news

ప్రభుత్వ పథకాల అమల్లో ఆన్‌లైన్‌ విధానం అమల్లోకి తేవడం వల్ల రాజకీయంగా తెలుగుదేశం పార్టీ నష్టపోయిందని ఆ పార్టీ నేతలు ముఖ్యమంత్రి చంద్రబాబుకు ఫిర్యాదు చేశారు. శుక్రవారమిక్కడ హ్యాపీ రిసార్ట్స్‌ సమావేశ ప్రాంగణంలో శ్రీకాకుళం లోక్‌సభ స్థానం పరిధిలోని పార్టీ నేతలతో సీఎం సమీక్ష సమావేశం నిర్వహించారు. ముందుగా ఈ లోక్‌సభ సీటు పరిధిలోని ఇచ్ఛాపురం, పలాస, టెక్కలి, పాతపట్నం, శ్రీకాకుళం, ఆమదాలవలస, నరసన్నపేట అసెంబ్లీ నియోజకవర్గాల నేతల ఉమ్మడి సమావేశం జరిగింది. ఈ సందర్భంగా కొందరు నాయకులు మాట్లాడారు. ఆన్‌లైన్‌ విధానం గురించి ప్రస్తావించారు. ‘సార్‌.. మీరు అన్ని పథకాలకూ ఆన్‌లైన్‌ విధానాన్ని తెచ్చారు. దీనివల్ల పార్టీకి, ప్రజలకు మధ్య అనుబంధం లేకుండా పోయింది.

పింఛన్లు, రేషన్‌ కార్డులు, ఇతర ప్రభుత్వ పథకాలు నేరుగా ఎవరు దరఖాస్తు చేసుకుంటే వారికి వచ్చేస్తున్నాయి. అంతకు ముందు పార్టీ నేతల చొరవతో ఇవి వచ్చేవి. దానివల్ల పార్టీ ప్రాధాన్యం ప్రజలకు తెలిసేది. ఆన్‌లైన్‌ విధానంలో పార్టీ ప్రమేయం లేకుండా పోయింది. ప్రభుత్వ పథకాల వల్ల లబ్ధి పొందిన వారు పార్టీని చులకనగా చూస్తున్నారు. ఇవి టీడీపీ ఇచ్చింది కాదని.. అర్హులం కాబట్టే లబ్ధి చేకూరిందని అనుకుంటున్నారు తప్ప.. టీడీపీ ప్రభుత్వ కృషి వల్ల వచ్చిందని భావించడం లేదు. ఏ ప్రభుత్వం ఉన్నా అవి వచ్చేవేనన్న అభిప్రాయం ఏర్పడుతోంది. దీనిపై మీరు పునరాలోచన చేయాలి’ అని వారు సీఎంకు సూచించారు. ఇందులో కొంత నిజం ఉన్నా.. మొత్తంగా సదుద్దేశంతో ఈ విధానం తెచ్చామని చంద్రబాబు వివరించారు. ‘పథకాల అమల్లో అవినీతిని తగ్గించడానికి ఆన్‌లైన్‌ విధానం తెచ్చాం. దానితోపాటు జాప్యం కూడా నివారించాలన్నది మన ఆలోచన. ప్రతి ప్రయత్నంలో కొంత మంచి.. కొంత సమస్యా ఉంటుంది. ప్రజలతో పార్టీ అనుబంధాన్ని పెంచడానికి ఏం చేయాలో ఆలోచిద్దాం’ అని చెప్పారు. పార్టీ కార్యకర్తలను ఆదుకోవాల్సిన అవసరం గురించి కొందరు మాట్లాడారు. ఆ దిశగా ఆలోచనలు చేస్తున్నామని చంద్రబాబు తెలిపారు.

