news

టీడీపీ సీనియర్ నేత, అనంతపురం మాజీ ఎంపీ జేసీ దివాకర్ రెడ్డికి జగన్సర్కార్ మరో ఝలక్ ఇచ్చింది. ఇప్పటికే జేసీ దివాకర్ రెడ్డికి సంబంధించిన ట్రావెల్ బస్సులను సీజ్ చేసిన ప్రభుత్వం ఇప్పుడు తాజాగా ఆయనకు సంబంధించిన త్రిశూల్ సిమెంట్ కంపెనీ లీజును రద్దు చేసింది. ఈ మేరకు శుక్రవారం ఉత్తర్వులు జారీ చేసింది. యాడికి మండలం కొనుప్పలపాడులో 649.86 హెక్టార్ల పరిధిలోని సున్నపు రాయి గనుల లీజులను ప్రభుత్వం రద్దు చేస్తూ ఉత్తర్వులు జారీ చేసింది. ఇదే సమయంలో సిమెంట్ తయారీ ప్లాంట్ నిర్మాణానికి గతంలో 5 ఏళ్ల గడువు ఇస్తూ జారీ చేసిన ఉత్తర్వులను సైతం ఉపసంహరించుకుంది. ప్రభుత్వం జారీ చేసిన ఉత్తర్వుల్లో ఇప్పటి వరకు ప్లాంట్ నిర్మాణానికి సంబంధించి ఎటువంటి పనులు ప్రారంభం కానందున ఈ గడువును రద్దు చేస్తున్నట్లు స్పష్టం చేసింది. మరోవైపు 38,212 సున్నపురాయి నిక్షేపాలను అక్రమంగా తవ్వకాలు జరిపి రవాణా సాగించారని దీనిపై విచారణకు ఆదేశిస్తు న్నట్లు ఉత్తర్వుల్లో ప్రభుత్వం వెల్లడించింది.

ఇప్పటికే జేసీ దివాకర్ రెడ్డికి సంబంధించిన బస్సులను ప్రభుత్వం సీజ్ చేసింది. ఇంటర్‌ పేజ్ క్యారియర్ పర్మిట్లలో అవకతవకలు ఉన్నాయని గుర్తించి 36 బస్సులతో పాటు మరో 18 బస్సుల కాంట్రాక్టును సైతం రద్దు చేసి సీజ్ చేసింది. బస్సుల సీజ్ అంశంలో ప్రభుత్వంపై ఆనాడు జేసీ దివాకర్ రెడ్డి తీవ్రంగా విరుచుకుపడ్డారు. తనదైన శైలిలో ముఖ్యమంత్రి జగన్‌పై విమర్శల వర్షం కురిపించారు. కేవలం రాజకీయ దురుద్దేశ్యంతోనే కక్షపూరితంగా వ్యవహరిస్తున్నారని ఆరోపించారు. తాజాగా సిమెంట్ కంపెనీ, మైనింగ్ లీజుల రద్దుపై జేసీ దివాకర్ రెడ్డి మరోసారి తీవ్రంగా స్పందిం చారు. రాష్ట్రానికి జరిగిన అన్యాయం కన్నా తన మైనింగ్ లీజుల రద్దు పెద్ద విషయం కాదని వ్యాఖ్యానించారు. లీజుల రద్దు అంశాన్ని కోర్టులోనే తేల్చుకుంటానని స్పష్టం చేశారు. రాష్ట్ర ప్రభుత్వం పగ పగ అంటూ రగిలిపోతుందని మాట వినని వారి మీద కక్ష తీర్చుకుంటుందని ఆయన ఆరోపించారు. ప్రతిపక్ష నేతల ఆర్థిక మూలాలు దెబ్బతీయడమే ప్రభుత్వ లక్ష్యమని దీనినే ఫ్యాక్షనిజం అంటారని వ్యాఖ్యానించారు.

