news

నాది 56 అంగుళాల ఛాతీ... నా దమ్ముతో దేశాన్ని నిలబెడతా అని చెప్తున్న ప్రధాని మోడీ, అదే దేశంలో, 5 కోట్ల మంది ఆంధ్రులు ఉన్న సంగతి మర్చిపోయారు. మర్చిపోవటం కూడా కాదేమో, అహంభావంతో, మన మీద చులకనతనం.. నిన్న అవిశ్వాసం పెట్టింది ఎందుకు ? ఈ దేశంలోని ఆంధ్రప్రదేశ్ అనే రాష్ట్రంలో ఉన్న, 5 కోట్ల మందిని ప్రధాని ముంచేశారు అని. నిన్న జయదేవ్ కాని, రాంమోహన్ నాయుడు కాని, ఏమి మాట్లడారు ? లేకపోతే వాళ్ళు మాట్లాడింది, మోడీకి అర్ధం కాలేదా ? దాదాపు ఇద్దరూ కలిసి గంటకు పైగా, ఆంధ్రప్రదేశ్ రాష్ట్రానికి కేంద్రం చేస్తున్న అన్యాయం చెప్పారు. ఎక్కడా రాజకీయం చెయ్యలేదు. మోడీ ఏమి చెప్పారు, చట్టంలో ఏమి ఉంది, ఇప్పుడు ఎనుకు అమలు చెయ్యటం లేదు అనే అడిగారు. దాదాపు విభాజన చట్టంలో 18 అంశాలతో పాటు, మిగిలిన హామీల పై నిలదీశారు..

మరి అవిశ్వాసం పెట్టిన సందర్భం తగ్గట్టు మన ప్రధాని మాట్లాడాలి కదా ? 5 కోట్ల మంది ప్రజలు నా పట్ల ఎందుకు విశ్వాసంతో లేరు ? నేను ఏమి చేసాను, ఏమి చేస్తానో చెప్పాలి కదా ? ప్రధాని మాత్రం అవేమి చెప్పలేదు. రెండు గంటలు మాట్లాడి, కొన్ని సినిమా పెర్ఫార్మన్స్ లు ఇచ్చి, మన రాష్ట్రం గురించి రెండే రెండు నిమషాలు మాట్లడారు. అది కూడా రాజకీయ ప్రసంగం. ఇది తెలుగుదేశం పార్టీకి, కేంద్రానికి సంబంధించినది కాదు, అని మన ఘనత వహించిన ప్రధాని గారికి తెలియదు అంటే ఆశ్చర్యం కలుగుతుంది ఏమో. నిన్న జరిగింది, 5 కోట్ల మందికి, ప్రధాని మీద విశ్వాసం పోవటం. అది వదిలేసి, మన రాష్ట్రం గురించి మాట్లాడిన రెండు ముక్కలు, రాజకీయ కోణంలో మాట్లడారు.

స్పెషల్ స్టేటస్ కు లింక్ పెట్టి రాజకీయం చేసారు. చంద్రబాబుకి ఫోన్ చేసాను, మీరు జగన్ ట్రాప్ లో పడ్డారు అని అన్నారు. కెసిఆర్ చాలా హుందాగా ఉన్నారు, చంద్రబాబు అలా లేరు అన్నారు. కేవలం రాజాకీయ కోణంలోనే చంద్రబాబు ఇలా చేసారు అన్నారు. చంద్రబాబుకి రాజకీయ సమాధానం చెప్పారు సరే, మరి 5 కోట్ల మందికి ప్రధాని ఏమి చెప్పారు ? పోలవరం, రెవెన్యూ లోటు భర్తీ, ఆస్తుల విభజన, విద్యాసంస్థలకు తగిన స్థాయిలో నిధుల విడుదల, విశాఖకు రైల్వే జోన్‌, కడప ఉక్కు కర్మాగారం... ఇలా అనేక సమస్యలున్నప్పటికీ దేనినీ ప్రధాని ప్రస్తావించలేదు. ‘హోదా ఇవ్వలేక పోయాం. ప్యాకేజీ ఇచ్చాం. రాజధాని పనులకు తోడ్పాడు అందిస్తాం’ అనే మాట మాత్రమే చెప్పారు. ప్రధాని హోదాలో ఉండి, రాష్ట్ర సమస్యలు ప్రస్తావించకుండా, మన ప్రధాని రాజకీయ ప్రసంగం ఇది.