శ్రీకాకుళం అసెంబ్లీ స్థానానికి చెందిన పార్టీ నేతలపై చంద్రబాబు అసంతృప్తి వ్యక్తం చేశారు. శుక్రవారం జరిగిన సమీక్షకు ఆ నియోజకవర్గం నుంచి ఎవరూ హాజరు కాలేదు. రెండ్రోజుల క్రితం శ్రీకాకుళం సిటింగ్‌ ఎమ్మెల్యే, పార్టీ అభ్యర్థి గుండా లక్ష్మీదేవి తండ్రి మరణించారు. దీంతో ఆమె రాలేకపోయారు. ఆమె రావడం లేదని ఆ నియోజకవర్గ నేతలు కూడా ఎవరూ రాలేదు. మరోసారి అందరం కలిసి వద్దామన్న ఆలోచనతో వారు రాలేదని అంటున్నారు. దానిపై చంద్రబాబు అసంతృప్తి వ్యక్తం చేశారు. ‘ఎమ్మెల్యే రాకపోవడానికి కారణం ఉంది. కానీ నియోజకవర్గ నేతలు కూడా రాకపోతే ఎలా? పార్టీ ఒక సమావేశం పెడితే దానిని సీరియ్‌సగా తీసుకోవాలి. ఇక్కడ మేం కొన్ని విషయాలు చెబుతున్నాం. వాటిని అందరూ తెలుసుకోవాలి. ఏవో సాకులు చెప్పి రాకపోవడం సరికాదు’ అని వ్యాఖ్యానించారు.

కార్యకర్తలు ఎప్పటికప్పుడు రాజకీయాలపై అధ్యయనం చేయగలిగినపుడే నేతలుగా ఎదుగుతారని, పార్టీకి అంకితభావంతో సేవలందించిన వారికే గౌరవం, పదవులుంటాయని టీడీపీ జాతీయ అధ్యక్షు డు చంద్రబాబు నాయుడు స్పష్టం చేశారు. శుక్రవారం మంగళగిరి పరిధిలోని హ్యాపీ రిసార్ట్స్‌లో నిర్వహించిన టీడీపీ అభ్యర్థులు, కార్యకర్తలు, బూత్‌ లెవల్‌ కన్వీనర్ల సమావేశంలో ఆయన మాట్లాడుతూ 37 ఏళ్లుగా పార్టీ కోసం కష్టపడుతున్న కార్యకర్తల్లో మరింత జవాబుదారీతనం పెరగాలన్నారు. కేడర్‌ మేనేజ్‌మెంట్‌, పబ్లిక్‌ మేనేజ్‌మెంట్‌లో పట్టును సాధించినపుడే రాజకీయ ఎదుగుల ఉంటుంద న్నారు. డబ్బులు సంపాదించే వాళ్లు పార్టీకి ఖర్చు పెట్టడం లేదని, డబ్బు సంపాదనలేని వాళ్లే పార్టీ కోసం ప్రాణాలను సైతం అర్పిస్తున్నారని చెప్పారు. ఆస్తులు అమ్ముకొని, ప్రాణాలకు తెగించి పసుపు జెండా గెలుపునకు కృషి చేస్తున్న కార్యకర్తలే టీడీపీ బలమని, ఈ విషయాన్ని గుర్తెరిగి అంకితభావంతో పనిచేసిన వాళ్లకే గౌరవం, పదవులు దక్కుతాయన్నారు.

