news

ఆంధ్రప్రదేశ్ రాష్ట్రంలో దేవాలయాల పై జరుగుతున్న వరుస సంఘటనలు ప్రతి ఒక్కరినీ కలిచి వేస్తున్నాయి. ఇక్కడ అందరికీ ఆందోళన కలిగించే అంశం ఏమిటి అంటే, ఇప్పటి వరకు ఇవి చేస్తున్న వారు ఎవరు అని పోలీస్ వారు పట్టుకోలేక పోవటం. ఏవో చిన్న చిన్న ఘటనలలో పట్టుకున్నా, వాటి వల్ల పెద్ద ఉపయోగం లేక పోయింది. జరుగుతున్న కుట్రలు ఏమిటో చెప్పే వారు లేరు. ప్రభుత్వంలో ఉండే మంత్రులు, పోయింది చేయి కదా, రధమే కదా అంటూ లైట్ గా మాట్లాడుతున్నారు. ఏకంగా ముఖ్యమంత్రి ప్రతిపక్షాల కుట్ర అని తీసి పారేసారు. ఘటనలు మాత్రం, ఆగటం లేదు, జరుగుతూనే ఉన్నాయి. మాజీ ముఖ్యమంత్రి చంద్రబాబు నాయుడు రంగంలోకి దిగటంతో, మొత్తం విషయం హైలైట్ అయ్యింది. నాలుగు రోజుల నుంచి మొత్తం దీని చుట్టూతే నడుస్తున్నాయి. మిగతా ప్రతిపక్షాలు కూడా ఈ విషయం పై ఆందోళన చేస్తూనే ఉన్నాయి. ఈ క్రమంలోనే రామతీర్ధం వెళ్లి, జరిగిన ఘటన పరిశీలిస్తాం అంటూ, బీజేపీ, జనసేన నాయకులు ఈ రోజు ఒక పిలుపు ఇచ్చారు. అయితే వారిని వెళ్ళనివ్వకుండా పోలీసులు అడ్డుకున్నారు. నిన్న రాత్రి నుంచే హోస్ అరెస్ట్ లు చేసారు. అన్ని జిల్లాల నాయకులను హౌస్ రెస్ట్ చేసారు. కన్నా లక్ష్మీనారాయాణ లాంటి సీనియర్ నేతలను కూడా హౌస్ అరెస్ట్ చేసారు.

అయితే సోము వీర్రాజు మాత్రం ఈ రోజు ఉదయం అక్కడ ప్రత్యక్షం అయ్యారు. మరి అయ్యన్ను హౌస్ అరెస్ట్ చేయలేదో, లేదా ఆయన ఎలా ఇక్కడ వరకు వచ్చారో కానీ వచ్చారు. ఇక్కడ ఒక పెద్ద సీన్ జరిగింది. పోలీసులు తోపులాటలు అంటూ హడావిడి జరిగి, మొత్తానికి సోము వీర్రాజుని జీప్ లో వేసి తీసుకుని వెళ్ళిపోయారు. అయితే నిన్నటి వరకు అన్ని పార్టీల నేతలను పైకి వెళ్ళటానికి ఒప్పుకున్న ప్రభుత్వం, ఈ రోజు సోము వీర్రాజు ను ఎందుకు పైకి వెళ్ళనివ్వలేదో అర్ధం కాలేదు. పోలీసులు మాత్రం, మొన్న చంద్రబాబు, విజయసాయి రెడ్డి వచ్చిన సమయంలో జరిగిన ఘటనలు దృష్టిలో పెట్టుకుని పర్మిషన్ ఇవ్వలేదు అంటున్నారు. అయితే ప్రభుత్వంతో సఖ్యతగా ఉండే సోము వీర్రాజుని ఒక్కడినే పంపించకపోవటం పై మాత్రం, సోషల్ మీడియాలో పలువురు పలు రకాలుగా స్పందిస్తున్నారు. అసలు వీర్రాజు ఇక్కడ వరకు ఎలా వచ్చారు, అందరినీ హౌస్ అరెస్ట్ చేస్తున్నారు కదా అని, అలాగే వీర్రాజు వెళ్తే ఏమి అవుతుంది, అనవసరంగా ప్రభుత్వమే హైప్ ఇచ్చి, చంద్రబాబు వచ్చిన రోజు ఘటన మర్చిపోవటానికి, ఇలా చేసారేమో అని అంటున్నారు. అయితే పోలీసులు మాత్రం, మొన్న జరిగిన ఘటనకు జాగ్రత్త పడ్డాం అని చెప్తున్నారు. మరి సోము వీర్రాజుకి ఈ రోజు ఎంత మైలేజి వచ్చిందో, బీజేపీ పార్టీకే తెలియాలి.

