news

నూటయాభై దేశాల్లో పరిశ్రమలున్న జపాన్‌ సంస్థ లిక్జిల్‌ భారత్‌లో తొలిసారి పశ్చిమగోదావరి జిల్లాలో తయారీ కేంద్రాన్ని ఏర్పాటు చేసింది. జిల్లాలోని భీమడోలు మండలం అంబరుపేటలో రూ.400 కోట్ల పెట్టుబడితో ఈ సంస్థ ఏర్పాటు చేసిన నీరు, గృహావసరాల (శానిటరీ వేర్‌) తయారీ కేంద్రాన్ని ఉపముఖ్యమంత్రి చినరాజప్ప, పరిశ్రమలశాఖ మంత్రి అమర్‌నాథ్‌రెడ్డి బుధవారం ప్రారంభించారు. ముఖ్యమంత్రి చంద్రబాబు కృషి వల్లే రాష్ట్రానికి అనేక పరిశ్రమలు వస్తున్నాయని ఈ సందర్భంగా ఏర్పాటు చేసిన సమావేశంలో చినరాజప్ప చెప్పారు.

దావోస్‌లో జరిగిన పారిశ్రామికవేత్తల సదస్సులో ముఖ్యమంత్రి ఆహ్వానం మేరకు లిక్జిల్‌ సంస్థ ఇక్కడ పరిశ్రమ ఏర్పాటు చేసిందని వివరించారు. 45 ఎకరాల్లో ఏర్పాటు చేసిన ఈ పరిశ్రమలో 400 మందికి ఉపాధి కలుగుతుందన్నారు. స్వచ్ఛభారత్‌, స్వచ్ఛఆంధ్ర కార్యక్రమాలతో పారిశుద్ధ్యానికి ప్రాధాన్యం ఇస్తున్న నేపథ్యంలో ఇలాంటి పరిశ్రమలు అవసరం ఎంతైనా ఉందన్నారు. రాష్ట్రంలో మూడు పారిశ్రామిక భాగస్వామ్య సదస్సుల ద్వారా రూ.16 లక్షల కోట్ల పెట్టుబడులను ఆహ్వానించామని అమర్‌నాథ్‌రెడ్డి చెప్పారు.

ఒప్పందాలు (ఎంఓయూ) కుదుర్చుకున్న సంస్థలతో ఎప్పటికప్పుడు సమీక్షిస్తూ సమస్యలను అధిగమిస్తున్నామన్నారు. ఇతర రాష్ట్రాల్లో ఇలా ఎంఓయూలు కుదుర్చుకున్న వాటిలో 15 శాతం పురోగతి ఉంటే.. మన రాష్ట్రంలో 45 నుంచి 50 శాతం పురోగతి ఉందని వివరించారు. ఆహార రంగ యూనిట్ల ఏర్పాటులో 60 శాతం పురోగతి ఉందన్నారు. ఈ కార్యక్రమంలో లిక్జిల్‌ సంస్థ అధ్యక్షుడు కిన్యాసెటో, సీఈఓ బిజోయ్‌మోహన్‌, జిల్లా కలెక్టర్‌ కె.భాస్కర్‌, జపాన్‌ రాయబారి హిరామట్ను, రాష్ట్ర ప్రభుత్వ విప్‌ చింతమనేని ప్రభాకర్‌, స్థానిక ఎమ్మెల్యే గన్ని వీరాంజనేయులు తదితరులు పాల్గొన్నారు.

మరో పక్క, శ్రీసిటీ సెజ్‌లో మరో పారిశ్రామక సంస్థ కొలువుదీరింది. జపాన్‌, దక్షిణ కొరియా భాగస్వామ్యంతో ఏర్పాటైన ఎంసిఎన్‌ఎస్‌ పోలియూరీథేన్స్‌ ఇండియా ప్రైవేట్‌ లిమిటెడ్‌ కంపెనీ యూనిట్‌ ఉత్పత్తి ప్రారంభించింది. కంపెనీ చీఫ్‌ ఆపరేటింగ్‌ ఆఫీసర్‌ కిడాన్‌వాన్‌, మేనేజింగ్‌ ఎడ్యుకేట్‌ ఆఫీసర్‌ తడాని యోషినో, సిఇఒ యూజూన్‌లిమ్‌, షింగోషిబాక తదితరులు ఈ కార్యక్రమంలో పాల్గొన్నారు. ఐదు ఎకరాల విస్తీర్ణంలో రూ.50 కోట్ల పెట్టుబడితో ఏర్పాటు చేసిన ఈ యూనిట్‌లో ఏటా 15,000 టన్నుల పోలియూరీఽథేన్స్‌ వస్తువులు తయారు చేస్తారు. ఈ ప్రారంభోత్సవంలో కంపెనీ ప్రతినిధులతోపాటు శ్రీసిటీ ఎండి రవీంద్ర సన్నారెడ్డి పాల్గొన్నారు.

