news

ఇవాళ రాష్ట్రమంతా ఒక వైపు పోతుంటే జగన్ ఎక్కడ దాక్కున్నారో ప్రతి ఒక్కరూ నిలదీయాలని ముఖ్యమంత్రి చంద్రబాబు ప్రజలకు పిలుపునిచ్చారు. రాష్ట్రానికి జగన్ చేసిందంతా డ్రామా అనేది ఇవాళ్టితో ప్రజలందరికీ అర్థం కావాలన్నారు. ప్రజలంతా మోదీకి వ్యతిరేకంగా నిరసనలు తెలుపుతుంటే జగన్‌ హైదరాబాద్‌లో దాక్కుని కుట్రలు పన్నుతున్నారని విమర్శించారు. వైకాపా తప్ప అన్నిపార్టీలు నిరసనలు తెలుపుతున్నాయని, జగన్‌ భాజపాతో లాలూచీ పడ్డారని దుయ్యబట్టారు. మోదీ పర్యటనకు జగన్‌ సహకరిస్తున్నారనే విషయం ప్రతి గ్రామంలో తెలిసేలా చెయ్యాలని నేతలకు పిలుపునిచ్చారు. ఈ మేరకు పార్టీ నాయకులు, కార్యకర్తలతో ముఖ్యమంత్రి చంద్రబాబు ఆదివారం ఉదయం టెలికాన్ఫరెన్స్‌ నిర్వహించారు.

రేపటి దిల్లీ దీక్షకు ప్రజలoదరి మద్దతు తీసుకోవాలని నేతలకు సూచించారు. మోదీ వ్యక్తిగత ప్రయోజనాల కోసం వ్యవస్థలన్నీ నాశనం చేశారని, అందుకే దేశంలో ఎక్కడికి వెళ్లినా మోదీకి నిరసనలు తప్పడం లేదని విమర్శించారు. రాష్ట్రానికి అన్యాయం చేసి మళ్లీ సెంటిమెంట్‌తో ఆడుకోవడానికి, మనల్ని ఎగతాళి చేయటానికే మోదీ వస్తున్నారని మండిపడ్డారు. కన్నా లక్ష్మీనారాయణ వైకాపా వత్తాసు తీసుకుని మాట్లాడుతున్నారని, ఆయన భాజపాలో వైకాపా ఏజెంట్ అని విమర్శించారు. ర్యాలీలలో రెండు కుండలను పగులకొట్టాలని... ఒక కుండ నరేంద్రమోదీ, రెండో కుండ జగన్‌ మోహన్‌రెడ్డికని అన్నారు. ఆ రెండు కుండలు రెండు పార్టీల లాలూచీకి సంకేతమని చెప్పారు.

మరో పక్క లోకేష్ కూడా ఈ విషయం పై ట్విట్టర్ లో స్పందించారు... నరేంద్ర మోదీ పర్యటన సందర్భంగా రాష్ట్రమంతా ఒక్కటై రోడ్డెక్కి హోదా కోసం పోరాడుతుంటే ప్రతిపక్ష నేత జగన్‌ ఎక్కడ అని, వైసీపీ నాయకులు ఎక్కడంటూ రాష్ట్ర మంత్రి నారా లోకేశ్ పేర్కొన్నారు. ఆదివారం ట్విట్టర్ వేదికగా విపక్ష నేత జగన్‌పై పలు విమర్శలు చేశారు. తనపై ఉన్న 26 కేసులకు భయపడి జగన్ దాక్కున్నారా.., అరెస్ట్‌ చేసి జైలుకి పంపుతారు అని భయంపట్టుకుందా?, లేక లోటస్‌పాండ్‌లో పడుకున్నారా? అంటూ విమర్శించారు. అలాగే ఆంధ్రులు చేస్తున్న పోరాటానికి మద్దతు పలకకపోగా మోదీతో జోడీకట్టిన జగన్‌, వైసీపీ కార్యకర్తలను మోదీ సభకు పంపుతున్నారని లోకేష్‌ అన్నారు.