ఆంధ్రప్రదేశ్ ప్రభుత్వం తనని అకారణంగా వేధిస్తుంది అంటూ, ఐపీఎస్ అధికారి ఏబీ వెంకటేశ్వరరావు, ఐపీఎస్ ఆఫీసర్స్ అసోసియేషన్‍కు సంచలన లేఖ రాసారు. తన పై క్రిమినల్ కేసు పెట్టి, అరెస్ట్ చేసి, మళ్ళీ జ్యూడిషియల్ రిమాండ్‍కు పంపించి, మళ్ళీ సస్పెండ్ చేసే ప్లాన్ వేసారని, ఏబీవీ తెలిపారు. తన దగ్గర దీనికి సంబంధించి పూర్తి ఆధారాలు ఉన్నాయని అన్నారు. ఇది లేఖ సారాంశం "ఆంధ్రప్రదేశ్ ప్రభుత్వం నా పై కక్ష సాధింపుకు పాల్పడుతుంది. ఏపిలో కొత్త ప్రభుత్వం వచ్చిన రోజే నన్ను ఏసిబీ డీజీ పోస్ట్ నుంచి తప్పించి, జీఏడీలో రిపోర్ట్ అవ్వమన్నారు. కొన్ని నెలలుగా నాకు జీతం కూడా ఇవ్వకపోయినా, నేను ఓర్పుగా ఉండి, చివరకు వారికి లేఖ రాయాల్సి వచ్చింది. రెండు సార్లు ఈ విషయం పై, తన పోస్టింగ్ విషయం పై లేఖ రాసాను. నన్ను పక్కన పెట్టి, జీతం కూడా ఇవ్వని సమయంలో, నా పై ఎలాంటి కేసు కూడా లేదు. నా 30 ఏళ్ళ సర్వీస్ లో ఎప్పుడూ నా పై ఒక్క ఆరోపణ కూడా రాలేదు. అయితే నా లేఖల పై ఎలాంటి వివరణ ఇవ్వక పోగా, నా పై ఆరోపణలు మోపారు. నా పై ఏవో ఎంక్వయిరీ అంటూ, చివరకు ఫిబ్రవరి 2020లో నన్ను సస్పెండ్ చేసారు. నన్ను సస్పెండ్ చేయటమే కాకుండా, నా పై కావాలని మీడియాలో వ్యతిరేకంగా ఒక పెద్ద క్యాంపైన్ నడిపారు.

"క్యాట్ కు వెళ్ళాను, తరువాత హైకోర్టుకు వెళ్ళాను. చివరకు హైకోర్టులో నా సస్పెన్షన్ ఎత్తేసి, జీతాలు ఇవ్వమని ఆదేశించారు. అయితే హైకోర్టు ఆర్డర్ ని ప్రభుత్వం పట్టించుకోలేదు. ఆరు నెలల తరువాత సుప్రీం కోర్టుకు వెళ్ళారు. అయితే ఈ న్యాయ పోరాటాల కోసం, నా పర్సనల్ సేవింగ్స్ నుంచి డబ్బులు ఖర్చు చేయాల్సి వచ్చింది. నా సస్పెన్షన్ అయిన పది నెలలు తరువాత చార్జెస్ మోపారు. అయితే దీని పై నేను తప్పు చేయలేదని నిరూపించుకునే క్రమంలోనే, నా పై మరో కుట్ర పన్నుతున్నారని సమాచారం ఉంది. నా పై క్రిమినల్ కేసు పెట్టి జ్యూడిషియల్ రిమాండ్‍కు పంపి మళ్లీ సస్పెన్షన్ విధించే అవకాశం ఉంది. బెయిల్ కూడా తీసుకోకుండా, కుట్ర పన్నుతున్నారు. ఇవన్నీ నేను ఆన్ రికార్డు చెప్తున్నాను. దీని పై నా దగ్గర సమగ్ర సమాచారం ఉంది. అసోసియేషన్ జనరల్ బాడీ ఏర్పాటు చేస్తే అన్ని ఆధారాలు మీ ముందు ఉంచుతాను. మీ నుంచి నేను ఏ ఫేవర్ కోరటం లేదు కానీ, మీ దృష్టికి ఈ విషయం తీసుకుని వస్తున్నాను. ప్రభుత్వం నన్ను ఎలా వేదిస్తుందో చెప్తున్నాను." అని ఏబీ వెంకటేశ్వరరావు లేఖలో తెలిపారు.