ఇది ఇలా ఉంటే, జేసీ దివాకర్ రెడ్డి, ఈ రోజు అమరావతి ప్రాంతంలో పర్యటించి, అక్కడ రైతులకు సంఘీభావం తెలిపారు. ఈ సందర్భంగా మాట్లాడుతూ, జగన్ పై ఘాటు వ్యాఖ్యలు చేసారు. జగన్ తాత అయిన రాజారెడ్డికి తనకు ఎవరైనా అడ్డు వస్తే, వాళ్లని పైకి పంపడం బాగా తెలుసని, ఇప్పుడు జగన్ మోహన్ రెడ్డి మాత్రం, అందరినీ ఒకేసారి పైకే పంపే ప్లాన్ వేసారని అన్నారు. ఇన్నాళ్ళు ముఖ్యమంత్రి పదవి కోసం ఆరాట పడి, ఇప్పుడు దాన్ని కక్ష తీర్చుకోవటానికి ఉపయోగించుకుంటున్నారని అన్నారు. జగన్ మోహన్ రెడ్డి తన పై కక్ష కట్టి, తన ఆర్ధిక మూలల పై దెబ్బ కొట్టాడని, రాష్ట్ర ప్రజలకు, ఇక్కడ అమరావతి ప్రాంత రైతులకు చేసిన దాని కంటే, తనకు పెద్ద నష్టం ఏమి లేదని అన్నారు.

కేంద్రం నుంచి నిధులు పొందడంలో సీఎం జగన్ విఫలం అయ్యారని, టిడిఎల్ పి ఉపనేత అచ్చెన్నాయుడు అన్నారు. ఆయన మాట్లాడుతూ, "22మంది ఎంపీలిస్తే కేంద్రం మెడలు వంచుతా అన్నాడు. కేంద్రం మెడలు వంచడం దేవుడెరుగు, సీఎం జగన్ మెడ సగానికి వంగిపోయింది. ఎప్పుడు ఢిల్లీ వెళ్లినా సీఎం జగన్ కేసుల కోసమే.. రాష్ట్రం కోసం పీఎం మోడికి ఇచ్చిన వినతుల కన్నా, కోర్టు వాయిదాలు ఎగ్గొట్టేందుకే ఎక్కువ లేఖలు రాశారు. తన స్వార్ధం కోసం రాష్ట్ర ప్రయోజనాలు తాకట్టు పెట్టారు. తన కేసుల మీదే ఎంతసేపూ జగన్మోహన్ రెడ్డి ధ్యాస. ఏ విధంగా కేసుల నుంచి బైటపడాలన్నదే జగన్ తపన. రాష్ట్రానికి నిధులు వచ్చినా, రాకున్నా జగన్ కు బేఫికర్. రాష్ట్రాభివృద్ది పట్టదు, పేదల సంక్షేమం గాలికి వదిలేశారు. రోజుకు 18గంటలు ఆలోచనలు సీఎం జగన్ కేసులపైనే. గత 8నెలల్లో జగన్ తుగ్లక్ చర్యలతో కేంద్రం చిన్నచూపు. ఇచ్చిన నిధులు వాడే సామర్ధ్యం లేదు. కొత్తగా నిధులు తెచ్చుకున చొరవ లేదు. జగన్ అవినీతి-అసమర్ధత వల్ల ఏపికి తీరని నష్టం. 5 దేశాల(జర్మనీ,జపాన్,కొరియా,ఫ్రాన్స్,సింగపూర్) ఎంబసీలు హెచ్చరించాయి. కింది కోర్టు నుంచి, పై కోర్టు దాకా అనేక అక్షింతలు. తుగ్లక్ చర్యలతో దేశవిదేశాల్లో నవ్వుల పాలయ్యాం. ఈ బడ్జెట్ లో జగన్ చేతగానితనం మరోసారి బైటపడింది. "