5 కోట్ల ఆంధ్రులను నమ్మించి మోసం చేసి, ఢిల్లీ అహంకారాన్ని, ఆంధ్రుల పై రుద్దుతున్న మోడీ పై, యావత్త ఆంధ్రప్రదేశ్ ఆందోళన చేస్తుంటే, వైసీపీ అధ్యక్షుడు జగన మోహన్ రెడ్డి మాత్రం, ఆయనకు ఘన స్వాగతం పలుకుతున్నారు. మోడీ సభకు ఒక పక్క జగన్, ఒక పక్క మోడీ ఫోటోలు, జెండాలు పెట్టి మరీ ప్రజలను తరలిస్తున్నారు. మరో పక్క, కృష్ణా, గుంటూరు జిల్లాల నాయకులు, మోడీకి స్వాగతం పడుతూ, బ్యానర్లు కట్టారు. బీజేపీ..వైసీపీ అక్రమ సంబంధానికి ఇంతకంటే రుజువులు కావాలా?? రాష్ట్రానికి జరిగిన అన్యాయాన్ని వెనకనుండి మద్దతు ఇచ్చింది ఎవరో తెలిసిందా? ప్రత్యేక హోదా ముగిసిన అధ్యాయం.. ఇవ్వడం కుదరదు అన్న బీజేపీ తో కలిసి హోదా తెస్తారా వీళ్ళు....?? కేసుల కోసం మోడీ కాళ్లదగ్గర మొకరిల్లే వీళ్ళ వలన రాష్ట్రానికి ప్రయోజనం ఉందా??

బీజేపీతో టీడీపీ కటీఫ్‌ తర్వాత ప్రధాని నరేంద్ర మోదీ తొలిసారి నవ్యాంధ్రకు వస్తున్నారు. ఆదివారం ఉదయం 11.15 గంటలకు గుంటూరులోని ఏటుకూరు బైపాస్‌లో పలు ప్రాజెక్టులను ప్రారంభిస్తారు. వాటి శిలాఫలకాలను ఆవిష్కరిస్తారు. ఆ తర్వాత... అక్కడికి సమీపంలోనే ఏర్పాటు చేసిన బహిరంగ సభలో మోదీ ప్రసంగిస్తారు. ప్రాజెక్టుల ప్రారంభోత్సవాలు, శిలాఫలకాల ఆవిష్కరణ వరకు బాగానే ఉన్నా... మోదీ బహిరంగ సభ రాష్ట్ర బీజేపీ నాయకత్వాన్ని ఉత్కంఠకు గురిచేస్తోంది. సభకు ప్రజల నుంచి ఎలాంటి స్పందన వస్తుందోనన్న ఆందోళన నెలకొంది. మొన్నటికి మొన్న శ్రీకాకుళం జిల్లా పలాసలో బీజేపీ జాతీయ అధ్యక్షుడు అమిత్‌ షా బహిరంగ సభ ‘ఫ్లాప్‌’ అయ్యింది. బీజేపీ నేతలు మూడువేల కుర్చీలు వేశారుకానీ, మూడొందల మందిని కూడా సమీకరించలేకపోయారు.

దీంతో అమిత్‌ షా సభా వేదిక కూడా ఎక్కకుండా... బస్సుపై నుంచే ప్రసంగించి వెళ్లిపోయారు. ఈ నేపథ్యంలో... మోదీ సభకు జన సమీకరణ చేయడంపై బీజేపీ నేతలు తర్జనభర్జన పడుతున్నట్లు తెలిసింది. ఇప్పుడున్న పరిస్థితుల్లో జనాన్ని సమీకరించటం అంత సులువు కాదనే ఆందోళన ఆ పార్టీ నేతల్లో నెలకొంది. ‘ఏది ఏమైనా, ఎలాగైనా’ మైదానం నిండాలని... దీనికోసం టీడీపీ వ్యతిరేక పక్షమైన వైసీపీ సహాయం తీసుకున్నారు. ఢిల్లీ స్థాయిలో బీజేపీ నేతలతో సన్నిహిత సంబంధాలున్న ఇద్దరు వైసీపీ కీలక నేతలకు ఈ బాధ్యతలు అప్పగించారు. బీజేపీపై ముఖ్యమంత్రి చంద్రబాబు నిత్యం విరుచుకుపడుతున్న సంగతి తెలిసిందే. రాష్ట్రానికి అన్యాయం చేసిన మోదీపై పోరాడాలని ఆయన పిలుపునిస్తున్నారు. ఒకవేళ ప్రధాని సభకు ప్రజాదరణ కరువైతే... చంద్రబాబు వాదనకు బలం చేకూరినట్లవుతుందని, దీనికోసమైనా బీజేపీ సభకు సహకరించాలని వైసీపీకి చెందిన ఇతర ముఖ్య నేతలు నిర్ణయించుకున్నారు.

