news

ఎన్నికలకు టీడీపీ సిద్ధమవుతోంది. కొన్ని రోజులుగా అభ్యర్థుల ఎంపికపై ముఖ్యమంత్రి చంద్రబాబు కసరత్తు చేస్తున్నారు. ఆదివారంతో పార్లమెంట్ నియోజకవర్గాల సమీక్ష కూడా పూర్తి అవుతుంది. మొత్తం 25 పార్లమెంట్ స్థానాలు, 175 అసెంబ్లీ నియోజక వర్గాలకు సంబంధించి ఇవాల్టితో పూర్తి స్థాయి సమీక్ష సమావేశాల ముగుస్తాయి. లోక్ సభ, అసెంబ్లీకి సంబంధించి దాదాపుగా అభ్యర్థులను ఖరారు చేసినట్లు సమాచారం. ఎంపిక చేసిన అభ్యర్థులను ఈనెల 13, 14 తేదీల్లో ప్రకటించే అవకాశం ఉన్నట్లు సమాచారం. దీంతో తెలుగుదేశం నేతల్లో హీట్ పెరిగిపోయింది. మొదటి లిస్టు లో ఎవరి పేరు ఉంటుందా అనే టెన్షన్ నేతల్లో మొదలైంది. ఇప్పటికే కొంత మందికి మౌఖికంగా ఆదేశాలు ఇచ్చారు.

గతంలోలా కాకుండా ఈసారి అన్నీ తానై చంద్రబాబు అభ్యర్థులను ఎంపిక చేశారు. అసెంబ్లీ 150 స్థానాల విజయం లక్ష్యంగా పెట్టుకున్నారు. తెలుగుదేశం పార్టీ అభ్యర్థుల ప్రకటన ఎప్పుడు ఆఖరి నిముషంలో ఉంటుంది. అలాంటిది గతానికి భిన్నంగా ఈసారి ముందుగానే పూర్తిస్థాయిలో అభ్యర్థులను ఎంపిక చేశారు. అయితే తెలుగుదేశం పార్టీ సమీక్షలు ఆదివారంతో ముగియనున్నాయి. ఇప్పటికే 100 అసెంబ్లీ స్థానాలకు ముఖ్యమంత్రి చంద్రబాబునాయుడు అభ్యర్థులను ఖరారు చేశారు. ఒకటి, రెండు రోజుల్లో 115 మందితో టీడీపీ జాబితా విడుదల కానుంది. ఇదిలా ఉండగా అరకు పార్లమెంట్‌ పరిధిలోని అసెంబ్లీ స్థానాలపై ముఖ్యమంత్రి చంద్రబాబునాయుడు ఆదివారం కసరత్తు నిర్వహిస్తున్నారు.

ఈ రోజు చంద్రబాబు టెలి కాన్ఫరెన్స్ లో మాట్లాడుతూ, తెలంగాణ సీఎం కేసీఆర్ ఇప్పుడు అమరావతి రాలేరని, వేల కోట్లు పంపిస్తారనిచంద్రబాబు అన్నారు. ఇప్పటికే రూ. వెయ్యి కోట్లు వచ్చాయని చెబుతున్నారని, కేసీఆర్ సంపాదించిన డబ్బులో ఇక్కడ పెట్టుబడి పెడుతున్నారని విమర్శించారు. ఎందుకు పెట్టుబడి పడుతున్నారంటే ఆయనకు సామంత రాజ్యం కావాలని, దానికి ఒక పథకం ప్రకారం మనిషిని పెట్టుకున్నారని.. ఆ మనిషే జగన్మోహన్ రెడ్డని చంద్రబాబు అన్నారు. అతనిని ఎంపోర్ చేస్తూ డబ్బులు పంపిస్తున్నారని, ఇప్పటికే రూ. వెయ్యి కోట్లు పంపించారని.. ఇంకా ఎంత పంపిస్తారో తెలియదని అన్నారు. అదే కేసీఆర్ తనకిచ్చిన రిటర్న్ గిఫ్ట్ అని చంద్రబాబు పేర్కొన్నారు. ఇది ఆంధ్రప్రదేశ్ రాష్ట్ర ఐదు కోట్ల ప్రజల ఆత్మగౌరవానికి సంబంధించిన విషయమని అన్నారు. జగన్ తన కేసుల మాఫీ, ప్రయెజనాల కోసం.. కేసీఆర్, ఢిల్లీలో ఉన్న నాయకులందరూ కలిసి కుట్రలు పన్నితే.. ఖబడ్దార్ జాగ్రత్తగా ఉండాలని, ఇక్కడ వాళ్ల ఆటలు సాగనియ్యమని చంద్రబాబు హెచ్చరించారు.

