news

ఆంధ్రప్రదేశ్‌లో పోలింగ్‌కీ, కౌంటింగ్‌కీ మధ్య 43 రోజులు తేడా ఉండటంతో రకరకాల ఊహాగానాలకి ఆస్కారమేర్పడింది. గ్రామాలు, పట్టణాలు, తాజాగా పోలింగ్‌ బూత్‌ల వారీగా కూడా విశ్లేషణలు జరుగుతున్నాయి. ఈ నేపథ్యంలో పందేలు జోరుగా కాస్తున్నారు. కోస్తాలో ఈ గోల మరింత ఎక్కువగా ఉంది. సామాన్యులు మొదలుకుని ఉన్నతాధికారుల వరకు అందరూ తమకు తోచిన విధంగా విశ్లేషణలు చేస్తున్నారు. ఓటింగ్ పెరిగినందుకు కారణాలు ఏమై ఉంటాయనే అంశమే అందరి మెదళ్లకు పదునుపెడుతోంది. 2014 ఎన్నికల కంటే 2019 ఎన్నికల్లో సుమారు 14 లక్షల మంది మహిళలు అదనంగా ఓట్లేయటం ఇప్పుడు చర్చనీయాంశమైంది. ఇది తమకు అనుకూలంగా జరిగిన ఓటింగ్ అని తెలుగుదేశం పార్టీ చెబుతుండగా, చంద్రబాబుకు వ్యతిరేకంగానే ఈ ఓటింగ్ జరిగిందని వైసీపీ నేతలు వాదిస్తున్నారు.

అయితే అధికారవర్గాల్లో మాత్రం మరోరకమైన చర్చ సాగుతోంది. "వామ్మో! జగన్ బ్యాచ్ పట్టణాలు, నగరాల్లో అత్యధికంగా ఉంది'' అని సెక్రటేరియట్‌లోని కొందరు అధికారులు బాహాటంగా మాట్లాడుకుంటున్నారు. "జగన్ అధికారంలోకి వస్తే ఆయన అనుచరవర్గం పట్టణాలు, నగరాల్లో విజృంభిస్తుంది. అందరినీ భయబ్రాంతులకు గురిచేస్తుంది. అరాచకాలు పెరుగుతాయంటూ ప్రజల్లో ఓ భావన ఏర్పడింది. అందుకే వారంతా జగన్‌కు వ్యతిరేకంగా ఓటేశారు'' అన్నది ఆయా అధికారుల తాజా విశ్లేషణ. ఏపీ ఎన్నికల్లో పోలింగ్‌ బూత్‌లలో బారులుతీరిన వారంతా తటస్థులనీ, ఏ ఎన్నికల్లో అయినా తటస్థులు ఎటు మోగ్గితే అటే ఫలితం ఉంటుందనీ అధికారులు చెబుతున్నారు. "ఏ పార్టీకి ఉండే ఓట్లు ఆ పార్టీకి ఉంటాయి. కానీ తటస్థులే ఫలితాన్ని డిసైడ్ చేస్తారు'' అన్నది వారి వాదనలో ప్రధాన లాజిక్కు!

జగన్‌ బ్యాచ్‌ ఎక్కడికక్కడ కాచుకుని ఉందన్న భయంతోనే తటస్థులు తమవైపు వైపు మొగ్గారని తెలుగుదేశం నేతలు కూడా చెబుతున్నారు. ఎన్నికల ముందు వైఎస్ వివేకానందరెడ్డి హత్య జరగడం, దానిపై పెద్దఎత్తున రాద్ధాంతం జరగడంతోపాటు ఈ హత్యకు చంద్రబాబే కారణమని జగన్ ఆరోపించారు. దీనిపై చంద్రబాబు కూడా ప్రతిస్పందించారు. జగన్‌ మనుషులే వివేకాను హత్యచేశారని బాబు వ్యాఖ్యానించారు. చివరికి ఈ వ్యవహారంపై సంయమనం పాటించాల్సిందిగా హైకోర్టు ఇరువురిని కోరింది. అప్పటికి బహిరంగ విమర్శలు తగ్గినప్పటికీ.. వివేకా హత్య ప్రభావం జగన్‌ బ్యాచ్‌పైనే ఎక్కువ ఉందని సెక్రటేరియట్‌లోని కొంతమంది అధికారులు విశ్లేషించారు. గ్రామీణ ప్రాంతాల్లో ఈ బ్యాచ్ లేదు గానీ, పట్టణాలు, నగరాల్లో ఓటువేసిన వారంతా ఈ అంశాలన్నింటినీ పరిగణనలోకి తీసుకున్నారని అధికారవర్గాలు మాట్లాడుకుంటున్నాయి.

