news

తెలంగాణ ముఖ్యమంత్రి కేసీఆర్ నిన్న పోలీసు ఉన్నతాధికారులు, న్యాయ నిపుణులతో ఓటుకు నోటు కేసు పై సమీక్ష నిర్వహించిన విషయం తెలిసిందే. ఈ కేసు పై కాంగ్రెస్‌ నేత రేవంత్‌ రెడ్డి తాజాగా మీడియాతో మాట్లాడుతూ కేసీఆర్‌ తీరు పై ఆగ్రహం వ్యక్తం చేశారు. తమని భయపెట్టో, బెదిరించో లొంగదీసుకుని రాజకీయ పరంగా కొందరు ప్రయోజనాలు పొందాలనుకుంటున్నారని, ప్రధానమంత్రి నరేంద్ర మోదీ, తెలంగాణ సీఎం కేసీఆర్‌ కలిసి ఆడుతోన్న నాటకంలో భాగమే నిన్నటి వ్యవహారమని అన్నారు. ఈ సందర్భంగా ఓటుకు నోటు కేసుకి సంబంధించి వివరాలు చెప్పాలని తాను అనుకోవట్లేదని, ఈ విషయంపై మాట్లాడవద్దని కోర్టు ఆంక్షలు విధించిందని రేవంత్‌ రెడ్డి తెలిపారు.

కేసీఆర్ తీరుని మాత్రం ప్రజలకి చెప్పాల్సిన అవసరం ఉందని చెప్పారు. రాజకీయ కక్ష సాధింపు చర్యల కోసం నిన్న పలువురు అధికారులతో కేసీఆర్ ఏడు గంటలు ఓటుకు నోటు కేసుపై చర్చించారని అన్నారు. ఇటీవల భారత రాజకీయ అంశాలను గమనిస్తే ప్రధానంగా ఏపీకి ప్రధాని మోదీ అన్యాయం చేస్తున్నారు కాబట్టి ఎన్డీఏ కూటమి నుంచి ఏపీ ముఖ్యమంత్రి చంద్రబాబు నాయుడు బయటకు వచ్చారని రేవంత్‌ రెడ్డి అన్నారు. కర్ణాటకలో భాజపాను ఓడించాలని పిలుపునివ్వడంతో మోదీ ఆయన్ను టార్గెట్‌ చేశారన్నారు. అదే సమయంలో తెలంగాణలో టీఆర్‌ఎస్‌ వైఫల్యాలపై తాము పోరాడుతున్నామని, తాను కాంగ్రెస్‌ సభల్లో పాల్గొంటూ కేసీఆర్‌ సర్కారు ఎన్ని కోట్ల రూపాయల అనినీతికి పాల్పడిందో వివరిస్తున్నానని తెలిపారు.

రాష్ట్ర ప్రజల్లో ఆలోచన కలుగజేస్తూ చైతన్యం తీసుకొస్తున్నానని రేవంత్‌రెడ్డి అన్నారు. కేసీఆర్‌ కుటుంబం విలాసవంతమైన జీవితం కొనసాగించడానికి ఇటువంటి ఎటువంటి చర్యలకు పాల్పడుతుందో వివరించి చెబుతున్నానని అన్నారు. దీంతో మోదీ, కేసీఆర్ ఈ విషయాలను జీర్ణించుకోలేకపోతున్నారని, మోదీ ఆదేశాల మేరకు కేసీఆర్‌ నిన్న సమీక్ష జరిపారని అన్నారు. మోడీ, కెసిఆర్ తో కలిసి, చంద్రబాబు ప్రభుత్వంపై కుట్ర రాజకీయాలకు పాల్పడుతున్నాయని ఆరోపించారు. కర్ణాటక ఎన్నికలను దృష్టిలో పెట్టుకున్న భాజపా.. ఆంధ్రప్రదేశ్‌కు తాము చేసిన అన్యాయం తాలూకు ఫలాలు పరోక్షంగా ప్రజాతీర్పుపై ఉండవచ్చన్న భావనతో ఏమాత్రం సంబంధం లేని అంశమైన ఓటుకు నోటు కేసును ప్రస్తావించడం కుట్రకాక మరేంటని ప్రశ్నించారు. భాజపా కనుసన్నల్లోనే తెలంగాణ ప్రభుత్వం ఓటుకు నోటు కేసుపై సమీక్ష చేపట్టిందని పేర్కొన్నారు.