ఆంధ్రప్రదేశ్ రాష్ట్రంలో ఎన్నో జరుగుతున్నా, ఇప్పటి వరకు కేంద్రం స్పందించింది లేదు. ఇక మరో పక్క అంతర్వేది లాంటి ఘటనల పై సిబిఐ విచారణ జరిగినా కేంద్రం ముందుకు రాలేదు. అయితే ఏపిలో బీజేపీ మాత్రం, జగన్, చంద్రబాబు ఒకటే అని చెప్పే ప్రయత్నం చేస్తుంది. మాట్లాడితే విజయవాడలో గుడులు కూల్చారు అని ప్రచారం చేసింది. అయితే దీని పై అచ్చెన్నాయుడు, తెలుగుదేశం పార్టీ సీరియస్ గా స్పందించింది. ఘాటుగా బీజేపీకి బదులు ఇచ్చారు. అచ్చెన్నాయుడు మాటల్లో, "ఈ రోజు బీజేపీ నయాకులు, మాట్లాడితే మనల్ని విమర్శిస్తున్నారు. మాట్లాడితే మన భజన చేస్తున్నారు. నేను వారికి కూడా, ఈ సమావేశం ద్వారా కొన్ని ప్రశ్నలు అడుగుతున్నాను. మీ బాధ్యత మీరు నిర్వహించాలి. మాట్లాడితే చంద్రబాబు దేవాలయాలు కూల్చుతున్నాడు, ఈ రోజు జగన్ మోహన్ రెడ్డి కూల్చుతున్నాడు అంటూ, ఈ రోజు ప్రజలకు మభ్య పెట్టే ప్రచారం బీజేపీ చేస్తుంది. మేము ఎక్కడ కూల్చాం ? మేము ఎప్పుడూ దేవాలయాలు కూల్చలేదు. విజయవాడలో కేంద్ర ప్రభుత్వ సహకారంతో, ఒక ఫ్లై ఓవర్ మంజూరు అయితే, అప్పటి కేంద్ర మంత్రి నితిన్ గడ్కరీ ఆదేశాల మేరకు, ఆ రోజు ప్రభుత్వం, ఆ ప్రభుత్వంలో దేవాదాయ శాఖ మంత్రిగా ఉన్నారు బీజేపీ వాళ్ళు. ఆయన చనిపోయారు కాబట్టి, ఆయన్ను వివాదంలోకి లాగటం లేదు. ఆయన ఆధ్వర్యంలో అప్పట్లో ఫ్లై ఓవర్ కు అడ్డంగా ఉన్నటు వంటి, దేవాలయాలను తీసి, ఫ్లై ఓవర్ కడితే, ఈ రోజు జగన్ మోహన్ రెడ్డి కర్కశంగా దేవాలయాలు పడగొడుతుంటే, దానికి దీనికి ముడి పెట్టి మా పై విమర్శలు చేస్తున్న బీజేపీని ఏమనాలో ఒకసారి ఆలోచించుకోవాలి.

"మీ మాటలకు చేతలకు, తేడా లేదు. ప్రసంగాలు పెద్దగా చేస్తున్నారు కానీ, చేతలు మాత్రం ఎక్కడా లేవు. ఈ రోజు రాష్ట్రంలో ఎందుకు మాట్లాడుతున్నాను అంటే, ఇది పార్టీ అభిప్రాయం కాకపోయినా, ఈ వేదిక మీద నుంచి ఒక పౌరుడిగా, ఒక హిందువుగా నేను మాట్లాడుతున్నాను. ఈ రోజు మీకు బాధ్యత లేదా ? ఆంధ్రప్రదేశ్ రాష్ట్రంలో మత మార్పిడులు విపరీతంగా జరుగుతున్నాయి. మన దేవాలయాల్లో, వారు వచ్చి క్యులో ఉంటున్నారు. అన్యమత ప్రచారం చేస్తున్నారు. ప్రతి రోజు కళ్ళకు కొట్టి వచ్చినట్టుగా కనిపిస్తుంది. ఇన్ని చూస్తూ కేంద్ర ప్రభుత్వం, ఆంధ్రప్రదేశ్ రాష్ట్రంలో మత మార్పిడులు ఎందుకు అరికట్టలేదు ? అరికట్ట వలసిన బాధ్యత మీకు లేదా ? ఈ రోజు 140 ఘటనలు జరిగాయి. ఒక క్రీస్టియన్ గా ఉన్న ముఖ్యమంత్రి ఇన్ని అరాచకాలు చేస్తుంటే, కేంద్రం ఎందుకు స్పందించటం లేదు ? ఎందుకు ఈ కేసులు సిబిఐకి ఇచ్చి ఎందుకు ఎంక్వయిరీ చేయటం లేదని, మేము బీజేపీని కూడా అడుగుతున్నాను. అప్పుడు మీరు చెప్పే మాటలు, ప్రజలు నమ్ముతారు." అని అచ్చెన్నాయుడు అన్నారు.