ప్రతి ఒక్కరికి పార్టీ సభ్యులతో కుటుంబ బాంధవ్యం ఉండాలని, అందరం కలసి వ్యవస్థగా పనిచేస్తే అద్భుత ఫలితాలను సాధించవచ్చని తెలిపారు. గత ఐదేళ్లలో వినూత్నమైన సంక్షేమ పథకాలను అమలు చేయడం ద్వారా నవ్యాంధ్ర ప్రజల జీవన ప్రమాణాలను మెరుగుపరచి వారి అభిమానాన్ని చూరగొన్నామని చెప్పారు. రైతులు, మహిళలు, యువత, బీసీ, ఎస్సీ, ఎస్టీ, మైనారిటీలందరికీ సమ న్యాయం చేశామని, దీనితో అన్ని వర్గాలు పార్టీకి అండగా నిలిచాయన్నారు. ముఖ్యంగా మహిళలు, పింఛన్‌దారులు బారులుతీరి టీడీపీకి ఓట్లు వేశారని, బీసీ ఓటు బ్యాంకు నిలబెట్టుకుంటూనే ఎస్సీ, ఎస్టీ, మైనారిటీ ఓట్లు పెంచుకున్నాము గనుకనే తెదేపా గెలవబోతోందన్నారు. సైకిల్‌ గెలుపుపై ఎటువంటి అనుమాల్లేవని, సీట్ల ఆధిక్యత పైనే విశ్లేషణ చేయడం జరుగుతోందని చెప్పారు. ఇది ఇలా ఉంటే, ఒక నాయకుడు మాట్లాడుతూ, జగన్ మోహన్ రెడ్డి సియం అవుతున్నాడు అంటూ ప్రచారం జరుగుతుంది అని చెప్తే, దానికి చంద్రబాబు అద్భుతమైన విశ్లేషణతో జగన్ రాడు అంటూ సమాధానం చెప్పూర్.

రూ.43 వేల కోట్ల అవినీతికి పాల్పడిన వైసీపీ 40 ఏళ్ల రాజకీయ అనుభవం కలిగిన టీడీపీకి ఏవిధంగానూ పోటీదారు కాదని చంద్రబాబు అన్నారు. 26 విచారణలు చేయించినా ధీటుగా ఎదుర్కొని నిప్పులా నిలబడిన పార్టీ టీడీపీకి అరాచక శక్తులు, అవినీతి పరులకు నిలయమైన వైసీపీతో పోలికే లేదన్నారు. తాజాగా జరిగిన ఎన్నికల్లో తొలి నుంచి వైకాపా విధ్వంసక పాత్ర పోషించిం దని, ప్రతికూల వాతావరణం సృష్టించి లబ్ది పొందాలని అనేక కుట్రలకు తెగబడిందన్నారు. పోలింగ్‌నాడు ప్రజలు ఓటు వేయడానికి రానీయకుండా బెదిరింపులు, దాడులకు పాల్ప డ్డారని, జగన్‌ కుట్రలకు తోడు మోడీ, కేసీఆర్‌ కుతంత్రాలు కూడా తోడయ్యాయని తెలిపారు. కానీ ఆ సమయంలో టీడీపీ ప్రతిచర్యలకు దిగకుండా సంయమనం పాటించడం తోపాటు ఎప్పటికప్పుడు ఓటర్లలో ధైర్యం నింపడంతో అధిక శాతం పోలింగ్‌ నమోదైందని గుర్తు చేశారు. 1983 తరువాత పెద్ద ఎత్తున పోలింగ్‌ జరగడం ఇప్పుడు సాధ్యమైందన్నారు. రాష్ట్ర ప్రయోజనాల కోసమే కేంద్రంపై ధర్మపోరాటం చేసామని, దేశవ్యాప్తంగా బీజేపీ వ్యతిరేక శక్తులను కూడగట్టడంలో టీడీపీ విజయం సాధించిందని చెప్పారు. ఓటమి నైరాశ్యంతో ఉన్న మోడీ మానసిక ఒత్తిడితో దిగ జారుడు వ్యాఖ్యలు చేస్తున్నారని, 27 ఏళ్ల క్రితం మరణించిన రాజీవ్‌ గురించి విమర్శలు చేయడం ఆయన చౌకబారు రాజకీయాలకు నిదర్శనమని విమర్శించారు. దేశవ్యాప్తంగా బీజేపీ వ్యతిరేక పవనాలు వీస్తున్న నేపధ్యంలో ఇక మోడీ శకం ముగిసినట్లే అని, త్వరలో దేశానికి కొత్త ప్రధాని రాబోతున్నారని తెలిపారు.