ఎన్నికల సంవత్సరంలో కూడా చంద్రబాబు ఎక్కడ బాలన్స్ తప్పటంలేదు... సంక్షేమానికి పెద్ద పీట వేస్తూనే, ఆయన విజన్ కలెక్టర్ల ముందు పెట్టారు... రాబోయే రోజులకు గాను మౌలిక వసతుల కల్పనను ప్రభుత్వం అత్యంత ప్రాధాన్య అంశంగా నిర్ణయించింది. ముఖ్యంగా గ్రామీణ ప్రాంతాలలో సంతృప్తి స్థాయికి చేరుకునేలా సంపూర్ణ మౌలిక వసతుల కల్పనను తొలి ప్రాధాన్య అంశంగా తీసుకున్నారు. పట్టణ ప్రాంతాలలో మౌలిక సదుపాయాల కల్పనను రెండో ప్రాధాన్య అంశంగా, ఆరోగ్యం- పౌష్టికాహారం మూడో ప్రాధాన్య అంశంగా భావిస్తున్నారు. తయారీరంగాన్ని కూడా ప్రాధాన్య అంశాల జాబితాలో చేర్చారు. 2018-19 ఆర్థిక సంవత్సరానికి గాను ప్రభుత్వ ప్రాధాన్య అంశాలేమిటో మంగళవారం ఇక్కడ జరిగిన జిల్లా కలెక్టర్ల సదస్సులో అధికారులు వెల్లడించారు. .

నీతిఆయోగ్ సూచికల్లో ఆంధ్రప్రదేశ్ సాధించిన మైలురాళ్లను కలెక్టర్ల సదస్సులో ప్రకటించారు. వ్యాపార సంస్కరణ కార్య ప్రణాళిక అమలులో (బిజినెస్ రిఫార్మ్ యాక్షన్ ప్లాన్ ఇంప్లిమెంటేషన్‌)లో నూరుశాతం స్కోరుతో రాష్ట్రం తొలి ర్యాంకు సాధించడం విశేషం. వ్యవసాయోత్పత్తుల విపణి-రైతులతో స్నేహపూరిత సంస్కరణల సూచికలో (అగ్రికల్చరల్ మార్కెటింగ్-ఫార్మర్ ఫ్రెండ్లీ రిఫార్మ్ ఇండెక్స్-2016)లో 56.2 స్కోరుతో ఏపీ 7వ ర్యాంకు సాధించినట్టు అధికారులు వెల్లడించారు. ఆరోగ్యరంగ ప్రగతి సూచిక (పెర్ఫామెన్స్ ఆన్ హెల్త్ అవుట్ కమ్ ఇండెక్స్-2016)లో 0.62 శాతం స్కోరుతో మన రాష్ట్రం 10 వ ర్యాంకులో ఉన్నట్టు వివరించారు. తాజా ఆరోగ్య సూచిక (హెల్త్ ఇండెక్స్ 2018)లో 60.16 స్కోరుతో 8వ ర్యాంకు సాధించామని ప్రకటించారు. పాఠశాల విద్య ప్రమాణాల సూచిక (స్కూల్ ఎడ్యుకేషన్ క్వాలిటీ ఇండెక్స్-2016)లో 56 శాతం స్కోరుతో ఆంధ్రప్రదేశ్ 17 వ ర్యాంకు సాధించినట్టు తెలిపారు.

గ్రామీణ మౌలిక సదుపాయాల్లో సాధించిన ప్రగతిని అధికారులు కలెక్టర్ల సదస్సులో వెల్లడించారు. రాష్ట్రంలో అర్హత గల అన్ని కుటుంబాలకు నూరుశాతం ఎల్‌పీజీ కనెక్షన్లను అందజేసినట్టు తెలిపారు. రాష్ట్రంలో ఉన్న ప్రతి ఇంటికీ విద్యుత్ సౌకర్యం కల్పించామని, గ్రామీణ ప్రాంతాలలో నూరుశాతం ఓడీఎఫ్ అమలు చేస్తున్నామని తెలిపారు. 80శాతం శివారు గ్రామాలన్నీ 0.5 శాతం పరిధిలో రహదారులకు అనుసంధానం చేసినట్టు చెప్పారు. 30,500 కిలోమీటర్ల మేర గ్రామాలలో అంతర్గత సిమెంట్ రహదారుల నిర్మాణం పూర్తి చేసినట్టు వివరించారు. 2018-19లో 9,765 గ్రామ పంచాయతీలలో ఘన వ్యర్ధ పదార్థాల నిర్వహణ చేపట్టాలని లక్ష్యంగా నిర్ణయించినట్టు అధికారులు తెలిపారు. 24,783 శివారు గ్రామాల ప్రజానీకానికి ఒక్కొక్కరికీ 55 లీటర్ల చొప్పున మంచినీటి సరఫరా లక్ష్యంగా నిర్దేశించారు. 10,754 గ్రామ పంచాయతీలో ఎల్ఈడీ వీధి దీపాల సదుపాయం కల్పించాలని లక్ష్యంగా పెట్టుకున్నారు. రాష్ట్రంలో ఉన్న 10,344 శివారు గ్రామాలలో బీటీ రహదారులను ఏర్పాటు చేయాలన్న కొత్త లక్ష్యాన్ని ప్రకటించారు.