పశ్చిమ గోదావరి జిల్లా కొవ్వూరు మండలం కుమారదేవం గ్రామంలో రక్షిత మంచినీటి పథకం నుండి పంపిణీ చేసే నీటిలో విషప్రయోగం జరిగింది. డెలివరీ వాల్వు వద్ద వాటర్ షవర్‌లో పురుగుల మందు కలిపినట్టు సిబ్బంది గుర్తించి, మంచినీటి సరఫరా నిలిపివేయడంతో ప్రమాదం తప్పింది. కుమారదేవం గ్రామప్రజలకు ప్రతి రోజు ఉదయం రక్షిత మంచినీటి ట్యాంకు ద్వారా తాగునీరు సరఫరా చేస్తారు. ఆదివారం ఉదయం మంచినీటి సరఫరా నిమిత్తం వచ్చిన పంచాయతీ ఉద్యోగి దాసరి పోలయ్య ట్యాంకు డెలివరీ వాల్వు షవరు వద్ద పురుగుల మందు వాసన వస్తున్నట్టు గుర్తించారు. దీనితో మంచినీరు సరఫరా చేయకుండా, పంచాయతీ కార్యదర్శి నాగేశ్వరరావు దృష్టికి తీసుకువెళ్లారు.

ఆయన హుటాహుటిన ట్యాంకు వద్దకు వచ్చి నీటిని పరిశీలించారు. అనంతరం ట్యాంకులో ఉన్న నీటిని పూర్తిగా ఔట్‌లెట్ ద్వారా బయటకు విడుదల చేసి, ట్యాంకును, షవరును శుభ్రం చేసిన అనంతరం తాగునీరు సరఫరా చేశారు. ఈ విషయమై కొవ్వూరు రూరల్ పోలీసులకు సమాచారం అందించారు. రూరల్ సీఐ కేవీవీ సత్యనారాయణ, ఎస్సై రవీంద్రనాథ్ సందర్శించి వివరాలు సేకరించారు. పంచాయతీ కార్యదర్శి నాగేశ్వరరావు ఇచ్చిన ఫిర్యాదు మేరకు కేసు దర్యాప్తు చేస్తున్నారు. రాజకీయ కోణంలో ఇది జరిగిందా అనే విషయం పై పోలీసులు విచారణ చేస్తున్నారు.

కాంగ్రెస్ పార్టీ అధ్యక్షుడు రాహుల్ గాంధీ అమేథీ నియోజకవర్గంలో పోటీకి సమర్పించిన ఎన్నికల అఫిడవిట్‌కు రిటర్నింగ్ అధికారి ఆమోదం తెలిపారు. రాహుల్ సమర్పించిన అఫిడవిట్, అనుబంధ పత్రాలు సరిగానే ఉన్నాయని రిటర్నింగ్ అధికారి సోమవారంనాడు ప్రకటించారు. రాహుల్ గాంధీ నామినేషన్‌ను సవాలు చేసిన ఫిర్యాదిదారు ఎలాంటి సాక్ష్యాలను సమర్పించలేదని, ఆయనపై చేసిన ఆరోపణలను రుజువు చేయలేకపోయారని ఆర్ఓ రామ్‌మనోహర్ మిశ్రా తెలిపారు. రాహుల్ నామినేషన్ పత్రాల్లో పలు అసంబద్ధతలు ఉన్నట్టు ఇంటిపెండెంట్ అభ్యర్థి ధ్రువ్‌లాల్ ఫిర్యాదు చేసిన నేపథ్యంలో రాహుల్ నామినేషన్ పత్రాల పరిశీలనను మిశ్రా రెండ్రోజుల క్రితం వాయిదా వేస్తున్నట్టు ప్రకటించారు. కాగా, రాహుల్ నామినేషన్ పత్రాలపై లేవనెత్తిన అభ్యంతరాలపై ఆయన తరఫు లాయర్ కేసీ కౌషిక్ రిటర్నింగ్ అధికారికి వివరణ ఇచ్చారు.

రాహుల్ ఇండియాలోనే పుట్టారని, ఇండియన్ పాస్‌పోర్ట్ కలిగి ఉన్నారని, ఇతర దేశ పౌరసత్వాన్ని రాహుల్ ఎప్పుడూ తీసుకోలేదని ఆయన తెలియజేశారు. ఆయన పాస్‌పార్ట్, ఓటర్ ఐడీ, ఆదాయం పన్ను, ప్రతీదీ ఇండియాకు చెందినదేనని చెప్పారు. రాహుల్ గాంధీ 1995లో కేంబ్రిడ్జి యూనివర్శఇటీ నుంచి ఎంఫిల్ చేశారని, ఇందుకు సంబంధించిన సర్టిఫికెట్ కాపీని తాను జతచేశానని కౌశిక్ వివరించారు. ఆయన ఇచ్చిన సమాచారంతో రిటర్నింగ్ అధికారి సంతృప్తి చెందారు. రాహుల్ అఫిడవిట్ చెల్లుతుందంటూ ప్రకటించారు. గాంధీల కుటుంబానికి సంప్రదాయబద్ధంగా విజయాన్నిఅందిస్తున్న అమేథీలో మే 6న పోలింగ్ జరుగనుంది.