ప్రధానమంత్రి నరేంద్రమోదీ ఆదివారం గుంటూరులో పాల్గొనే అధికారిక కార్యక్రమాలకు రాష్ట్ర ప్రభుత్వ ప్రతినిధులెవరూ హాజరుకావటం లేదు. ఏపీ పర్యటనకు వస్తున్న మోదీ ఆదివారం రెండు ప్రాజెక్టులకు ప్రారంభోత్సవం, ఓ ప్రాజెక్టుకు శంకుస్థాపన చేయనున్నారు. ఆదివారం ఉదయమే ఈ కార్యక్రమాలు ఉన్నప్పటికీ ఆలస్యంగా శనివారం మధ్యాహ్నం 3 గంటలకు ముఖ్యమంత్రి చంద్రబాబుకు ఆహ్వానం అందింది. అది కూడా కేంద్ర ప్రభుత్వం నుంచి కాకుండా ఓఎన్‌జీసీ నుంచి అందింది. ఈ నేపథ్యంలో ప్రధాని పాల్గొనే కార్యక్రమాలకు హాజరుకావాలా? వద్దా? రాష్ట్ర ప్రభుత్వ ప్రతినిధిగా ఎవరినైనా పంపించాలా? అనే అంశంపై అభిప్రాయాలు తెలుసుకునేందుకు చంద్రబాబు అందుబాటులో ఉన్న మంత్రులతో శనివారం రాత్రి టెలికాన్ఫరెన్స్‌ నిర్వహించారు.

అయితే రాష్ట్రానికి కేంద్ర ప్రభుత్వం అన్యాయం చేస్తోందంటూ ఓ వైపు నిరసనలు తెలుపుతూ మరోవైపు రాష్ట్ర ప్రభుత్వ ప్రతినిధిని పంపించటం సరికాదనే అభిప్రాయం వ్యక్తమైంది. నల్లచొక్కాలు ధరించి రాష్ట్ర ప్రభుత్వ ప్రతినిధిని పంపాలనే ప్రతిపాదన వచ్చినప్పటికీ అది కూడా వద్దనుకున్నారు. అయితే ప్రధాని మోడీకి స్వాగతం పలకటానికి, గవర్నర్ ఈఎస్ఎల్ నరసింహన్ ఆదివారం ఉదయం హైదరాబాద్ నుంచి గన్నవరం విమానాశ్రాయానికి చేరుకున్నారు. ప్రధానమంత్రి నరేంద్రమోదీ నేడు ఏపీ పర్యటనకు విచ్చేస్తున్నారు. మరికొద్ది సేపట్లో ఢిల్లీ నుంచి ఆయన ప్రత్యేక విమానంలో గన్నవరం చేరుకుంటారు. ఈ సందర్భంగా ప్రధానికి స్వాగతం పలికేందుకుగాను గవర్నర్ నరసింహన్ గన్నవరం ఎయిర్‌పోర్టుకు చేరుకున్నారు.

ప్రధానమంత్రి నరేంద్రమోదీ ఆదివారం ఉదయం 10:45కు విజయవాడ ఎయిర్‌పోర్టుకు చేరుకోనున్నారు. అనంతరం 11:05 గంటలకు హెలికాఫ్టర్‌లో గుంటూరుకు బయల్దేరనున్నారు. 11:15 గంటలకు ఏటుకూరు బహిరంగ సభలో ఆయన పాల్గొననున్నారు. ఈ సందర్భంగా ఏటుకూరులో ఏర్పాటుచేసిన శిలాఫలకాన్ని ఆవిష్కరించనున్నారు. అలాగే కృష్ణపట్నంలో నిర్మించే బీపీసీఎల్‌ కోస్టల్‌ టెర్మినల్‌కు మోదీ భూమిపూజ చేయనున్నారు. ఆ తర్వాత 11:30 గంటలకు గుంటూరు సభలో మోదీ ప్రసంగించనున్నారు. మ.12:25 గంటలకు గుంటూరు హెలిప్యాడ్‌కు చేరుకున్న అనంతరం 2:50 గంటలకు విజయవాడ ఎయిర్‌పోర్టుకు చేరుకుంటారు.