రాష్ట్ర విభజనతో నష్టపోయిన ఆంధ్రప్రదేశ్‌కి ఏదో ఒకటి చేయడానికి ముఖ్యమంత్రి చంద్రబాబు చాలా కష్టపడుతున్నారని సినీనటుడు ప్రకాశ్‌ రాజ్‌ అన్నారు. తాజాగా ఆయన ఓ ఇంటర్వ్యూలో మాట్లాడుతూ.... ప్రత్యేక హోదాపై ప్రధానమంత్రి నరేంద్ర మోదీ హామీ ఇచ్చి అమలుచేయలేదని, దీంతో ఏపీ ప్రజలకి చాలా అన్యాయం జరిగిందని వ్యాఖ్యానించారు. కేంద్ర సర్కారు నుంచి సాయం అందకుండాపోతుండడంతో చంద్రబాబు నిస్సహాయంగా ఉన్నారని, ఈ పరిస్థితుల్లో చంద్రబాబును ఏమీ అనలేమని చెప్పారు. ఆంధ్ర ప్రదేశ్‌ ప్రజలు ప్రత్యేక హోదాని అడుక్కోవడం లేదని, అది సాధించుకోవడం వాళ్ల హక్కని వ్యాఖ్యానించారు. కేంద్ర ప్రభుత్వ సాయం చేయకపోతే ఈ పరిస్థితుల్లో ఏపీ ఎలా ఎదుగుతుందని నిలదీశారు.

మరో పక్క పవన్ కళ్యాణ్ గురించి కూడా మాట్లాడారు... ప్రకాశ్ రాజ్ కొన్ని సూచనలు చేశారు. ఆయనతో ఎంతమంది వస్తారు... ఆయన ఆలోచన పరంగా ఎంతమంది వచ్చి చేరతారు అనే విషయాలపై జాగ్రత్తగా ఉండాలన్నారు. ముంచేసే ప్రమాదం కూడా ఉందని ఆందోళన వ్యక్తం చేశారు. ఆయనలా పార్టీ పెట్టి తాను రాజకీయం చేయలేనని.. మంచి చేయాలని వస్తున్న పవన్‌ను ఆహ్వానిద్దామన్నారు. మంచి చేసే వాళ్లు ఎవరికీ పోటీ కాదు కదా అన్నారు. న్యూస్ ఛానల్‌తో మాట్లాడుతూ ప్రకాశ్ రాజ్ ఈ వ్యాఖ్యలు చేశారు.

ముందు ప్రమాదకరంగా మారిన బీజేపీని అడ్డుకోవాలని ప్రజలకు పిలుపునిచ్చారు. జనాల్లో చైతన్యం తీసుకురావాలని.. దానికోసం నిరంతరం ప్రయత్నం చేస్తూనే ఉంటానన్నారు. మోదీలా అబద్ధాలు చెప్పే ప్రధానిని ఎక్కడా చూడలేదన్నారు. అవినీతి కంటే మతతత్వం మరింత ప్రమాదకరమని సినీ నటుడు ప్రకాశ్‌ రాజ్‌ అన్నారు. హిందూత్వవాదులు తనపై వ్యక్తిగతంగా దాడి చేస్తున్నారని ఆయన చెప్పారు. ప్రశ్నించడం మొదలుపెట్టగానే నాకు సినిమాలు, యాడ్స్‌ తగ్గాయని ఆయన అన్నారు. ఆరెస్సెస్‌ విధానాలే మోడీ, బిజెపి విధానాలని ఆయన అన్నారు. నల్లధనం వెనక్కుతెస్తామన్న హామీ ఏమైంది? ఆయన ప్రశ్నించారు. తానెప్పుడూ ఏ పార్టీకి, ఎప్పుడూ ప్రచారం చేయనని ఆయన స్పష్టం చేశారు. ప్రత్యేక హోదా ఎపి ప్రజల హక్కుఅని ఆయన చెప్పారు. ఈ ఎన్నికల్లో కర్ణాటకలో బిజెపి, 2019 ఎన్నికల్లో మోడీ ఓటమి ఖాయమని ఆయన చెప్పారు.