కంభంపాటి హరిబాబు... ఈ పేరు ఎవరికన్నా తెలుసా ? మొఖం చూస్తే, పది మందిలో ఒకరు గుర్తుపడతారు.. ఈ మహానుభావుడు వైజాగ్ ఎంపీ... పక్కంటి వారికి కూడా తెలియని ఈయన, తెలుగుదేశంతో పొత్తు పెట్టుకుని, విజయమ్మ మీద ఎంపీగా గెలిచారు. విజయమ్మ గెలిస్తే వైజాగ్ నాశనం అవుతుంది అని, ఈయన్ను ఎన్నుకున్నారు ప్రజలు. ఈ రోజు పార్లమెంట్ లో కంభంపాటి హరిబాబు చేసిన ప్రసంగం, ప్రతి ఆంధ్రుడు గుండెల్లో గునపం గుచ్చేలా ఉంది. తమ ఢిల్లీ బాసులను ప్రసన్నం చేసుకోవటానికి, మా మోడీ అన్నీ చేసాడు, ఆంధ్రప్రదేశ్ కు అన్నీ చేసేసాం, తెలుగుదేశం మోసం చేసింది అంటూ, ఢిల్లీ బాసులకి జై కొట్టి, ఆంధ్ర రాష్ట్ర ప్రజల్లో చరిత్ర హీనుడుగా మిగిలిపోయారు. అప్పట్లో సమైఖ్యాంధ్ర ఉద్యమం జరుగుతున్నప్పుడు, కాంగ్రెస్ పార్టీకి చెందిన, ఆంధ్రప్రదేశ్ ఎంపీలు, ప్రజల మనోభావాలకు తగ్గట్టు ప్రవర్తించి, సోనియా గాంధీకి ఎదురు తిరిగారు.

ఇక్కడ మాత్రం, ఈ బీజేపీ ఏపి ఎంపీ, తమ ఢిల్లీ బాసులకు జై కొట్టి, ఆంధ్రప్రదేశ్ ప్రభుత్వం పై విరుచుకుపడ్డాడు. తన సొంత ఊరు వైజాగ్ లో, రైల్వే జోన్ తెచ్చుకోలేని ఈ దద్దమ్మ ఎంపీ, ఎదురు ఆంధ్రప్రదేశ్ పై పడి, ఐదు కోట్ల మంది ప్రజల గుండెల్లో కొట్టారు. ఆ రోజు బిల్ పెట్టిన కాంగ్రెస్ తప్పు అంటూ, ప్రత్యేక హోదా అంశం ఎందుకు చేర్చలేదని ప్రశ్నించారు. మరి అప్పట్లో ప్రతిపక్షంగా ఉన్న బీజేపీ, ప్రత్యేక హోదా చట్టంలో పెడితేనే తెలంగాణా బిల్ కు మద్దతు ఇస్తాం అని ఎందుకు చెప్పలేదు ? సుష్మా స్వరాజ్ వచ్చి, నేను మీ చిన్నమ్మని, సోనియా పెద్దమ్మ, మేమే తెలంగాణా ఇచ్చాం అని చెప్పుకున్న బీజేపీకి, బిల్ రూపొందించినప్పుడు ఎక్కడ నిద్రపోయారు ?

పోలవరంపై మోదీ ప్రత్యేక శ్రద్ధ తీసుకుని ముందుకు తీసుకువెళ్లారని, నితిన్ గడ్కరి ప్రత్యేకంగా ప్రాజెక్టు పనులు సమీక్షించి సంపూర్ణ సహకారానికి భరోసా ఇచ్చారని చెప్పారు. పోలవంరం మీరు పూర్తి చేయకున్నా మేము పూర్తి చేస్తామని, ఆ సామర్థ్యం మాకు ఉందని అన్నారు. అలాగే మోదీ చొరవతో ఏపీకి రావాల్సిన 11 యూనివర్శిటీలో 10 యూనివర్శిటీల కేటాయింపు జరిగిపోయిందని, మిగిలిన గిరిజన యూనివర్శిటీకి జవదేకర్ వచ్చేలా చూస్తారని హరిబాబు అన్నారు. ఈ యూనివర్శిటీలకు ఇచ్చిన నిధులు మాత్రం హరిబాబు మర్చిపోయారు. ఇలా అన్ని విధాలుగా, ఏపికి అండగా నిలవకుండా, తమ ఢిల్లీ బాసులకి అండగా నిలిచి, హరిబాబు చరిత్ర హీనుడిగా మిగిలిపోయాడు.