"స్వతంత్రం వచ్చాక ఇంత విఫల ముఖ్యమంత్రిని చూడలేదు. ‘‘ఫెయిల్యూర్ సీఎం’’గా జగన్ రికార్డు సృష్టించారు. రాష్ట్రం ఆదాయం పెంచడంపై ఏనాడూ దృష్టి లేదు. బడుగులు, పేదల సంక్షేమంపై ఆసక్తి లేదు. మోసాలు, నేరాలతో సొంత సంపద పెంచడంలో జగన్ నిష్ణాతుడు.. సమాజంలో సంపద సృష్టించడం చేతకాదు. విభజన చట్టం ప్రకారం ఏపికి రావాల్సింది కూడా తేలేక పోయారు. రాష్ట్రంలో 2 ఇండస్ట్రియల్ కారిడార్లకు నిధులు రాబట్టలేక పోయారు. విశ్వసనీయత లేని సీఎం జగన్ వల్ల రాష్ట్రానికి తీవ్రనష్టం. జగన్ పై కేసులు చూసి, ఎవరూ పెట్టుబడులు పెట్టడం లేదు. జగన్ నిర్వాకాలతో కేంద్రం నిధులు ఇవ్వడం లేదు. వైసిపి ప్రభుత్వంతో రాష్ట్రానికి రెండిందాలా నష్టం"
అని అచ్చెన్నాయుడు అన్నారు.

తెలుగుదేశం పార్టీ రాష్ట్ర అధ్యక్షులు కళా వెంకట్రావు మాట్లాడుతూ, "ఆడలేక మద్దెల ఓడు అన్నట్లుగా ఉంది జగన్‌, విజయసాయిరెడ్డిల వైఖరి. 8 నెలల నుంచి మీ కేసుల మాఫీ కోసం, స్వప్రయోజనాల కోసం తప్ప ఏనాడైనా రాష్ట్ర ప్రయోజనాల కోసం పాటుపడ్డారా? ఏ పని అయినా కేంద్రానికి చెప్పే చేస్తున్నాం, కేంద్రం మన రాష్ట్రాన్ని ఆదుకుంటుందని, రాష్ట్ర ఆర్ధిక పరిస్థితిపై ప్రత్యేక దృష్టి ఉందని బడ్జెట్‌ ముందు వరకు హోరెత్తించారు. తీరా బడ్జెట్‌ ప్రవేశపెట్టిన తరువాత కేంద్రం రాష్ట్రానికి మొండి చేయి చూపించిందంటూ విజయసాయిరెడ్డి మొసలి కన్నీరు కారుస్తున్నారు. 22 మంది ఎంపీలను ఉంచుకొని కేంద్రం మెడలు వంచటమంటే ఇదేనా? 2020-21 కేంద్ర బడ్జెట్‌లో ప్రత్యేకహోదా, వెనకబడిన జిల్లాలకు నిధులు సహా రాష్ట్రానికి సంబంధించిందించిన ఒక్క అంశం కూడా లేదంటే అది జగన్‌ ప్రభుత్వ చేతగాని తనానికి నిదర్శనం. ఏపీకి ఒక్కంటే ఒక్కటి కూడా కొత్త రైల్వే ప్రాజెక్టు సాధించలేదు. 13 జిల్లాలకు జీవనాడైనా పోలవరానికి ఒక్క రూపాయి నిధులు రప్పించుకోలేకపోయారు." అని అన్నారు.

రాజధాని అమరావతి పరిరక్షణ కోసం గత 45 రోజులుగా జరుగుతున్న ఆందోళన శుక్రవారం కొత్త మలుపు తిరిగింది. అధికార వైసీపీకి చెందిన నరసరావుపేట ఎంపీ లావు శ్రీకృష్ణదేవరాయలు రాజధాని రైతులకు సంఘీభావం ప్రకటించారు. ప్రభుత్వం నుంచి ఒక కమిటీ వచ్చి రైతులతో సంప్రదింపులు జరుపుతుందని ఆయన వెల్లడించారు. రైతులందరూ ప్రభుత్వ కమిటీ ఎదుట తమ అభిప్రాయాలు చెప్పాలని ఆయన సూచించారు. మండంలో దీక్షా శిబిరం వద్దకు శుక్రవారం మధ్యాహ్నం ఎంపీ వెళ్లారు. మందడంలో పలువురు రైతులు శుక్రవారం నుంచి 24 గంటల పాటు నిరాహార దీక్షకు ఉపక్రమించారు. ఆ దీక్షా శిబిరానికి వెళ్లిన శ్రీకృష్ణదేవరాయలు అక్కడే కొద్దిసేపు కూర్చుని, రైతులతో మాట్లాడారు. పలువురు మహిళా రైతులు సైతం తమ వాదన వినిపించారు. అనంతరం మైకు తీసుకొని రైతులనుద్దేశించి ప్రసంగం ప్రారంభించగానే, రైతులు పెద్దపెట్టున నినాదాలు చేశారు. రైతుల నినాదాల హోరులోనే ఎంపీ శ్రీకృష్ణదేవరాయలు తన ప్రసంగాన్ని ముక్తసరిగా ముగించారు.

