news

మొన్నటి దాక, కేంద్రంలో మీ మంత్రులని రాజీనామా చేపించండి... ప్రత్యేక హోదా ఇచ్చి తీరతారు చూడండి అని అన్నారు... కేంద్రంలో నుంచి బయటకు వచ్చారు, ఏమైంది ? ఎకౌంటులో వేసిన 350 కోట్లు కూడా వెనక్కు తీసుకున్నాడు మన ప్రధాని... అది అయిపోయిన తరువాత, మీరు ఇంకా ఎన్డీఏలోనే ఉంటే ఏమవుతుంది ? మోడీ మీద ఒత్తిడి తేవాలి అంటే, బయటకు రండి అన్నారు... బయటకు వచ్చారు, ఏమైంది ? అవిశ్వాసం పెట్టండి, నేను మద్దతు తీసుకువస్తా అని ఒకడు, నేను అవిశ్వాసం పెడుతున్నా మీరు మద్దతు ఇవ్వండి అని, ప్రధాని ఆఫీస్ లోనే కూర్చున్నాడు ఇంకొకడు... వీళ్ళ మాటలు వినకుండా, తెలుగుదేశమే సొంతగా అవిశ్వాసం పెట్టింది... ఒక్క గంటలో, దేశంలోని అన్ని విపక్షాలు చంద్రబాబుకి మద్దతు ఇచ్చాయి... కాని ఏమైంది ? పారిపోతున్నారు...

అఖిలపక్షం పెట్టండి, అందరం కలిసి పోరాడదాం అని ఒకడు, తెలంగాణ తరహా పోరాటం అని ఇంకొకడు అన్నాడు... తీరా అవిశ్వాసం పెడితే, మోడీకి వ్యతిరేకంగా మేము రాము అని, ఇద్దరూ రాలేదు... ప్రతి దాంట్లో చంద్రబాబు, వీరి కంటే ఒక అడుగు ముందుకు వేసి, కేంద్రంతో పోరాడుతున్నారు... కాని వీరు మాత్రం అప్పుడు ఒకలా, ఇప్పుడు మరొకలా మాట్లాడుతున్నారు... వీరి ఇద్దరి చేత, చంద్రబాబుని అమరావతిలోనే కొట్టుకుంటూ చెయ్యాలని ఢిల్లీ పెద్దలు ప్లాన్ వేస్తే, చంద్రబాబు మాత్రం రాత్రికి రాత్రి, వీళ్ళు నా ముందు బచ్చాలు, నా యుద్ధం నీతోనే అని, వీరి ప్లాన్ తిప్పికొట్టి, సీన్ ఢిల్లీకి, ఆంధ్రాకి మధ్య అనే విషయం మరోసారి గుర్తు చేసి, అటు ఢిల్లీ పెద్దలు, ఇటు ఇక్కడ ఉన్న బచ్చాలకు జర్క్ ఇచ్చాడు చంద్రబాబు...

ఇప్పుడు ఢిల్లీ పెద్దలు ఎంత ప్రయత్నం చేసినా, చంద్రబాబు ఎక్కడా దొరకటం లేదు... కేసుల్లో ఇరికిద్దాం అంటే, కేంద్ర సంస్థలే అన్నీ బాగున్నాయి అని రిపోర్ట్ లు ఇస్తున్నాయి.. అందుకే, ఇప్పుడు జగన్ మోహన్ రెడ్డి చేత మరో డ్రామాకు తెర లేపారు... మేము మా ఎంపీ సీట్లకు రాజీనామా చేస్తున్నాం, మీరు కూడా చెయ్యండి అంటూ తెలుగుదేశం పార్టీని రెచ్చగొడుతున్నారు... దీని వెనుక అమిత్ షా బుర్ర ఉన్నట్టు చెప్తున్నారు... ఎలాగైనా తెలుగుదేశం ఎంపీలను రెచ్చగొట్టి, వారిని రాజీనామా చేపించే బాధ్యత జగన్ మోహన్ రెడ్డికి అప్పచేప్పినట్టు తెలుస్తుంది... స్క్రిప్ట్ లో భాగంగా, పవన్ కూడా, తెలుగుదేశం ఎంపీలను రాజీనామా చెయ్యమంటారు...