ఈ ఎన్నికల్లో బీజేపీ వ్యతిరేక కూటమికి అనుకూలంగా స్పష్టమైన తీర్పు వస్తుందని తెలుగుదేశం అధ్యక్షుడు, సీఎం చంద్రబాబు పేర్కొన్నారు. గురువారం రాత్రి ఆయన కోల్‌కతాలో పీటీఐ వార్తా సంస్థకు ప్రత్యేకంగా ఇంటర్వ్యూ ఇచ్చారు. ‘‘ఇటీవల జరిగిన అన్ని ఎన్నికలు, ఉప ఎన్నికల్లో బీజేపీ ఓడిపోయింది. ఆ పార్టీపై ప్రజల్లో తీవ్ర ఆగ్రహం ఉంది. తొలి ఐదు దశల ఎన్నికల్లో బీజేపీ వ్యతిరేకత అత్యంత స్పష్టంగా కనిపించింది. నెంబర్లు చెప్పను కానీ... 23వ తేదీ తర్వాత మోదీ గద్దె దిగడం మాత్రం ఖాయం’’ అని చంద్రబాబు స్పష్టం చేశారు. విపక్షాల తరఫున ప్రధాని ఎవరన్న ప్రశ్నకు బదులిస్తూ... ‘‘మేమంతా బలమైన నాయకులమే. నరేంద్ర మోదీకంటే ఎవరైనా మెరుగే. ప్రధాని ఎవరన్నది ఫలితాల తర్వాత సమావేశమై నిర్ణయిస్తాం’’ అని తెలిపారు.

వీలైతే ఫలితాలు వచ్చే 23వ తేదీనే విపక్షాల సమావేశం నిర్వహిస్తామన్నారు. పోలింగ్‌కు రెండురోజుల ముందు...అంటే 21వ తేదీన బీజేపీయేతర పార్టీల సదస్సు పెడదామని అనుకున్నా... దానిపై ఇంకా తుది నిర్ణయం తీసుకోలేదన్నారు. తృణమూల్‌ అధినేత్రి మమతా బెనర్జీ ప్రధాని పోటీలో ఉన్నారా? అని ప్రశ్నించగా... దానిపై తమ మధ్య చర్చ జరగలేదన్నారు. తాను మాత్రం ప్రధాని పోటీలో లేనని... సమన్వయకర్తగా మాత్రమే వ్యవహరిస్తానని చంద్రబాబు తెలిపారు. మోదీ కేవలం ప్రత్యర్థులపై బురదజల్లడం, దాడి చేయడం, విమర్శించడం తప్ప... ప్రజలకు ఇస్తున్న సందేశమేదీ లేదని చంద్రబాబు పేర్కొన్నారు. పాతికేళ్ల క్రితం మరణించిన రాజీవ్‌గాంధీని ఇప్పుడు ఎన్నికల్లోకి లాగడంలో హుందాతనం ఎక్కడుందని ప్రశ్నించారు. ఇంత హీనమైన రాజకీయాలు ఎప్పుడూ లేవన్నారు.

బెంగాల్‌లో మోదీ, అమిత్‌షా పదేపదే తిరుగుతున్నప్పటికీ... వారికి ఇక్కడ వచ్చే సీట్లేమీ ఉండవని చంద్రబాబు తెలిపారు. మమతా దీదీని మోదీ సవాల్‌ చేయలేరన్నారు. ఈ విషయం గమనించే మతతత్త్వం రెచ్చగొట్టాలని... బెంగాల్‌ ప్రజల మధ్య చిచ్చుపెట్టాలని బీజేపీ ప్రయత్నిస్తోందని విమర్శించారు. ‘‘ఎన్నికల సంఘం కూడా బీజేపీ తరఫున పని చేస్తోంది. తన విశ్వసనీయతను కోల్పోయింది’’ అని తెలిపారు. మరోవైపు... ఒడిసా సీఎం నవీన్‌ పట్నాయక్‌ను మొన్నటివరకు మోదీ తీవ్రంగా విమర్శించారని, అక్కడ తమకు అనుకూల ఫలితాలు రావని తేలడంతో ఫణి తుఫానుకు సాయం ప్రకటించడం ద్వారా నవీన్‌ను దగ్గర చేసుకోవాలని చూస్తున్నారని తెలిపారు.