కేంద్ర ఎన్నికల సంఘం అధికారులు విజ్ఞాన్ భవన్‌కు బయలుదేరారు. మరికొద్దిసేపట్లో 17వ లోక్ సభ ఎన్నికల షెడ్యూల్ విడుదల చేయనున్నారు. దేశవ్యాప్తంగా 543 ఎంపీ స్ధానాలకు, నాలుగు రాష్ట్రాల అసెంబ్లీ స్ధానాలకు షెడ్యూల్ విడుదల కానుంది. జమ్మూ కశ్మీర్ అసెంబ్లీ ఎన్నికల నిర్వహణపై సందిగ్ధత కొనసాగుతోంది. 16వ లోక్ సభకు 9 విడతల్లో ఎన్నికలు జరిగాయి. 17వ లోక్ సభకు 7-8 విడతల్లో ఎన్నికలు ఉండే అవకాశం ఉంది. మొదటి రెండు విడతల్లో అస్సాం, త్రిపుర సహా ఈశాన్య రాష్ట్రాలలో ఎన్నికలు నిర్వహించే అవకాశమున్నట్లు సమాచారం. మూడవ విడతలో బిహార్, ఛత్తీస్‌గఢ్, హర్యానా, జమ్మూ కశ్మీర్, కేరళ, మధ్యప్రదేశ్, మహారాష్ట్ర, ఒడిషా, యూపీలో ఎన్నికలు జరగనున్నాయి.

అత్యధికంగా యూపీ, బీహార్లో 6 దశల్లో ఎన్నికలు ఉండే అవకాశముంది. పశ్చిమబెంగాల్‌లో 5 దశల్లో ఎన్నికలు జరిగే అవకాశమున్నట్లు తెలియవచ్చింది. ఏపీ తెలంగాణలో 7,8 విడతల్లో ఎన్నికలు జరగనున్నట్లు సమాచారం. ఐదవ విడతలో అత్యధికంగా లోక్ సభ స్ధానాలకు ఎన్నికలు జరిగే అవకాశముంది. వివిపాట్ యంత్రాలలో ఉన్న స్లిప్పుల లెక్కింపుపై ఎన్నికల షెడ్యూల్ ప్రకటన సందర్భంగా ఈసీ నిర్ణయంపై ఉత్కంఠత కొనసాగుతోంది. సాయంత్రం 5 గంటలకు మీడియా సమావేశంలో ఈ వివరాలను వెల్లడించనున్నారు. పోలింగ్‌ తేదీలు, ఎన్ని దశల్లో ఎన్నికల నిర్వహణ వివరాలను సీఈసీ సునీల్‌ అరోడా ప్రకటించనున్నారు.

ఏప్రిల్‌, మే నేలల్లో 7 లేదా 8 విడతల్లో పోలింగ్‌ జరిగే అవకాశం ఉంది. ఏప్రిల్‌ మొదటి వారంలో తొలి విడత పోలింగ్‌ ఉండనున్నట్లు సమాచారం. తొలి విడత పోలింగ్‌కు ఈ నెలాఖరున నోటిఫికేషన్‌ విడుదలయ్యే అవకాశం ఉంది. జూన్‌3తో ప్రస్తుత లోక్‌సభ కాలపరిమితి ముగియనుంది. మరోవైపు, నోటిఫికేషన్ విడుదలవుతున్న సమయం గురించి దక్షిణాది నేతలు టెన్షన్ పడుతున్నారు. సాయంత్రం 4.30 గంటల నుంచి 6 వరకు రాహు కాలం ఉండటమే దీనికి కారణం. మన దక్షిణాది నేతలు వాస్తు, జ్యోతిష్యం, పంచాగాన్ని ఎంతో నమ్మకంగా పాటిస్తారనే సంగతి తెలిసిందే. దేవేగౌడ, చంద్రబాబు నాయుడు, కేసీఆర్, యెడ్యూరప్పలకు కూడా వీటిపై నమ్మకం చాలా ఎక్కువే. రాహు కాలంలో ఎన్నికల షెడ్యూల్ విడుదలవుతుండటం పట్ల నేతలు కలవరపాటుకు గురవుతున్నారు.