రైతుల కష్టాలు తమకు తెలుసనీ, భూములు ఇచ్చిన రైతులేవరికీ అన్యాయం జరగదని ఆయన భరోసా ఇచ్చారు. ప్రభుత్వ కమిటీ వచ్చినప్పుడు రైతులందరూ తమ అభిప్రాయాలు చెప్పాలని, వాటిని పరిగణనలోకి తీసుకుంటామని చెప్పారు. అయితే రైతులు ముందుగా అమరావతికి అనుకూలమా? కాదా ? చెప్పాలని డిమాండ్ చేశారు. రాజధాని అమరావతిని కొనసాగిస్తూనే తమతో చర్చకు రావాలని రైతులు శ్రీకృష్ణదేవరాయలుతో స్పష్టం చేశారు. అయితే ఇది ఇలా ఉంటే, వైసీపీ ఎంపీ నిన్న వెళ్ళటం పై, పలు సందేహాలకు తావు ఇస్తుంది. మొన్నటి దాక అమరావతి రైతులను, పైడ్ ఆర్టిస్ట్ లు, అమరావతి ప్రాంతం ఒక ఎడారి, అమరావతి ప్రాంతం ఒక స్మశానం అంటూ హేళన చేసిన వైసీపీ, ఇప్పుడు అదే రైతుల దగ్గరకు, తమ ఎంపీని పంపించటం పై, పలు సందేహాలు వస్తున్నాయి.

దీని వెనుక ఉన్న రహస్యం ఏమిటి ? ఎంపీని రాయబారానికి పంపారా ? లేక రైతుల్లో చీలక తేవటానికి పంపారా అనే సందేహాలు వస్తున్నాయి. ప్రభుత్వం తరుపున, రైతులతో సయోధ్య కోసం, ఎంపీ వచ్చినట్టుగా, రాజకీయ విశ్లేషకులు అభిప్రాయ పడుతున్నారు. గురువారం, జగన్ మోహన్ రెడ్డిని, జాస్తి చలమేశ్వర్‌ తో కలిసి, ఆ మరుసటి రోజే అమరావతి రైతుల దగ్గరకు వచ్చారంటేనే, జరుగుతున్న విషయం ఏమిటో అర్ధమవుతుందని రైతులు అంటున్నారు. తాము ఏ చర్చలు అయినా, ఏ కమిటీ అయినా, అమరావతి పూర్తీ స్థాయి రాజధానిగా కొనసాగుతుంది అని చెప్తేనే, వారితో చర్చిస్తామని తేల్చి చెప్పారు. వైసీపీ ఎంపీ ఇక్కడకు రావటం వెనుక మూడు కారణాలు కనిపిస్తున్నాయి. ఒకటి, ప్రభుత్వం తరుపున చర్చలకు రైతులని సిద్ధం చెయ్యటం, రెండు రైతుల్లో చీలక తేవటం, మూడు పార్లమెంట్ లో ఈ అంశం పై టిడిపి లేవనెత్తితే, మేము వెళ్లి వారి సమస్యలు విన్నాం అని చెప్పటం కోసం. మరి ఈ మూడిట్లో దేని కోసం, వైసీపీ ఎంపీ వచ్చారో, కాలమే చెప్తుంది.