దీని వెనుక ఉన్న ప్రధాన కారణం, తెలుగుదేశం ఎంపీలు, పార్లమెంట్ లోపల రచ్చ రచ్చ చేస్తున్నారు... దేశం మొత్తానికి, మోడీ చేస్తున్న మోసం చెప్తున్నారు... మిస్టర్ ప్రైమ్ మినిస్టర్ అంటూ, మోడీ పరువు తీస్తున్నారు... ఇంకా సంవత్సర కాలం ఉంది... తెలుగుదేశం ఎంపీలు, మోడీ, అమిత్ షా చేస్తున్న ద్రోహం అంతా సభ సాక్షిగా చీల్చి చెండాడుతారు.. అందుకే వీరిని రెచ్చగొట్టి రాజీనామా చేసే బాధ్యత వైసిపీకి అప్ప చెప్పారు అమిత్ షా... వీరు బయటకు వెళ్తే, ఎవరూ వీరిని పట్టించుకోరు... సభలో గొడవ చేస్తే అటన్షన్ వస్తుంది... అందుకే తెలుగుదేశం ఎంపీలను ఎలా అయినా రెచ్చగొట్టాలి, రాజీనామా చేసేలా చెయ్యాలి అనేది ప్లాన్... ఇక్కడ వింత ఏంటి అంటే, విజయసాయి రెడ్డి మాత్రం రాజీనామా చెయ్యడు అంట, మిగతా వారు చేస్తారు అంట... అసలు రాజీనామాలు చేసి ఏమి సాధిస్తారు ? ఇంకో సంవత్సరం పాటు ఎవరు పార్లిమెంట్ లో మన వాయిస్ వినిపిస్తారు, అంటే మాత్రం, ఒక్క వైసిపీ ఎంపీ సమాధానం చెప్పడు.. ఏ ప్రశ్న అడిగినా, తెలుగుదేశం ఎంపీలు రాజీనామా చెయ్యాలి అనే డైలాగ్ ఒక్కటే చెప్తున్నారు... అందుకే ఇక రాబోయే వారం రోజులు, మనకు సాక్షి టీవీలో, హోదా గురించి కాని, విభజన హామీలు గురించి కాని, ఏ వార్త ఉండదు... తెలుగుదేశం ఎంపీలు రాజీనామా చెయ్యాలి అనే వార్తలతో ఒక క్యాంపైన్ నడవ బోతుంది...

జాయింట్ ఫాక్ట్ ఫైండింగ్ కమిటీ అంటూ జనసేన అధినేత పవన్ కళ్యాణ్ చేసిన హడావిడి అందరూ చూసాం.. అందులో కేంద్రం, మన రాష్ట్రానికి అన్యాయం చేసింది అని, 75 వేల కోట్లు రాష్ట్రానికి రావాలని తేల్చారు... అందులో లోక్‌సత్తా వ్యవస్థాపకుడు జయప్రకాశ్ నారాయణ కూడా ఒక భాగస్వామిగా ఉన్నారు... అయితే, ఒకే ఒక ప్రెస్ మీట్ పెట్టి, జాయింట్ ఫాక్ట్ ఫైండింగ్ కమిటీ రిపోర్ట్ వివరాలు చెప్పిన పవన్ కళ్యాణ్, తరువాత ఆ విషయం మర్చిపోయారు... అనూహ్యంగా, మోడీని ఒక్క మాట కూడా అనకుండా, కేంద్రం పై పోరాడుతున్న చంద్రబాబు పై రివర్స్ అయ్యారు... అంతే కాదు, ఒక పెద్ద మీటింగ్ పెట్టి, జాయింట్ ఫాక్ట్ ఫైండింగ్ కమిటీ రిపోర్ట్ లోని అంశాలు కనీసం ప్రస్తావించ లేదు...

అసలు జాయింట్ ఫాక్ట్ ఫైండింగ్ కమిటీ రిపోర్ట్ అనేది, మర్చిపోయారు... తరువాత ఏమి చెయ్యాలి అనే కార్యాచరణ లేదు... దీంతో ఆ కమిటీలో జయప్రకాశ్ నారాయణ లాంటి పెద్దలు తీవ్ర మనస్తాపానికి గురయ్యారు... పవన్ కళ్యాణ్ రాజకీయ గేమ్ ఆడాడు అని, కేంద్రం ఆడించిన డ్రామా అని గుర్తించారు... అందుకే జయప్రకాశ్ నారాయణ రెండు రోజుల క్రిందట, స్వతంత్ర నిపుణుల బృందం ఏర్పాటు చేసారు... ఇందులో అందరు ఐఏఎస్ లు, ఐపీఎస్ లు, నిపుణులు మాత్రమే ఉన్నారు... జాయింట్ ఫాక్ట్ ఫైండింగ్ కమిటీలాగ, ఉండవల్లి, పవన్ కళ్యాణ్ లాంటి స్వార్ధ పరులని ఇందులో తీసుకోలేదు..