ప్రముఖ మతబోధకుడు, ప్రజాశాంతి పార్టీ అధ్యక్షుడు కేఏ పాల్‌ సంబరం ఆవిరైంది. ప్రజాశాంతి పార్టీ అధ్యక్షుడు కె.ఎ.పాల్‌కు కేంద్ర ఎన్నికల సంఘం షాకిచ్చింది. ఆయన పార్టీ గుర్తు హెలికాప్టర్‌ను పక్కనపెట్టింది. ఆయన హెలికాప్టర్‌ గుర్తు తమ పార్టీ గుర్తు ఫ్యాన్‌ను పోలి ఉండడంతో ఎన్నికల్లో తమకు నష్టం జరిగే అవకాశం ఉందని, అందువల్ల దాన్ని తొలగించాలని వైసీపీ అధినేత జగన్ సూచన మేరకు, మాజీ ఎంపీ వై.వి.సుబ్బారెడ్డి ఎన్నికల సంఘానికి ఫిర్యాదు చేసిన విషయం తెలిసిందే. ఈ ఫిర్యాదుపై స్పందించిన ఈసీ పాల్‌కు నోటీసులు జారీ చేసింది. దీనిపై స్పందించిన పాల్‌ ప్రపంచంలో ఎక్కడైనా హెలికాప్టర్‌, ఫ్యాన్‌ ఒకేలా ఉండడం చూశామా? ఇందులో వైసీపీ దురుద్దేశం ఉందని ఆరోపించారు.

రెండు గుర్తుల మధ్య తేడాను ప్రజలు స్పష్టంగా గుర్తించగలరని ఈసీకి సమాధానమిచ్చారు. పాల్‌ స్పందనను పెద్దగా పట్టించుకోని ఈసీ ఆయన గుర్తును పక్కన పెడుతూ నిర్ణయం తీసుకుంది. అయితే, హెలికాప్టర్ గుర్తును పక్కనపెట్టి మరో గుర్తును కేటాయించేందుకే ఈసీ మొగ్గు చూపుతున్నట్టు సమాచారం. ప్రజాశాంతి పార్టీ గుర్తు హెలికాప్టర్ తమ ఫ్యాన్ గుర్తును పోలి ఉండడంతో ఓటర్లు పొరబడే అవకాశం ఉందని, కాబట్టి దానిని తొలగించి, ఆ స్థానంలో వేరే గుర్తును కేటాయించాలంటూ వైసీపీ నేత వైవీ సుబ్బారెడ్డి ఎన్నికల సంఘాన్ని ఆశ్రయించారు. ఇప్పుడు గుర్తు రద్దు చెయ్యటంతో పాల్ లబోదిబో అంటున్నారు. జగన మోహన్ రెడ్డి ఏమి చేసినా ఈసీ సై అంటుందని, తెలుగుదేశం పై కూడా ఇలాగే కంప్లైంట్ ఇచ్చిన విషయాన్ని విశ్లేషకులు గుర్తు చేస్తున్నారు.

ఇదే విషయం పై నిన్న పాల్ మీడియాతో మాట్లాడారు. తమ పార్టీకి హెలికాప్టర్‌ గుర్తును కొనసాగించమని కేంద్ర ఎన్నికల సంఘాన్నికోరినట్లు కె.ఏ.పాల్‌ తెలిపారు. దిల్లీలో శనివారం ఆయన విలేకరులతో మాట్లాడారు. వైకాపా నేత వై.వి.సుబ్బారెడ్డి ఫిబ్రవరి 21న ఎన్నికల కమిషనర్‌ను కలిసి హెలికాప్టర్‌ గుర్తు తమ పార్టీ ఫ్యాన్‌ గుర్తును పోలి ఉందని.. ఎన్నికల్లో తమకు ఇబ్బంది ఉన్నందున ఆ గుర్తును నిలిపివేయాలని ఫిర్యాదు చేశారని తెలిపారు. ప్రస్తుతం ఎన్నికల సంఘం తమ గుర్తును హోల్డ్‌లో ఉంచిందని.. దీనిపై తమకు నోటీసు ఇవ్వడంతో తాము ఎన్నికల సంఘం అధికారులను కలిసి తమ గుర్తును కొనసాగించమని కోరినట్లు తెలిపారు. అయితే పాల్ ఆశలు ఆవిరి అయ్యాయి.