పూతరేకు గురించి వినని ఆంధ్రులు ఉండరనడం లో అతిశయోక్తి లేదు. గోదావరి జిల్లాలు పూత రేకుల తయారీకి ప్రసిద్ధి. ఇందులో ఆత్రేయపురం పూతరేకుల రుచే వేరు. ఆంధ్ర రాష్ట్రంలో అత్యంత ప్రసిద్ధి చెందిన ఆత్రేయపురం పూత రేకుకు విశ్వవ్యాప్త గుర్తింపు తెచ్చేందుకు ఏపీ పర్యాటక శాఖ ప్రత్యేక కార్యక్రమాన్ని చేపట్టింది. ఐదు నుంచి ఎనిమిది మీటర్ల పొడవు ఉండే పూత రేకును ఏపీటీడీసీ పది మీటర్ల పొడవైన పూతరేకు రూపొందించి రికార్డు సాధించనుంది. అతి పొడవైన పూత రేకుగా ఇండియా బుక్‌ ఆఫ్‌ రికార్డ్సులోకి ఎక్కించేందుకు అవ సరమైన ఏర్పాట్లను పర్యాటక శాఖ చేసింది.

విజయవాడలోని బెరంపార్కులో గురువారం అత్యంత పొడవైన పూత రేకును తయారు చేసేందుకు పర్యాటక అధికారులు చర్యలు చేపట్టారు. మధ్యాహ్నం 3గంట ల వరకు పూతరేకు తయారు చేయనున్నారు. ఆ తర్వాత సాయంత్రం జరిగే ఓ కార్యక్రమంలో ఆంధ్ర ప్రదేశ్‌ పర్యాటక ప్రాధికార సంస్థ ముఖ్య కార్యనిర్వ హణాధికారి హిమాన్షు శుక్లా ఇండియా బుక్‌ ఆఫ్‌ రికార్డ్సు సంస్థ ప్రతినిధుల నుంచి ధృవీకరణ పత్రాన్ని అందుకోనున్నారు. పూతరేకుల తయారీ ఒక వినూ త్న ప్రక్రియ కాగా పదిమీటర్ల పొడవైనది అంటే ఆషామాషీ కాదు. ఇందుకోసం గోదావరి జిల్లాల నుం చి పాకశాస్త్రంలో ప్రావీణ్యులైన వారిని ఏపీటీడీసీ రప్పిస్తోంది.

ఇదే సమయంలో రికార్డు కోసం ఏ విధ మైన ఆధునిక పోకడలను తీసుకోవడం లేదని అధికా రులు చెపుతున్నారు. సాంప్రదాయకత వైపు మొగ్గు చూపుతూ కుండలపైనే పూతరేకును తయారు చేయ నున్నారు. ఇందుకు సంబంధించి ఏపీటీడీసీ సిఇవో హిమాన్షు శుక్లా ఒక ప్రకటన చేస్తూ తెలుగు వంటకా లకు జాతీయ, అంతర్జాతీయ స్థాయి గుర్తింపు తెచ్చేం దుకు ఇండియా బుక్‌ ఆఫ్‌ రికార్డ్స్‌ను ఎంచుకున్నామ న్నారు.

ఇప్పటికే ఆంధ్ర వంటకాలను ప్రోత్సహించేం దుకు పలు చోట్ల ఆహార పండుగలు నిర్వహిస్తున్నామ ని, ఇదే సమయంలో అరకు బొంగు బిర్యానీని ఏపీ ప్రత్యేక వంటకంగా తీర్చిదిద్దేందుకు రాష్ట్ర వ్యాప్తంగా వంటవారికి ప్రత్యేక శిక్షణ అందిస్తున్నట్లు ఆయన పేర్కొన్నారు. అత్యంత పొడవైన పూతరేకు రికార్డు సాధనకు సంబంధించి ముగింపు కార్యక్రమానికి ప ర్యాటక, భాషా సాంస్కృతిక శాఖ కార్యదర్శి మీనా తదితరులు పాల్గొననున్నట్లు ఆయన తెలిపారు.