జయప్రకాశ్ నారాయణ ఆధ్వర్యంలో స్వతంత్ర నిపుణుల బృందం, ఈ రోజు మొదటి సమావేశం జరిగింది. కేంద్ర, రాష్ట్ర ప్రభుత్వాల మధ్య వారధిలా పనిచేస్తూ వివాద పరిష్కారానికి తోడ్పాటునందించే పౌర సమాజంగా వ్యవహరించడం, ఇతరత్రా అంశాలపై అధ్యయనం చేసి పరిష్కారానికి కృషి చేయడం వంటి పనులను నిర్వర్తించడానికి ఈ బృందం పని చేస్తుంది... మొదటి సమావేశం తరువాత జయప్రకాశ్ నారాయణ మీడియాతో మాట్లాడారు... జేఎఫ్‌సీపై పవన్ కల్యాణ్ తొలుత చూపిన శ్రద్ధ తర్వాత చూపలేదని, అందుకే స్వతంత్ర నిపుణుల బృందం ఏర్పాటు చేసుకున్నామని చెప్పారు... జేఎఫ్‌సీ లెక్కలు తేల్చిన తర్వాత, పవన్ వైపు నుంచి ఎలాంటి చర్యలు లేవని, అందుకే స్వతంత్ర నిపుణులతో కమిటీ ఏర్పాటు చేశామన్నారు... జేఎఫ్‌సీ తొలిదశ అయితే... నిపుణుల కమిటీ రెండో దశ అని జేపీ అన్నారు... కేంద్రం సమయమిస్తే వెళ్లి కలుస్తామని అన్నారు..

మన తెలుగు సినీ ఇండస్ట్రీ, మన ఆంధ్రప్రదేశ్ రాష్ట్రం పై చూపిస్తున్న ప్రేమ, కొన్నేళ్ళుగా చూస్తూనే ఉన్నాం... తెలంగాణా పై ప్రేమో, కెసిఆర్ అంటే భయమో కాని, మన ఆంధ్రప్రదేశ్ అంటే ఎప్పుడూ చిన్న చూపే... అయితే, ప్రత్యేక హోదా, విభజన హామీల విషయంలో ఆంధ్రప్రదేశ్ ప్రజలు ఆందోళన బాట పట్టటంతో, సినీ ఇండస్ట్రీ నుంచి సపోర్ట్ వస్తుంది అని అందరూ అనుకున్నారు.. అయితే, తమిళనాడు జల్లికట్టుకు మద్దతు ఇచ్చిన మన సినీ హీరోలు, మన ఆంధ్రప్రదేశ్ సమస్య పై మాత్రం స్పందించలేదు... ఈ క్రమంలో కొంత మంది రాజకీయ నాయకులు కూడా, తెలుగు సినీ ఇండస్ట్రీ పై విమర్శలు చేసారు... నంది అవార్డులు పై రచ్చ చేసిన వారు, మా సమస్యల పై కనీసం స్పందించరా అంటూ, విమర్శలు చేసారు..

ఈ పరిస్థుతుల్లో, కొంత మంది సినీ ప్రముఖులు ఈ రోజు అమరావతి వచ్చారు... జెమిని టివి ఎండి పి.కిరణ్ నేతృత్వంలో ముఖ్యమంత్రిని కలిసారు... కేంద్రం పై యుద్ధం చేస్తున్న ముఖ్యమంత్రి చంద్రబాబుకు సంపూర్ణ మద్దతు ప్రకటిస్తున్నామని టాలీవుడ్ పరిశ్రమ తెలిపింది... ఉండవల్లి నివాసంలో సీఎం చంద్రబాబును కలిసిన టాలీవుడ్ ప్రముఖులు, విభజన హామీల అమలు కోసం సీఎం చంద్రబాబు చేస్తున్న పోరాటానికి బాసటగా నిలుస్తామని తెలిపారు...

సీఎం చంద్రబాబును కలిసిన వారిలో కెఎల్ నారాయణ, జీకే , అశ్వనీదత్ , కేఎస్ రామారావు , కె. వెంకటేశ్వరారావు, కె. రాఘవేంద్రరావు , జెమిని కిరణ్ ఉన్నారు... అఖిల పక్షం పిలువు మేరకు ఏప్రిల్ 6 వరకు, నల్లబ్యాడ్జీలతో నిరసన తెలుపుతామని సినీ పరిశ్రమ చెప్పింది... సినిమా షూటింగ్ లకు కూడా నల్ల బ్యాడ్జీలతోనే హాజరవుతామని తెలిపారు... ఈ సందర్భంగా రాష్ట్రానికి కేంద్ర ప్రభుత్వం ఏ విధంగా అన్యాయం చేస్తోందనే విషయాన్ని సినీ ప్రముఖులకు చంద్రబాబు వివరించినట్టు సమాచారం... అయితే, తెలుగు సినీ పరిశ్రమ నిర్ణయంతో, ఆంధ్రప్రదేశ్ ప్రజలు అవాక్కయ్యారు... ఇప్పటికైనా, తెలుగు సినీ పరిశ్రమ, మనకు మద్దతు తెలపటం పై, సంతోషం వ్యక్తం చేస్తున్నారు... బలమైన కేంద్రంతో పోరాటం చేసే సమయంలో, తెలుగు సినీ పరిశ్రమ మద్దతు తెలపటం ఆహ్వానించదగ్గ పరిణామం అని, ఇలాగే సినీ పరిశ్రమ అన్ని విషయాల్లో ఆంధ్రప్రదేశ్ కు అండగా నిలబడాలని ప్రజలు కోరుకుంటున్నారు...