడ్డ నక్సల్స్‌పై కాల్పులు జరపడంతో మీనా చనిపోయింది. మీనా మృతికి సంతాపం తెలుపుతూ.. ఇప్పుడు కైలాసం పేరుతో ఆడియో బయటకు వచ్చింది. ఎమ్మెల్యే, మాజీ ఎమ్మెల్యేల హత్య తర్వాత దీనికి కారణాలపై ఇంత వరకూ ఎలాంటి ప్రకటన చేయని మావోయిస్టులు.. మీనా ఎన్‌కౌంటర్‌పై ఆడియో విడుదల చేయడం చర్చనీయాంశమైంది.