మల్టీప్లెక్స్‌... ఏదైనా సినిమాకి వెళ్తే చాలు దోచేస్తారు... ఇది ఒక మాఫియా... ప్రజలను దోచేస్తారు... నియంత్రణ లేక, అడిగేవారు లేక చలరేగిపొతూ ఉంటారు... కనీసం మంచి నీళ్ళు కూడా లోపలకి తీసుకు వెళ్ళనివ్వరు... లోపల కొందాం అంటే MRP మీద, నాలుగు అయిదు రెట్లు ఎక్కువ అమ్ముతారు.. ఏదైనా తిందాం అంటే, కనీసం 250 రూపాయలు పెట్టాలి... అయితే ఇప్పుడు ఈ దోపిడీకి చెక్ వినియోగదారుల ఫోరం. పరిస్థితిని నియంత్రణలోకి తేవాలని, మాల్స్‌లో జరుగుతున్న దోపిడీ అరికట్టాలని ఆదేశించారు...

విజయవాడలో మల్టీప్లెక్సుల్లో అధిక ధరలకు ఆహార పదార్థాల అమ్మకంపై వినియోగదారుల ఫోరం సంచలన తీర్పు చెప్పింది. ఐదు మల్టీప్లెక్స్ యాజమాన్యాలకు వినియోగదారుల ఫోరం జడ్జి మాధవరావు రూ.5లక్షల భారీ జరిమానా విధించారు. అలాగే ఎల్‌ఈపీఎల్, ట్రెండ్ సెట్, పీవీఆర్‌, పీవీపీ, ఐనాక్స్ మల్టీప్లెక్స్‌ పై చర్యలు తీసుకోవాలని తీర్పునిచ్చారు. ప్రజలు బయట నుంచి తెచ్చుకునే ఆహారపదార్థాలు, తాగునీటికి అనుమతి ఇవ్వాలని ఆదేశించారు. ఆదేశాలు తప్పక అమలు చేయాలని అధికారులకు న్యాయమూర్తి ఆదేశాలు జారీ చేశారు. తమ ఆదేశాలు అమలయ్యేలా చూడాలని తూనికలు, కొలతల శాఖను ఆదేశించింది.

విజయవాడలోని కొన్ని మల్లీఫ్లెక్స్ థియేటర్లలో టిక్కెట్లు, ఆహార పదార్థాలు అధిక ధరలకు విక్రయిస్తున్నారంటూ కొందరు వినియోగదారులు మార్గదర్శక సమితి సహకారంతో గతేడాది ఏప్రిల్‌లో వినియోగదారుల ఫోరాన్ని ఆశ్రయించారు. ఎల్‌ఈపీఎల్‌, ట్రెండ్‌సెట్‌, పీవీఆర్‌, పీవీపీ, ఐమ్యాక్స్ మల్టీఫ్లెక్స్‌ థియేటర్లపై చర్యలు తీసుకోవాలని పిటిషన్‌లో కోరారు. దీనిపై మల్లీఫ్లెక్స్ యాజమాన్యాలు, తూనికలు, కొలతల శాఖను న్యాయస్థానం ప్రతివాదులుగా చేర్చింది. గతేడాది నుంచి దీనిపై పలుమార్లు వాద ప్రతివాదనలు జరిగాయి. సమగ్ర విచారణ చేసిన న్యాయమూర్తి మాధవరావు ఈ అంశంపై గురువారం సంచలన తీర్పు వెలువరించారు.

నగరంలోని ఐదు థియేటర్ల యాజమాన్యాలు తినుబండారాలపై ఎమ్మార్పీ కంటే మూడురెట్లు అధికంగా ధర ముద్రించి వినియోగదారులను మోసం చేసినట్లు న్యాయమూర్తి తీర్పులో వెల్లడించారు. దీంతో వినియోగదారులు నష్టపోయిన మొత్తాన్ని 9శాతం వడ్డీతో పరిహారం చెల్లించాలని మల్టీఫ్లెక్స్‌ యాజమాన్యాలను ఆదేశించారు. ఒక్కక్కరికి రూ.5లక్షల చొప్పున మొత్తం రూ.25లక్షల జరిమానా విధించారు. ఈ మొత్తాన్ని రెండు నెలల లోపు జిల్లా వినియోగదారుల ఫోరం వద్ద జమ చేయాలని తీర్పులో ఆదేశించారు. ఇలాంటి మోసాలకు పాల్పడటం తీవ్రమైన తప్పిదమని.. భవిష్యత్‌లో ఇలాంటివి చేయకుండా జాగ్రత్తలు తీసుకోవాలన్నారు. థియేటర్లకు వచ్చే వినియోగదారులకు ఉచిత తాగునీరు సహా అన్ని సౌకర్యాలు కల్పించాలని, బయట నుంచి తీసుకొచ్చే ఆహార పదార్థాలు, శీతల పానీయాలను అనుమతించాలని ఆదేశించారు.