ఉదయం మిస్టర్ ప్రైమ్ మినిస్టర్ అంటూ, గల్లా జయదేవ్ ఇచ్చిన రీసౌండ్ చెవిల్లో నుంచి బీజేపీ నేతలకు, ఇప్పుడిప్పుడే బయటకు వెళ్తుంటే, సాయంత్రం శ్రీకాకుళం ఎంపీ రాం మోహన్ నాయుడు అందుకున్నారు. అలా ఇలా కాదు, గల్లా క్లాస్ గా కొడితే, రాంమోహన్ నాయుడు హిందీలో మాస్ గా వాయించి పడేసారు. దివంగత ఎర్రన్నాయుడుని గుర్తు చేస్తూ, ఇచ్చిన పది నిమషాల టైంలో గడగడ హిందీలో మాట్లాడుతూ, శభాష్ అనిపించారు. 5 కోట్ల మంది తెలుగు ప్రజల బాధను, హిందీ భాషలో దేశమంతటా అర్ధమయ్యేలా చెప్పారు. అన్ని విషయాలు చెప్తూ, ప్రధాన మంత్రి గారు సమాధానం చెప్పండి అంటూ, గర్జించారు. ఉదయం గల్లా జయదేవ్ ఆపిన చోటు నుంచి, రాము అందుకున్నాడు.

విశాఖలో కావలసినంత భూమి, పోర్టు, పరిశ్రమలు ఉన్నాయని, ఇక్కడి కేంద్ర మంత్రులు ఎవరొచ్చినా చందమామ కథలు చెబుతున్నారని విమర్శించారు. విభజనతో ఏపీకి అన్యాయం జరుగుతుందని అప్పటి ప్రధాని ప్రత్యేకహోదా ప్రకటించారని, ప్రత్యేక హోదా ఐదేళ్లు కాదు, పదేళ్లు కావాలని అరుణ్ జైట్లీ, వెంకయ్యనాయుడు నాడు మాట్లాడిన విషయాలను ఆయన ప్రస్తావించారు. విభజన చట్టాన్ని అదే స్ఫూర్తితో అమలు చేయాల్సిన బాధ్యత కేంద్రంపై ఉందని డిమాండ్ చేశారు. చాలాసార్లు ఢిల్లీకి వచ్చిన మా సీఎం, ఏపీకి ప్రత్యేక హోదా, రైల్వేజోన్ గురించి అడిగితే వేరే విషయాలు మాట్లాడుతన్నారని, అసలు.. విశాఖలో రైల్వోజోన్ ఏర్పాటు చేయడానికి ఉన్న ఇబ్బందేంటి? అని ప్రశ్నించారు.

విశాఖ - చెన్నై పారిశ్రామిక కారిడార్ కు కేంద్రం ఇప్పటికీ పైసా కూడా ఇవ్వలేదని, సభ సాక్షిగా బీజేపీ ఎంపీ హరిబాబు అసత్యాలు ప్రచారం చేశారని రామ్మోహన్ నాయుడు మండిపడ్డారు. టీడీపీకి 15 మంది ఎంపీలున్నారని, తమను తక్కువగా తీసుకోవద్దని ఈ సందర్భంగా ఆయన హెచ్చరించారు. ప్రజాస్వామ్య ఆలయం పార్లమెంట్ అని, తమకు అన్యాయం జరిగింది ఈ సభలోనే కనుక, ఇక్కడ కాకపోతే ఇంకెక్కడ అడుగుతామని ప్రశ్నించారు. ఏపీకి సంబంధించి ప్రధాని మోదీ విధానం ఏమిటో ఈరోజు స్పష్టం చేయాలని డిమాండ్ చేశారు.